(ភ្នំពេញ)៖ អាជ្ញាធរជាតិប្រយុទ្ធប្រឆាំងគ្រឿងញៀន បានបង្ហាញប្លង់សាងសង់ នៃមជ្ឈមណ្ឌលផ្តល់សេវាព្យាបាលដោយស័្មគ្រចិត្ត និងផ្នែកសហគមន៍ដល់អ្នកញៀនគ្រឿងញៀន ដែលគ្រោងនឹងសាងសង់ក្នុងតម្លៃពី៥-៦លានដុល្លារអាមេរិក លើផ្ទៃដី២០ហិចតា ក្នុងនោះមានទាំងអគាររដ្ឋបាល មន្ទីរពេទ្យ អគារស្នាក់នៅសម្រាប់ស្រ្តី-បុរស អគារបន្សាបគ្រឿងញៀន និងហេដ្ឋារចនាសម្ព័ន្ធជាដើម មានទីតាំងស្ថិតនៅភូមិឫទ្ធី២ ឃុំកែវផុស ស្រុកស្ទឹងហាវ ខេត្តព្រះសីហនុ។
ប្លង់មជ្ឈមណ្ឌលនេះ ត្រូវបានបង្ហាញឡើងដោយលោក កៅ ខុនដារ៉ា អនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានគណៈកម្មការកសាងមជ្ឈមណ្ឌលផ្តល់សេវាព្យាបាលដោយស័្មគ្រចិត្ត និងផ្នែកសហគមន៍ដល់អ្នកញៀនគ្រឿងញៀន ក្នុងកិច្ចប្រជុំជាមួយអនុប្រធាន និងសមាជិកគណៈកម្មការកសាងមជ្ឈមណ្ឌល នាថ្ងៃទី២៩ ខែមិថុនា ឆ្នាំ២០១៧។
លោក កៅ ខុនដារ៉ា បានថ្លែងថា មជ្ឈមណ្ឌលបន្សាបគ្រឿងញៀនដ៏ធំនេះ នឹងបើកការដ្ឋានសាងសង់នៅខែកក្កដា ឆ្នាំ២០១៧ ខាងមុខ ហើយរាជរដ្ឋាភិបាល ក៏កំពុងបន្តស្វែងរកជំនួយពីសប្បុរសជនជាតិ-អន្តរជាតិ និងបណ្តាប្រទេសជាមិត្ត ដើម្បីយកមកទ្រទ្រង់ក្នុងការសាងសង់មជ្ឈមណ្ឌលនេះផងដែរ៕
