(កំពង់ធំ)៖ ចាហួយដូង ទឹកដោះគោខាប់ ទឹកក្រូច មីម៉ាម៉ាកំប៉ុង ខូចគុណភាព នាំចេញពីប្រទេសថៃ ដែលក្រុមអាជីវករយកដាក់លក់ នៅផ្សារកំពង់ឈើទាល ធ្វើឲ្យប៉ះពាល់សុខភាពយ៉ាងខ្លាំងនោះ ត្រូវបានមន្រ្តីសាខាកាំកុងត្រូលខេត្តកំពង់ធំ បានរកឃើញ និងប្រមូលយកទៅដុតកម្ទេចចោល។
ការរកឃើញទំនិញខូចគុណភាពទាំងនេះ បានធ្វើឡើងនៅថ្ងៃទី០៥ ខែកក្កដា ឆ្នាំ២០១៧នេះ ពេលមន្រ្តីកាំកុងត្រូល សហការជាមួយមន្ទីរពាណិជ្ជកម្ម អាជ្ញាធរដែនដី បានបន្តចុះពិនិត្យ ផ្សព្វផ្សាយអំពីគុណភាព និងសុវត្ថិភាព ម្ហូបអាហារ នៅក្នុងផ្សារកំពង់ឈើទាល ស្ថិតនៅភូមិកំពង់ឈើទាល ឃុំសំបូរ ស្រុកប្រាសាទសំបូរ ដើម្បីចូលរួមលើកកម្ពស់សុខភាព និងសុវត្ថិភាពចំណីអាហារតាមការណែនាំពីថ្នាក់ដឹកនាំ។
មន្រ្តីកាំកុងត្រូលខេត្តកំពង់ធំ បានឲ្យដឹងថា បន្ទាប់ពីចុះត្រួតពិនិត្យ ក្រុមការងារបានរកឃើញផលិតផលជាច្រើន ដែលខូចគុណភាពដូចជា៖ ចាហួយដូងម៉ាក Thanh Binh ចំនួន១១កេះ និង៤កញ្ចប់, ទឹកដោះគោខាប់ ម៉ាកMali ចំនួន៥កំប៉ុង, ទឹកត្រចៀកកាំ ម៉ាកYengo ចំនួន១៨កំប៉ុង, ទឹកក្រូច ម៉ាកCAM ចំនួន១៧កំប៉ុង, ទឹកភេសជ្ជៈ ម៉ាក RanGer ចំនួន៤៨កំប៉ុង, ទឹកក្រូចម៉ាក JubJub ចំនួន១៨ដប និងមីម៉ាម៉ាកំប៉ុងចំនួន៦កំប៉ុង ក្រោយមកជំនាញបានធ្វើកំណត់ហេតុដកហូត ដើម្បីបំផ្លាញចោល។
ក្រុមការងារក៏បានចែកផ្សាយ នូវរូបភាព Poster និងផ្សព្វផ្សាយដល់អាជីវករអ្នកលក់ដូរ និងអ្នកប្រើប្រាស់ឲ្យបានយល់ដឹង ពីផលវិបាកដែលបណ្តាលមកពីការបរិភោគអាហារហួសកាលបរិច្ឆេទ ប្រើប្រាស់ និងការដាក់លាយ បន្ថែមសារធាតុគីមី ហាមឃាត់ចូលក្នុងម្ហូបអាហារ។
ទន្ទឹមនឹងនេះក្រុមការងារបានណែនាំដល់អាជីវករ ឲ្យចៀសវៀងការប្រើប្រាស់សារធាតុគីមីបន្ថែម ទៅលើផលិតផលម្ហូបអាហារ ឬការកែច្នៃម្ហូបអាហារ ដែលធ្វើឲ្យមានគ្រោះថ្នាក់ដល់សុខភាព និងណែនាំអាជីវករឲ្យយល់ដឹងពីអនាម័យ ការរៀបចំទំនិញលក់ដូរ ឲ្យមានសណ្តាប់ធ្នាប់ទៅ តាមប្រភេទទំនិញហូបចុក និងទំនិញប្រើប្រាស់ផ្សេងៗ ដាក់ដាច់ដោយឡែកៗពីគ្នា ចៀសវៀងនូវការដាក់តាំងលក់ទំនិញ ហួសកាលបរិច្ឆេទ ប្រើប្រាស់ កំប៉ុងកំពិត ប៉ោង ច្រេះស៊ីស និងទំនិញដែលមានសារធាតុគីមីហាមឃាត់។
មន្រ្តីកាំកុងត្រូលបានបញ្ជាក់ថា ប្រជាពលរដ្ឋគ្រប់រូប ពេលដែលទិញបន្លែមកពីផ្សារ គួរលាងទឹកឲ្យបានច្រើនសារ ឬត្រាំទឹកអំបិល ការធ្វើរបៀបនេះ ត្រូវបានមន្រ្តីកាំកុងត្រូលឲ្យដឹងថា ដើម្បីឲ្យអស់នូវកាកសំណល់ថ្នាំជាតិ កសិកម្ម។
សូមជម្រាបថា យុទ្ធនាការនេះធ្វើឡើង ក្រោមការណែនាំពីសំណាក់ លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាល ទទួលបន្ទុកជាអគ្គនាយកកាំកុងត្រូល នៃក្រសួងពាណិជ្ជកម្ម សាខាកាំក្រុងត្រូលនៅទូទាំងប្រទេស បាននិងកំពុងបន្តយុទ្ធនាការចុះត្រួតពិនិត្យមើលទំនិញ ដែលដាក់តាំងលក់តាមផ្ទះ តាមទីផ្សារ ពិសេសទំនិញនាំចូល តាមមាត់ច្រកទ្វារព្រំដែន ដើម្បីចូលរួមចំណែកលើការការពារសុវត្ថិភាព ចំណីអាហារដល់ប្រជាពលរដ្ឋ៕
