(ភ្នំពេញ)៖ អ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ បានបញ្ជាក់ប្រាប់បណ្តាញព័ត៌មាន Fresh News ឱ្យដឹងនៅយប់ថ្ងៃទី២៩ ខែមិថុនា ឆ្នាំ២០១៧នេះថា ករណីដោះលែង មន្រ្តីអាដហុក និងអគ្គលេខាធិការរង គ.ជ.ប ទាំង៥នាក់នាពេលនេះ គឺជាការសម្រេចឱ្យនៅក្រៅឃុំជាបណ្តោះអាសន្ន តែប៉ុណ្ណោះ ចំណែកនីតិវិធីរបស់តុលាការ ចំពោះពួកគាត់ នឹងនៅតែបន្តដដែល។ សំណុំរឿងពួកគាត់ នឹងត្រូវយកទៅជំនុំជម្រះ ក្នុងពេលឆាប់ៗនេះ។
លោក អ៊ី រិន អ្នកនាំពាក្យសាលាដំបូងរាជធានីភ្នំពេញផ្នែកចៅក្រម បានថ្លែងបញ្ជាក់យ៉ាងដូច្នេះថា «ចៅក្រមស៊ើបសួរ បានបញ្ចប់ការស៊ើបសួរ ហើយបានសម្រេចបញ្ចប់ការឃុំខ្លួនបណ្តោះអាសន្ន លើអ្នកទាំង៥ ហើយសំណុំរឿងរបស់ពួកគាត់ នៅតែបន្តតាមនីតិវិធីដដែល»។
សូមបញ្ជាក់ថា មន្រ្តីអាដហុក និងគ.ជ.ប ទាំង៥នាក់នោះ ត្រូវបាន លោក ធាម ច័ន្ទពិសិដ្ឋ ចៅក្រមស៊ើបសួរនៃសាលាដំបូងរាជធានីភ្នំពេញ ចេញដីកាបង្គាប់ឱ្យនៅក្រៅឃុំ នាល្ងាចថ្ងៃទី២៩ ខែមិថុនានេះ ហើយពួកគេបានចាកចេញពីពន្ធនាគារទៅជួបក្រុមគ្រួសារបន្ទាប់ពីដីកាតុលាការទៅដល់ពន្ធនាគារ។
មន្រ្តីអាដហុក និងគ.ជ.ប ទាំង៥នាក់នោះ រួមមាន លោក នី សុខា ប្រធានផ្នែកស៊ើបអង្កេតសមាគមអាដហុក លោក យី សុខសាន្ត អនុប្រធានសមាគមអាដហុក លោក ណៃ រ៉ង់ដា អនុប្រធានសមាគមអាដហុក និង លោកស្រី លឹម មុន្នី មន្ត្រី ជាន់ខ្ពស់សមាគមអាដហុក ត្រូវបានលោកព្រះរាជអាជ្ញារង គុជ គឹមឡុង ចោទពីបទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ឌ។ ដោយឡែកលោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោត ត្រូវបានតុលាការចោទប្រកាន់ពីបទសមគំនិតក្នុងអំពើសូកប៉ាន់សាក្សី តាមមាត្រា២៩ និង មាត្រា ៥៤៨ នៃក្រមព្រហ្មទណ្ឌ។
ជនសង្ស័យទាំងនេះ ត្រូវបានតុលាការរកឃើញថា បានបញ្ចុះបញ្ចូល ឬលួងលោម កញ្ញា ខុម ចាន់តារាទី ហៅស្រីមុំ មិនឲ្យនិយាយការពិតដល់សមត្ថកិច្ច ចំពោះរឿងអាស្រូវផ្លូវភេទរបស់លោក កឹម សុខា ប្រធានស្តីទីគណបក្សសង្គ្រោះជាតិ៕
