(បាងកក)៖ ក្រុមពលករចំណាកស្រុក ជនជាតិមីយ៉ាន់ម៉ាជាង១៥,០០០នាក់ បានវិលត្រឡប់ទៅកាន់មាតុភូមិវិញ ចាប់តាំងពីច្បាប់រឹតបន្តឹង លើការជួលពលករ បរទេស ត្រូវបានចេញផ្សព្វផ្សាយកាលពីសប្តាហ៍មុន។ នេះបើតាមសារព័ត៌មានស៊ិនហួ ចេញផ្សាយនាយប់ថ្ងៃទី៣ ខែកក្កដា ឆ្នាំ២០១៧នេះ។

ក្រុមពលករចំណាកស្រុក បានវិលត្រឡប់ទៅមាតុភូមិវិញ តាមរយៈច្រកនៃស្រុក Mae Sot នៅភាគខាងជើងឆៀងខាងលិច ប្រទេសថៃ ដែលជាតំបន់ព្រំដែន ជាមួយនឹងតំបន់ Myawaddy របស់ប្រទេស មីយ៉ាន់ម៉ា។

មន្ត្រីប៉ូលិស បានឲ្យដឹងថា ពលករចំណាកស្រុកជាច្រើនបន្ថែមទៀត មកពីមីយ៉ាន់ម៉ា, កម្ពុជា និងឡាវ ត្រូវបានគេជឿថា ​បានធ្វើតាមច្បាប់ បន្ទាប់ពីច្បាប់ប្រតិបត្តិ របស់ថៃ ដែលបានបង្កើនប្រាក់ពិន័យ ចំពោះការជួល ពលករចំណាកស្រុកខុសច្បាប់។ នយោជកណាម្នាក់ នៅក្នុងប្រទេសថៃ ដែលបានរកឃើញថា បានជួលពលករចំណាកស្រុកខុសច្បាប់ម្នាក់ គឺរងការពិន័យអតិបរមា ៨០០,០០០បាត (ប្រមាណ២២,៨៥៧ដុល្លារអាមេរិក) នេះបើយោងទៅតាមច្បាប់ថ្មី។

ក្រុមពលករមីយ៉ាន់ម៉ាទាំងនោះ គឺត្រូវបានគេរំពឹងថា នឹងវិលត្រឡប់មកធ្វើការនៅថៃវិញ បន្ទាប់ពីបានបំពេញឯកសារស្របច្បាប់ ពីក្រុមអាជ្ញាធរមីយ៉ាន់ម៉ា។

សូមជម្រាបថា មានក្រុមពលករមីយ៉ាន់ម៉ា ប្រមាណ២លានទៅ៣លាននាក់ ដែលកំពុងធ្វើការនៅប្រទេសថៃ កាលពីពេលមុន ហើយវាមិនច្បាស់នោះទេ ថានឹងមានពលករប៉ុន្មាននាក់ ដែលបានរងការប៉ះពាល់ ដោយច្បាប់ថ្មីនេះ៕