(ភ្នំពេញ)៖ សេចក្តីស្នើ វិសោធនកម្មច្បាប់ ស្តីពីគណបក្សនយោបាយ ដែលរៀបចំឡើងដោយ គណបក្សប្រជាជនកម្ពុជា នឹងត្រូវដាក់បញ្ជូលក្នុងកិច្ចប្រជុំគណៈកម្មាធិការអចិន្រ្តៃយ៍ នៃរដ្ឋសភា នៅថ្ងៃទី០៦ ខែកក្កដា ឆ្នាំ២០១៧ ស្អែកនេះ។ នេះបើតាមការអះអាងរបស់ លោក ឡេង ប៉េងឡុង អ្នកនាំពាក្យរដ្ឋសភា។

លោក ឡេង ប៉េងឡុង បានអះអាងថា សេចក្តីស្នើច្បាប់នេះត្រូវបានកំណត់ជាប្រញ៉ាប់ ដែលនឹងត្រូវគណៈកម្មាធិការអចិន្រ្តៃយ៍ពិនិត្យ នៅថ្ងៃស្អែក ហើយបញ្ជូនទៅគណៈកម្មការជំនាញ មុននឹងត្រូវបានដាក់បញ្ចូលទៅក្នុងកិច្ចប្រជុំពេញអង្គរដ្ឋសភា អនុម័ត។

បើតាម លោក សុខ ឥសាន អ្នកនាំពាក្យគណបក្សប្រជាជនកម្ពុជា បានឲ្យដឹងថា សេចក្តីស្នើច្បាប់នេះ ត្រូវបានចុះហត្ថលេខា ដោយតំណាងរាស្រ្តមកពីគណបក្សប្រជាជនកម្ពុជា ច្រើនជាង៣០រូប នៅព្រឹកថ្ងៃទី០៣ ខែកក្កដា ឆ្នាំ២០១៧។

លោក សុខ ឥសាន មិនបានបញ្ជាក់ថា នៅក្នុងសេចក្តីស្នើវិសោធនកម្មច្បាប់នេះ នឹងមានចំណុចណាខ្លះត្រូវបានកែប្រែនោះទេ ប៉ុន្តែគេជឿថា វិសោធនកម្មច្បាប់ថ្មីនេះ នឹងរឹតបណ្តឹងថែមទៀតដល់ទណ្ឌិត ឬអ្នកទោស ក្នុងការធ្វើសកម្មភាពនយោបាយ។

សូមបញ្ជាក់ថា ការស្នើធ្វើវិសោធនកម្មច្បាប់ស្តីពីគណបក្សនយោបាយ បានធ្វើឡើង បន្ទាប់ពី មេដឹកនាំកំពូលរបស់ គណបក្សកាន់អំណាច សម្តេចតេជោ ហ៊ុន សែន កាលពីថ្ងៃពុធ សប្តាហ៍មុន បានព្រមានជាថ្មីថា តំណាងរាស្រ្តគណបក្សប្រជាជនកម្ពុជា នឹងស្នើឱ្យរដ្ឋសភាធ្វើវិសោធនកម្ម ច្បាប់ស្តីពីគណបក្សនយោបាយ ជាថ្មីម្តងទៀត ដើម្បីធ្វើយ៉ាងណាកុំឱ្យទណ្ឌិត ឬអ្នកទោស អាចធ្វើសកម្មភាព នយោបាយតាមតែចិត្ត។
សម្តេចតេជោ ហ៊ុន សែន បានថ្លែងយ៉ាងដូច្នេះថា៖ «បើវាមិនច្បាស់ យើងត្រូវធ្វើឱ្យច្បាស់ តើអ្នកទោសមានសិទ្ធិភ្ជាប់ខ្លួនទៅនឹងគណបក្សនយោបាយដែរឬទេ? ប្រសិនបើវាមិនគ្រប់គ្រាន់ យើងត្រូវធ្វើវិសោធនកម្មច្បាប់បន្ថែមទៀត អំពីបក្សនយោបាយ ដែលមុននេះមិនតម្រូវឱ្យអ្នកទោស ទទួលតួនាទីជាមួយនឹងឋានៈណាមួយ នៅក្នុងគណៈកម្មាធិការនាយក ឬប្រធានបក្សនោះទេ ប៉ុន្តែឥឡូវនេះការចេញមុខរបស់មនុស្សដែលគ្មានការអៀនខ្មាស់ តើចំណោទខាងផ្លូវច្បាប់វាយ៉ាងម៉េច?»

សម្តេចតេជោ បានរិះគន់បន្ថែមថា «អ្នកទោស វាតែងតែបាត់បង់សិទ្ធិបោះឆ្នោត ចុះហេតុអ្វីអ្នកទោស បែរក្លាយទៅជាអ្នកបង្កសង្រ្គាមដែលបង្កសង្រ្គាមអត់ចេះឈប់។ ខ្ញុំសូមស្នើឱ្យសមាជិក សមាជិការសភានៃគណបក្សប្រជាជនកម្ពុជា ពិនិត្យមើល អាចស្នើសុំធ្វើវិសោធនកម្ម នៃច្បាប់ស្តីពីគណបក្សនយោបាយ ដែលកុំឱ្យអ្នកទោស ធ្វើសកម្មភាពតាមរបៀបនេះ ព្រោះរឿងនេះគឺជារឿងផ្លូវច្បាប់ មិនអាចលេងសើចបានទេ នៅក្នុងដំណើរការប្រជាធិបតេយ្យ»។

ទោះជាមិនបញ្ចេញឈ្មោះអំពីទណ្ឌិតដែលធ្វើសកម្មភាពនយោបាយខុសច្បាប់នោះក៏ដោយ ប៉ុន្តែសម្តេចតេជោ ហ៊ុន សែន ទំនងជាសម្តៅទៅលើទណ្ឌិត សម រង្ស៊ី អតីតប្រធានគណបក្សសង្រ្គោះជាតិ ដែលនិរទេសខ្លួនឯងទៅក្រៅប្រទេស ដែលទើបនឹងបានបង្កើតវីដេអូមួយ កាលពីយប់ថ្ងៃទី២៦ ខែមិថុនា ឆ្នាំ២០១៧ ដើម្បីវាយប្រហារ និងលាបពណ៌យ៉ាងធ្ងន់ធ្ងរ ទៅលើគណបក្សប្រជាជនកម្ពុជា ដោយមិនខ្លាចមានទោស។

តាមរយៈវីដេអូដែលបង្ហោះនៅលើទំព័រ Facebook នោះ លោក សម រង្ស៊ី បានចោទប្រកាន់គណបក្សប្រជាជនកម្ពុជា ដែលជាគណបក្សរំដោះប្រជាពលរដ្ឋខ្មែរ ឱ្យរួមផុតពីរបបប៉ុលពតថា ជាគណបក្សដែលបង្កើតឡើងដោយវៀតណាម ហើយធ្វើអ្វីៗតាមការបង្គាប់បញ្ជារបស់វៀតណាម។សម្តេចតេជោ ហ៊ុន សែន បានប្រតិកម្មចំពោះការវាយប្រហារនេះ។ សម្តេចចាត់ទុកថា ការវាយប្រហាររបស់ លោក សម រង្ស៊ី គឺជាការជេរប្រមាថលាបពណ៌ ដែលគណបក្សប្រជាជនកម្ពុជា មិនអាចអត់ធ្មត់ និងទទួលយកបានឡើយ៕