(កណ្ដាល)៖ ស្ត្រីចំណាស់ម្នាក់ស្លាប់ភ្លាមៗ ក្រោយបុរសម្នាក់បើករថយន្តបុកម៉ូតូពេញទំហឹង កាលពីរសៀលថ្ងៃទី២៩ ខែមិថុនា នៅចំណុចផ្លូវជាតិលេខ៥ ចន្លោះគីឡូម៉ែត្រលេខ១៩និង២០ ភូមិពោធិមង្គល ឃុំព្រែកតាទែន ស្រុកពញាឮ ។
របាយការណ៍នគរបាលស្រុកពញាឮ បង្ហាញថា ស្ត្រីរងគ្រោះឈ្មោះ វ៉ាន់ ស៊ីនួន អាយុ៥៨ឆ្នាំ ។ ចំណែកជនបង្កឈ្មោះ វ៉ាន់ បូម៉ាត់សាលី អាយុ២៦ឆ្នាំ បើកបររថយន្តម៉ាកVIGOពណ៌ទឹកមាស ពាក់ស្លាកលេខភ្នំពេញ 2R-3281 ។
លោក វ៉ែន សុវិន ស្នងការរងនគរបាលខេត្តកណ្ដាលទទួលសណ្តាប់ធ្នាប់និងចរាចរណ៍ បញ្ជាក់ថា ជនបង្កបានរត់គេចខ្លួនបាត់ហើយ មុនពេលសមត្ថកិច្ចចុះដល់កន្លែងកើតហេតុ ពោលគឺពុំមានការឃាត់ខ្លួនជនបង្ក ដូចការផ្សព្វផ្សាយទេ ។
ចំណែកលោក ទុយ សុភាព អធិការរងនគរបាលស្រុកពញាឮ ថ្លែងថា ក្រោយហេតុការណ៍នេះ ជនបង្កបានរត់ខ្លួន ដោយបន្សល់ទុករថយន្ត និងមនុស្សពីរនាក់ នៅកន្លែងកើតហេតុ ។ បច្ចុប្បន្ននគរបាលកំពុងបន្តនីតិវិធី៕
