(ភ្នំពេញ)៖ លោក អ៊ឹម វណ្ណៈ ចៅក្រមជំនុំជម្រះសាលាដំបូងរាជធានីភ្នំពេញ នៅថ្ងៃទី០៥ ខែកក្កដា ឆ្នាំ២០១៧ បានប្រកាសសាលក្រមផ្តន្ទាទោសជនជាប់ចោទឈ្មោះ ស អឿន ដាក់ពន្ធនាគារចំនួន៣ឆ្នាំ គិតពីថ្ងៃចាប់ខ្លួន តាមមាត្រា២២៤ នៃក្រមព្រហ្មទណ្ឌ ពាក់ព័ន្ធករណីសម្លាប់ប្រពន្ធរបស់ខ្លួន។
ពិរុទ្ធជនឈ្មោះ ស អឿន អាយុ៣៨ឆ្នាំ មានមុខរបររត់ម៉ូតូឌុប ស្នាក់នៅបន្ទប់ជួល សង្កាត់ចោមចៅ ខណ្ឌពោធិ៍សែនជ័យ ត្រូវបានតំណាងអយ្យការសម្រេចចោទប្រកាន់ពីបទ «ហិង្សាមានស្ថានទម្ងន់ទោស ដោយមរណៈភាព នៃជនរងគ្រោះ» តាមមាត្រា២២៤ នៃក្រមព្រហ្មទណ្ឌ។
គួររំលឹកថា កាលពីថ្ងៃទី២៣ ខែមិថុនា ឆ្នាំ២០១៧ ពិរុទ្ធជនរូបនេះ ត្រូវបានក្រុមប្រឹក្សាជំនុំជម្រះ នៃសាលាដំបូងរាជធានីភ្នំពេញ បានធ្វើការជំនុំជម្រះជាប់ពាក់ព័ន្ធ ការប្រើអំពើហិង្សាវាយប្រពន្ធឈ្មោះ យេន ស្រីខួច អាយុ៣៥ឆ្នាំ បណ្តាលឲ្យស្លាប់ ក្នុងរឿងជំទាស់ពាក្យសម្តីគ្នា កើតហេតុនៅក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ កាលពីអំឡុងដើមឆ្នាំ២០១៧៕
