(កណ្ដាល)៖ ប្រជាពលរដ្ឋ៤គ្រួសារ រស់នៅក្នុងភូមិក្តីកណ្តាល ឃុំសារិកាកែវ ស្រុកល្វាឯម ខេត្តកណ្តាល បានចោទប្រកាន់ជនខិលខូចមួយក្រុម បានឃុបឃិតជាមួយអាជ្ញាធរ ឃុំស្វាយជ្រុំ ចេញឯកសាររំលោភយកដីអនុផលពួកគាត់ ចំនួន១០ហិកតា ស្ថិតនៅចំណុចរោងគោ ភូមិព្រែកបង្កង ឃុំព្រែកតាកូវ ស្រុកខ្សាច់កណ្តាល ខេត្តកណ្តាល។
លោក នុត ប៊ុនធែល ម្ចាស់ដីម្នាក់ក្នុងចំណោមពលរដ្ឋ៤គ្រួសារខាងលើ បានឲ្យ Fresh News ដឹងថា ដីអនុផលទំហុំសរុប១០ហិកតាខាងលើ ត្រូវបានគ្រួសារពួកគាត់កាន់កាប់អាស្រ័យ ផលដាំឈូកលក់តាំងពីឆ្នាំ១៩៩១ ដោយមាការទទួលស្គាល់ និងចេញលិខិតកាន់កាប់ ដោយលោកមេឃុំព្រែកតាកូវ តាំងពីឆ្នាំ១៩៩១មក។ លោកថា ដោយសារតម្លៃឈូកធ្លាក់ចុះ ពួកគាត់បានផ្អាករបរដាំឈូកនៅលើដីនោះ ប្រមាណជា៤ទៅ៥ឆ្នាំចុងក្រោយនេះ ស្រាប់តែមានជនខិលខូចឈ្មោះ កៅ សុខន រស់នៅភូមិព្រៃល្វា ឃុំព្រែកថ្កូវ ស្រុកខ្សាច់កណ្តាល និងបក្សពួក៦នាក់ទៀត យកដីនេះទៅលក់ឲ្យភាគីទី៣ ដោយមានការទទួលស្គាល់ ពីអាជ្ញាធរឃុំស្វាយជ្រុំទៅវិញ កាលពីថ្ងៃទី២៧ ខែកុម្ភៈ ឆ្នាំ២០១៧កន្លងទៅ និងបាននាំគ្នាមកលួចកាច់បង្គោល របងព្រំដីពួកគាត់ជាបន្តបន្ទាប់ ទើបង្ករឲ្យមានជម្លោះកើតឡើង មកទល់បច្ចុប្បន្ន។
ពាក់ព័ន្ឋករណីនេះដែរ លោកស្រី យឺន សុខន ដែលមានដីនៅជាប់ព្រំដីជម្លោះខាងលើនោះ អះអាងថា កន្លងមកជនខិលខូចឈ្មោះ កៅ សុខន ខាងលើ និងឈ្មោះ ហយ វ៉ៃ រួមនឹងបក្សពួកមួយចំនួនទៀត ក៏បានយកដីរបស់ពួកគាត់ចំនួន១៦គ្រួសារ មានទំហំប្រហែល២០ហិកតា ដែលសម្តេចនាយករដ្ឋមន្រ្តីចេញស.ជ.ណ តាមរយៈទីស្តីការគណៈរដ្ឋមន្រ្តី កាត់ឲ្យពួកគាត់ កាលពីថ្ងៃទី២៨ ខែមេសា ឆ្នាំ២០០៨ យកទៅឲ្យឈ្មោះ ប៊ុន រ៉ាវុធ មន្រ្តីជាន់ខ្ពស់ក្រសួងមហាផ្ទៃ ទើបបង្កជាជម្លោះមកទល់សព្វថ្ងៃផងដែរ។ លោកស្រីថា ឈ្មោះ កៅ សុខន និងឈ្មោះ ហយ វ៉ៃ មិនមានប្រវត្តិច្បាស់លាស់នោះទេ ហើយចេះតែដើរយកដីគេ លក់ទៅឲ្យភាគីទី៣. ដោយមានអាជ្ញាធរស្រុកខ្សាច់កណ្តាល នៅពីក្រោយ ទើបបង្កឲ្យមានទំនាស់ដីធ្លីបន្ត ពីម្នាក់ទៅម្នាក់ទៀតយ៉ាងដូច្នេះ ហើយជានិច្ចជាកាលភាគីទីបីឈ្មោះ ប៊ុន រ៉ាវុធ តែងយកកម្លាំងសម្ថកិច្ច និងយកអាវុធមកគម្រាមកំហែងពួកគាត់ ជាបន្តបន្ទាប់ ដើម្បីដណ្តើមយកដីនោះ។
