BREAKING NEWS: គ.ជ.ប ទុកតំណែងអគ្គលេខាធិការរងឲ្យលោក នី ចរិយា ដដែល តែការអនុញ្ញាតឲ្យចូលធ្វើការវិញឬអត់ មិនទាន់សម្រេច (Video inside)
29-06-2017 21:46
(ភ្នំពេញ)៖ លោក នី ចរិយា ដែលសាលាដំបូងរាជធានីភ្នំពេញ ទើបសម្រេចដោះលែងឲ្យនៅក្រៅឃុំនៅល្ងាចថ្ងៃទី២៩ ខែមិថុនា ឆ្នាំ២០១៧ ជាមួយមន្រ្តីសមាគមអាដហុក៤រូបទៀតនោះ នៅមានតំណែងជាអគ្គលេខាធិការរង នៃគណៈកម្មាធិការជាតិរៀបចំការបោះឆ្នោត (គ.ជ.ប) រួមទាំងប្រាក់ខែដូចមុនដដែល ប៉ុន្តែការអនុញ្ញាតឲ្យជនត្រូវចោទរូបនេះ ចូលបម្រើការវិញ ឬអត់ គ.ជ.ប មិនទាន់សម្រេចនៅឡើយទេ។ នេះបើតាមលោក ហង្ស ពុទ្ធា អ្នកនាំពាក្យ គ.ជ.ប ថ្លែងប្រាប់អង្គភាព Fresh News នៅមុននេះបន្តិច។
លោក ហង្ស ពុទ្ធា បានថ្លែងយ៉ាងដូច្នេះថា «គ.ជ.ប កំពុងត្រួតពិនិត្យលើទិដ្ឋភាពច្បាប់នៅឡើយ បើតំណែង គឺទុកយូរណាស់ហើយ ប៉ុន្តែបើការចូលធ្វើការវិញ ឬអត់ យើងអត់ទាន់សម្រេចទេ»។
លោក ហង្ស ពុទ្ធា បានបញ្ជាក់ថា ដរាបណាតុលាការមិនទាន់កាត់ទោសលោក នី ចរិយា ហើយដីកាតុលាការមិនទាន់ចូលជាស្ថាពរនោះ គ.ជ.ប នៅតែរក្សាតំណែងជាអគ្គលេខាធិការរងទុកឲ្យលោកដដែល ហើយប្រាក់ខែរបស់លោក ក៏នៅតែបើករៀងរាល់ខែជូនទៅក្រុមគ្រួសារជាធម្មតា។
សូមបញ្ជាក់ថា លោក នី ចរិយា ត្រូវបានតុលាការចោទប្រកាន់ ពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និងមាត្រា៥៤៨ នៃក្រមព្រហ្មទណ្ឌ។ ដោយឡែកលោក នី សុខា ប្រធានផ្នែកស៊ើបអង្កេតសមាគមអាដហុក លោក យី សុខសាន្ត អនុប្រធានសមាគមអាដហុក លោក ណៃ រ៉ង់ដា អនុប្រធានសមាគមអាដហុក និងលោកស្រី លឹម មុន្នី មន្ត្រីជាន់ខ្ពស់សមាគមអាដហុក ត្រូវបានព្រះរាជអាជ្ញារងអមសាលាដំបូងរាជធានីភ្នំពេញ លោក គុជ គឹមឡុង ចោទពីបទសូកប៉ាន់សាក្សី តាមមាត្រា៥៤៨ នៃក្រមព្រហ្មទណ្ឌ។
ជនត្រូវចោទទាំង៥រូបនេះ ត្រូវបានតុលាការរាជធានីភ្នំពេញ រកឃើញថា បានបញ្ចុះបញ្ចូលលួងលោម កញ្ញា ខុម ចាន់តារាទី ហៅស្រីមុំ មិនឲ្យនិយាយការពិតប្រាប់សមត្ថកិច្ច ចំពោះរឿងអាស្រូវផ្លូវភេទរបស់លោក កឹម សុខា ដែលបច្ចុប្បន្នជាប្រធានគណបក្សសង្គ្រោះជាតិ៕
