​(កំពង់ឆ្នាំង)៖ ​លោក កែវ ពៅ ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំង នៅថ្ងៃទី២៧ ខែមិថុនា ឆ្នាំ២០១៧នេះ ដឹកនាំក្រុមការងារជូសជុល និងថែទាំផ្លូវ បង្កើនការងារ​ដោយដាក់លូរំដោះទឹក នៅលើកំណាត់ផ្លូវចំនួន៣ខ្សែគឺ​កំណាត់ផ្លូវជាតិលេខ៥, ផ្លូវលេខ៥៣ និងផ្លូវលេខ១៥៣A​។

ប្រធានមន្ទីរសាធារណការ និងដឹកជញ្ជូនខេត្ត បានបញ្ជាក់ថា​ សម្រាប់គំរោងថែនាំផ្លូវខេត្តកំពង់ឆ្នាំង នៅក្នុងឆ្នាំ២០១៧នេះ សម្រេចជួសជុល និងថែទាំលើផ្លូវជាប្រចាំ​ផ្លូវគ្រួសក្រហមចំនួន១០ខ្សែ និងផ្លូវចាក់កៅស៊ូចំនួន៧ខ្សែ។

បច្ចុប្បន្ននេះ ក្រុមការងារជំនាញ បានកំពុងពង្រឹងនិងជួសជុលថែទាំផ្លូវ​ដោយភាពទទួលខុសត្រូវខ្ពស់ ជាក់ស្តែងពេញមួយឆ្នាំ២០១៦កន្លងទៅនេះ មន្ទីរសាធារណការ មានក្រុមការងារចំនួន៦ក្រុម លើផ្លូវជាតិលេខ៥​ និងមួយ​ក្រុម​លើផ្លូវគ្រួសក្រហម បានសម្រេចកិច្ចការធំៗជាច្រើន ហើយ​បានបន្តការងារជាប្រចាំ​ដើម្បីថែទាំផ្លូវថ្នល់ ក្នុងក្រុងកំពង់ឆ្នាំងចំនួន៨ខ្សែ ដែលមានប្រវែង១៥គីឡូម៉ែត្រ និង៧៥០ម៉ែត្រ បន្តលុបសំបុកមាន់ និងកាប់ព្រៃតាមចិញ្ចើមផ្លូវ ព្រមទាំងតម្រង់ស្លាកសញ្ញា បង្គោលសុវត្ថិភាព និងត្រួតពិនិត្យស្ពានផ្លូវ​លើកំណាត់ផ្លូវចំនួន១១ខ្សែ ក្នុងនោះរួមមាន ផ្លូវចាក់កៅស៊ូចំនួន៦​ខ្សែ មានផ្លូវជាតិលេខ៥ ផ្លូវជាតិលេខ៥៣C ផ្លូវលេខ១៥០ ផ្លូវលេខ១៥៣A ផ្លូវលេខ១៥០A និងផ្លូវលេខ១៥៣  ផ្លូវគ្រួសក្រហមចំនួន៥ខ្សែ​។

បន្ថែមពីនេះ លោក កែវ ពៅ បានថ្លែងថា មន្ទីរសាធារណការ និងដឹកជញ្ជូនខេត្តកំពង់ឆ្នាំង បានបន្តទទួលបានគម្រោថែទាំផ្លូវនាឆ្នាំ២០១៧នេះ ដែលសម្រួលចរាចរណ៍របស់បងប្អូនប្រជាពលរដ្ឋអ្នកធ្វើដំណើរ តាមយាន្តជំនិះគ្រប់ប្រភេទ ហើយមន្ត្រីជំនាញបានតាមដានយ៉ាងដិតដល់ និងត្រួតពិនិត្យជារៀងរាល់ថ្ងៃ​៕