ចំណែកលោក កៅ សុខុន ដែលរងការចោទប្រកាន់ពីពលរដ្ឋបានអះអាងថា ខ្លួននិងបក្សពួកចំនួន៦គ្រួសារផ្សេងទៀត បានកាន់កាប់ និងអាស្រ័យផលលើដីទំហុំ១០ហិកតានេះ តាំងពីឆ្នាំ១៩៩៣ មក ហើយកន្លងមកអាជ្ញាធរឃុំស្វាយជ្រុំ បានចេញលិខិតទទួលស្គាល់ការទិញលក់ របស់ពួកគាត់នៅក្នុងឆ្នាំ២០១៧នេះទៀតផង។
ពាក់ព័ន្ធករណីនេះ លោក ជា ម៉ាច មេឃុំព្រែកតាកូវ ក្នុងស្រុកខ្សាច់កណ្តាល ខេត្តកណ្តាលបានបញ្ជាក់ថា ប្រវត្តិដីនោះ គឺពលរដ្ឋ៤គ្រួសារ រស់នៅលើភូមិក្តីកណ្តាល ឃុំសារិកាកែវ ស្រុកល្វាឯម បានកាន់កាប់និងអាស្រ័យផល តាំងពីឆ្នាំ១៩៩១ប្រាកដមែន។ លោកក៏មិនដែលស្គាល់ឈ្មោះ កៅ សុនខុន ដែលរងការចោទប្រកាន់ខាងលើនោះ មានប្រវត្តិយ៉ាងណា ហើយរស់នៅទីណាដែរ។ ចំណែកការទិញលក់ទទួលស្គាល់ ដោយមេឃុំស្វាយជ្រុំ នៅឆ្នាំ២០១៧នេះ លោកក៏មិនយល់ដែរ ព្រោះដីនេះមានទីតាំង ក្នុងដែនរដ្ឋបាលឃុំព្រែកតាកូវឯណេះទេ។
ចំណែកលោក ហ៊ុន កយ មេឃុំស្វាយជ្រុំ មានប្រសាសន៍ថា ដីជម្លោះចំណុចរោងគោនោះ ស្ថិតក្នុងដែនរដ្ឋបាលឃុំស្វាយជ្រុំ មិនមែនឃុំព្រែកថ្កូវនោះទេ ចំណែកការចេញលិខិត ទទួលស្គាល់ឆ្នាំ១៩៩១ ដោយមេឃុំព្រែកតាកូវនោះ លោកមិនដឹងថា ជាដីនៅចំណុចណានោះទេ។
យ៉ាងណាក៏ដោយ ប្រជាពលរដ្ឋរងគ្រោះដីធ្លីទាំងពីរក្រុមខាងលើ បានអំពាវនាវដល់អាជ្ញាធរពាក់ព័ន្ធ ពិសេសក្រសួងដែនដីនគរូបនីយកម្ម ដែលមានលោកទេសរដ្ឋមន្រ្តី ជា សុផារ៉ា ជារដ្ឋមន្រ្តី ទទួលបានដាវអាជ្ញាសឹក ពីសម្តេចនាយករដ្ឋមន្រ្តី មេត្តាជួយរកយុត្តិធម៌ជូនពួកគាត់ឲ្យ បានឆាប់រហ័សផង ដើម្បីពួកគាត់បានអាស្រ័យផល និងរួចផុតពីការគំរាមកំហែង ពីបុគ្គលមានអំណាច ដែលយកកម្លាំងប្រដាប់អាវុធមកគំរាមពួកគាត់។ ពលរដ្ឋអះអាងថា ក្រសួងគួរដោះស្រាយឲ្យបានឆាប់រហ័ស បើពួកគាត់ខុសថាខុស ពួកគាត់ត្រូវថាត្រូវ ហើយធ្វើប្លង់ឲ្យពួកគាត់កាន់កាប់ឲ្យឆាប់រហ័ស ជៀសវាងការគំរាមរំលោភយកពីអ្នកដទៃ៕
លោក កៅ សុខន ដែលរងការចោទប្រកាន់ពីប្រជាពលរដ្ឋ
ប្រជាពលរដ្ឋរងគ្រោះ
ទីតាំងដីដែលមានទំនាស់
ប្រជាពលរដ្ឋរងគ្រោះ
