(ព្រះវិហារ)៖ លោក មាស សុភា សមាជិកអចិន្ត្រៃយ៍គណៈកម្មាធិការកណ្តាល និងជាប្រធានក្រុមការងារថ្នាក់កណ្តាលចុះជួយខេត្តព្រះវិហារ បានថ្លែងថា គណបក្សប្រជាជនកម្ពុជា បានទទួលការគាំទ្រច្រើនពីប្រជាពលរដ្ឋ បានទទួលសំឡេងឆ្នោតឈ្នះគេ គ្រប់ការបោះឆ្នោតទាំងអស់។
បន្ថែមពីនេះលោក មាស សុភា បានធ្វើការណែនាំ និងជំរុញឲ្យក្រុមការងារគណបក្សទាំងអស់នៅតាមមូលដ្ឋាន ត្រូវចុះជាប់ជាមួយប្រជាពលរដ្ឋ និងត្រូវធ្វើអំពើល្អជាមួយ ប្រជាពលរដ្ឋ ដោយមិនប្រកាន់និន្នការគណបក្សនយោបាយឡើយ។
ការថ្លែងយ៉ាងដូច្នេះ ត្រូវបានធ្វើឡើងនៅព្រឹកថ្ងៃទី២៧ ខែមិថុនា ឆ្នាំ២០១៧នេះ ក្នុងឱកាសលោកអញ្ជើញជាអធិបតី ពិធីអបអរសារទរខួបអនុស្សាវរីយ៍លើកទី៦៦ ថ្ងៃបង្កើតគណបក្សប្រជាជនកម្ពុជា (២៨/០៦/១៩៥១-២៨/០៦/២០១៧)។ ក្នុងនោះក៏មានការចូលរួមពីលោក សួស យ៉ារ៉ា សមាជិកកណ្តាលគណបក្សប្រជាជនកម្ពុជា និងជាអ្នកតំណាងរាស្ត្រមណ្ឌលព្រះវិហារ, លោក អ៊ុន ចាន់ដា ប្រធានគណៈកម្មាធិការគណបក្សប្រជាជនកម្ពុជាខេត្ត ព្រមទាំងសមាជិកក្រុមការងារថ្នាក់កណ្តាល ក្រុមការងារថ្នាក់ខេត្ត ស្រុក ក្រុងជាច្រើនរូបទៀត។
លោក មាស សុភា ក៏បាននាំនូវការផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា, សម្តេច ហេង សំរិន ប្រធានកិត្តិយស, សម្ដេច សាយ ឈុំ និងសម្ដេចក្រឡាហោម ស ខេង អនុប្រធានគណបក្ស ដល់សមាជិកគណបក្សប្រជាជនកម្ពុជាទូទាំងខេត្តព្រះវិហារផងដែរ។
បន្ថែមពីនេះ លោកបញ្ជាក់ថា ថ្ងៃនេះគឺជាថ្ងៃមួយដែលអ្នកទាំងអស់គ្នា ពិតជាមានក្តីសោមនស្សរីករាយ ក្នុងនាមជាថ្នាក់ដឹកនាំ ជាសមាជិកគណបក្សប្រជាជនកម្ពុជានៅខេត្តព្រះវិហារ បានចូលរួមអបអរសារទរខួបអនុស្សាវរីយ៍លើកទី៦៦ ថ្ងៃបង្កើតគណបក្សប្រជាជនកម្ពុជា។
លោកបន្តថា រយៈពេល៦៦ឆ្នាំ គឺជារយៈពេលដ៏យូរដែលគណបក្សប្រជាជនកម្ពុជាបានកើតឡើង ដូច្នេះគណបក្សប្រជាជនកម្ពុជា គឺជាគណបក្សដែលមានវ័យចាស់ទុំផ្នែកនយោបាយ បានរួមសុខរួមទុក្ខជាមួយប្រជាពលរដ្ឋ រំដោះប្រទេសជាតិ និងប្រជាពលរដ្ឋចេញពីរបបប្រលយ័ពូជសាសន៍ ប៉ុល ពត និងដឹកនាំប្រទេសឲ្យមានសន្តិភាព និងការអភិវឌ្ឍលើគ្រប់វិស័យមកដល់សព្វថ្ងៃនេះ។
ជាមួយគ្នានេះផងដែរ លោក អ៊ុន ចាន់ដា ក៏បានជំរាបជូនឲ្យថ្នាក់ដឹកនាំគណបក្សប្រជាជនកម្ពុជាតាមក្រុង ស្រុកទាំង៨ នៅក្នុងខេត្ត ត្រូវរៀបចំធ្វើពិធីខួបកំណើតគណបក្សនៅតាមក្រុង ស្រុក រៀងៗខ្លួន ចាប់ពីថ្ងៃទី២៨ ខែមិថុនា ឆ្នាំ២០១៧នេះ។
នៅក្នុងឱកាសនោះ លោក អ៊ុន ចាន់ដា ក៏បានថ្លែងនូវការអរគុណដល់ក្រុមការងារគណបក្សទាំងអស់ ដែលបានខិតខំប្រឹងប្រែង ធ្វើឲ្យគណបក្សប្រជាជនកម្ពុជានៅខេត្តព្រះវិហារ ទទួលបានជោគជ័យនៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ កាលពីថ្ងៃទី០៤ ខែមិថុនាកន្លងទៅថ្មីៗនេះ ហើយត្រូវខិតខំបន្ថែមទៀត ដើម្បីទទួលបានជោគជ័យការបោះឆ្នោតឆ្នាំ២០១៨ខាងមុខនេះ៕
