(ភ្នំពេញ)៖ ប្រលោមលោកដ៏ល្បីរបស់លោក តារាចម្រៀង ម៉ុង ម៉ានិត បានក្រុងពាលីចេញថតជាខ្សែភាពយន្តភាគ ទូរទស្សន៍ចំនួន៣៥ភាគ ក្រោមកិច្ចសហការផលិត ដោយក្រុមហ៊ុន ស្ទូឌីយោហ្វ័រ (Studio4 Production) និងស្ថានីយទូរទស្សន៍ MyTV ដែលពិធីនេះ បានប្រព្រឹត្តិទៅកាលពីព្រឹកថ្ងៃអង្គារ៍ ទី០៤ ខែកក្កដា ឆ្នាំ២០១៧នេះ។
អ្នកនិពន្ធប្រលោមលោក «បេសកកម្មមួយ» និងជាអ្នកចម្រៀងដ៏ល្បី លោក ម៉ុង មានិត បានសម្ដែងការសប្បាយរីករាយ ដែលស្នាដៃប្រលោមលោកទី១របស់លោក បានត្រូវយកមកផលិត ជាខ្សែភាពយន្តភាគ។
ម្ចាស់បទ «មាននាងក៏ធុញអត់នាងក៏ធុញ» រូបនេះនិយាយថា លោកទុកចិត្តក្រុមការងារផលិត ហើយជឿជាក់ថា រឿងរបស់លោកនឹងផលិតបាន គុណភាពខ្ពស់។
«ខ្ញុំមានអារម្មណ៍ភ័យផង អរផងដោយនេះ ជាស្នាដៃទី១ដែលខ្ញុំសរសេរ ហើយត្រូវយកមកផលិតជាខ្មែរភាពយន្ត។ ខ្ញុំបានពន្យល់តួទាំងអស់ពីខ្លឹមសាររួមរបស់សាច់រឿងរបស់ខ្ញុំ ហើយពួកគាត់យល់ពីតួអង្គខ្លួនឯងច្បាស់ ដែលងាយស្រួលពេលសម្ដែង»។
លោក ម៉ានិត បន្តថា «ខ្ញុំជឿជាក់ទៅលើស្នាដៃច្នៃប្រឌិត និងភាពហ្មត់ចត់របស់ក្រុមការងារក្រុមហ៊ុន ស្ទុឌីយោហ្វ័រ។ ពួកយើងនឹងប្រឹងប្រែង មិនឲ្យទស្សនិកជនអស់សង្ឃឹមទេ»។
សូមរំឭកថា ប្រលោមលោក «បេសកកម្មមួយ» ដែលត្រូវបានយកមកផលិតនេះ ជាប្រភេទប្រលោមលោកយុវវ័យបែបស៊ើបអង្កេត វាយប្រហារ ស្នេហា ហើយបានលក់ដាច់ជាងគេ កាលពីឆ្នាំ២០១៦។
អ្នកស្រី ប៉ែន បូរណ៍វឌ្ឍនា ផលិតករភាពយន្តនេះបានមានឲ្យដឹងថា រឿងនេះបានចំណាយពេលជាងបួនខែ ក្នុងការសម្រិតសម្រាំងជ្រើសរើស តួដែលត្រូវនឹងសាច់រឿង និង ផ្តល់ការបង្វឹកហាត់តួទាំងអស់ ក្នុងការហាត់សមឈុតឆាកវាយតប់ ក៏ដូចជាការរៀនលេងភ្លេង និង ការរៀនសម្តែងបន្ថែម។
«បេសកកម្មមួយ ជាប្រលោមលោកដែលល្បី ក្នុងឆ្នាំ២០១៦ ដូចនេះរឿងភាគទូរទស្សន៍នេះ យើងបានខិតខំប្រឹងប្រែង ផលិតឲ្យកាន់តែល្អប្រសើរ និងមានអ្វីថ្មីសម្រាប់ទស្សនិកជន។ ក្រៅពីចំណាយពេលវេលាច្រើន ក្នុងការរើសតួ យើងបានបង្ហាត់ពួកគាត់បន្ថែមពីក្បាច់គុន និង រៀនលេងភ្លេង មុនចុះថតទៀតផង»។
ភាពយន្តភាគ «បេសកកម្មមួយ»នេះ ជាស្នាដៃបន្ទាប់ពីរឿង «ស្រទន់មន្តស្នេហ៍» ដែលនឹងចាក់បញ្ចាំងនៅស្ថានីយទូរទស្សន៍ CTN នាពេលឆាប់ៗនេះ ដែលផលិតដោយក្រុមហ៊ុន ស្ទុឌីយោហ្វ័រ និងក្រុមហ៊ុនសប្បាយឌីជីថល។ ចំណែកភាពយន្តភាគ «បេសកកម្មមួយ» ដែលចាប់ផ្តើមថតនេះ នឹងចាក់បញ្ចាំងនៅលើកញ្ចក់ទូរទស្សន៍ MyTV នៅដើមឆ្នាំ២០១៨នេះ ដោយមានលោក ហ៊ត់ រ៉ាវី និងលោក ជ័យ សម្បត្តិ ជាអ្នកដឹកនាំរឿង។
លោក ហ៊ត់ រ៉ាវី អ្នកដឹកនាំរឿង «បេសកកម្មមួយ» បានបង្ហាញថា រឿងនេះបានចំណាយពេលប្រាំខែ ដើម្បីកែសម្រូលរឿងពីប្រលោមលោក មកជាអត្ថបទរឿងភាគទូរទស្សន៍ និងត្រូវចំណាយពេល៥ខែផ្សេងទៀត ដើម្បីចុះថត។
«នេះជាប្រភេទរឿង ស៊ើបអង្កេត បែបយុវវ័យ ដែលមានលាយឡំ ដោយឈុតវាយប្រហារ។ ចំណុចសំខាន់ក្នុងការផលិតរឿងនេះ គឺយើងបានឲ្យតួទាំងអស់ រៀនសមប្រឈុតដោយមានគ្រូក្បាច់គុន បង្រៀនជាក់ស្តែង។ ខ្ញុំសប្បាយចិត្ត ដែលក្រុមហ៊ុនទុកចិត្តខ្ញុំ និងក្រុមការងារក្នុងផលិតរឿងនេះ»។ លោក ហ៊ត់ រ៉ាវី បញ្ជាក់បន្ថែម៕
