(សៀមរាប)៖ លោក ឃឹម ប៊ុនសុង អភិបាលខេត្តសៀមរាប និងលោកស្រី បាននាំយកនូវទៀនព្រះវស្សា ទេយ្យវត្ថុ រួមទាំងបច្ច័យ យកទៅវេរប្រគេនព្រះសង្ឃគង់នៅចាំព្រះវស្សា វត្តរាជបូណ៌ ស្ថិតក្នុងក្រុងសៀមរាប នៅព្រឹកថ្ងៃទី០៤ ខែកក្កដា ឆ្នាំ២០១៧នេះ ដោយមានការចូលរួមពី លោក លោកស្រី មន្ត្រីរាជការ និងពុទ្ធបរិស័ទចូលរួមផងដែរ។
បន្ទាប់ពីព្រះសង្ឃចម្រើនព្រះបរឹត្ត និងតាមការធ្វើកិច្ចទៅកម្មវិធីរបស់លោកតាអាចារ្យ ក៏បានប្រារព្វធ្វើពិធីវេរប្រគេន ទៀនព្រះវស្សា ទៅតាមគន្លងប្រពៃណីព្រះពុទ្ធសាសនា ដើមី្បឧទ្ទិសកុសលផលបុណ្យដល់បុព្វការីជន សាច់សាលោកហិត កម្មាភិបាល យុទ្ធជន យុទ្ធនារី ដែលបានពលី មរណៈ ក្នុងបុព្វហេតុជាតិមាតុភូមិ និងការអភិវឌ្ឍន៍ប្រទេសឲ្យមានការរីកចម្រើនដែលបានចែកឋានទៅកាន់លោកខាងមុខផងដែរ។
ម៉្យាងទៀតការប្រគេនទៀនព្រះវស្សានេះ គឺជាការប្រារឰធ្វើទៅតាមទំនៀមទំលាប់ប្រពៃណីព្រះពុទ្ធសាសនា ដែលមាននាសម័យកាលយូលង់មកហើយ នៅជារៀងរាល់ឆ្នាំ និងដើម្បីប្រគេនព្រះសង្ឃ ដែលគង់ចាំព្រះវស្សាក្នុងរយៈពេលមួយត្រីមាស។
លោក ឃឹម ប៊ុនសុង បានលើកឡើងថា សម្រាប់ប្រជាពលរដ្ឋ និងបងប្អូនពុទ្ធបរិស័ទ អំពីទីវត្តអារាម គឺមិនត្រឹមតែបម្រើវិស័យសាសនា ជាទីសក្ការៈបូជារបស់បងប្អូនពុទ្ធបរិស័ទប៉ុណ្ណោះទេ គឺជាទីកន្លែងដែលប្រមូលផ្តុំនូវវប្បធម៌ និងជាថ្នាលបណ្តុះបណ្តាលធនធានមនុស្ស ជាជង្រុកនៃគ្រឹះអក្សរសាស្ត្រជាតិ អរីយធម៌ វប្បធម៌ខ្មែរ។
លោកបញ្ជាក់ថា ការដង្ហែនូវទៀនព្រះវស្សាយកមកវេរប្រគេនព្រះសង្ឃ នៅវត្តរាជបូណ៌ នាពេលនេះ គឺជាការគោរពប្រពៃណីសាសនាព្រះពុទ្ធ ត្រូវចូលកាន់ព្រះវស្សា ក្នុងរយៈពេលអស់មួយត្រីមាស ដែលព្រះសង្ឃគង់ចាំព្រះវស្សានៅក្នុងទីវត្ត ទើបថ្ងៃនេះត្រូវបានគណៈអភិបាល និងក្រុមប្រឹក្សាខេត្ត សប្បុរសជនក្នុងខេត្ត បានដង្ហែរយកមកវេរប្រគេនដល់ព្រះសង្ឃនៅតាមវត្ត ដើម្បីព្រះសង្ឃយកទៅដុតបំភ្លឺបូជាថ្វាយព្រះ និងសិក្សារៀនសូត្រនូវ គម្ពីធម៌វិន័យ ព្រះសម្មាសាម្ពុទ្ធ ព្រះបរមគ្រូ។
សម្ភារៈបរិក្ខាដែលបានប្រគេនព្រះសង្ឃនាឱកាសនោះ មានទៀនវស្សា០១គូ និងគ្រឿងឧបភោគបរិភោគ ចំនួន១១មុខ និងបច្ច័យចំនួន៣លាន៧០ម៉ឺនរៀល និងប្រាក់ដុល្លា១៧០ដុល្លា ក្នុងនោះដែរលោក ឃឹម ប៊ុនសុង និងលោកស្រី បានជូនថវិកាដល់សីលវន្ត័ សីលវតីម្នាក់ៗ១ម៉ឺនរៀលផងដែរ៕
