(កែប)៖ បុរសម្នាក់ដែលបានបន្លំខ្លួនជាព្រះសង្ឃ ដើរបិណ្ឌបាត្រដើម្បីទិញថ្នាំញៀន ហើយត្រូវកម្លាំងនគរបាលខេត្តកែបចាប់ខ្លួន ពេលនេះត្រូវបានសាលាដំបូងខេត្តកំពត បង្គាប់ឲ្យឃុំខ្លួន ក្រោមបទចោទប្រកាន់ចំនួន៣។
តាមដីកាបង្គាប់ឲ្យឃុំខ្លួន ដែលអង្គភាពទទួលបាននៅព្រឹកថ្ងៃទី០១ ខែកក្កដា ឆ្នាំ២០១៧នេះ ដែលចេញដោយ លោក លាង ឈន ចៅក្រមស៊ើបសួរសម្រេចដាក់ជននេះ ស្ថិតក្រោមការពិនិត្យពីបទ ប្រើប្រាស់សារធាតុញៀន, ស្លៀកដណ្ដប់បែបព្រះពុទ្ធសាសនាដោយគ្មានសិទ្ធិ និងប្រើប្រាស់ឯកសារក្លែង។
សូមបញ្ជាក់ថា ជនសង្ស័យដែលបន្លំជាព្រះសង្ឃនេះ ត្រូវបានចាប់ខ្លួននៅថ្ងៃទី២៨ ខែមិថុនា ឆ្នាំ២០១៧ ក្រោយរឿងគ្រោះថ្នាក់ចរាចរណ៍។ លោកឧត្តមសេនីយ៍ទោ អ៊ីង សំអុល ស្នងការនគរបាលខេត្តកែប បានបញ្ជាក់ថា តាមការសាកសួរ ឈ្មោះ ម៉ី ងួន បានឆ្លើយថា រូបគេបន្លំខ្លួនធ្វើជាសង្ឃដើរបិណ្ឌបាត្រយកលុយ ទិញគ្រឿងញៀនជក់តាំងពីដើមខែមិថុនា ឆ្នាំ២០១៧ ដែលចាប់ផ្តើមធ្វើសកម្មភាព នៅខេត្តបន្តាយមានជ័យ, បាត់ដំបង, សៀមរាប, កំពង់ធំ, កំពង់ឆ្នាំង, ភ្នំពេញ, កំពង់ស្ពឺ, ព្រះសីហនុ, កំពត, កែប ក្នុងរយៈពេល១៥ថ្ងៃ បានប្រាក់ចំនួន ៥,០៩០,០០០រៀល។
លោកស្នងការបន្ថែមថា តាមចម្លើយសារភាព នៅខេត្តកែបរយៈពេលមួយព្រឹក គេដើរបិណ្ឌបាត្របានប្រាក់ ២៦០,០០០រៀល ហើយក៏ត្រូវឃាត់
ខ្លួនតែម្ដង។ ក្នុងនោះបក្ខពួកគេមានគ្នា៤នាក់ មកខេត្តកែប២នាក់ និងចុះធ្វើសកម្មភាពនៅទីរួមខេត្តកំពត២នាក់៕
