(តាកែវ)៖ ទីតាំងផលិតសសៃគុយទាវបាញ់កាញ់២កន្លែង នៅក្នុងស្រុកត្រាំកក់ ត្រូវបានមន្រ្តីកាំកុងត្រូលខេត្តតាកែវ សហការជាមួយមន្រ្តីមន្ទីរពាណិជ្ជកម្មខេត្តតាកែវ ចុះទៅបិតនៅរសៀលថ្ងៃទី១៤ ខែមិថុនា ឆ្នាំ២០១៧នេះ។
ការចុះបិទនេះធ្វើឡើងបន្ទាប់ ពីមន្រ្តីកាំកុងត្រូលបានចុះទៅត្រួតពិនិត្យនៅតាមផ្សារ ដោយរកឃើញសាធាតុគីមីបូរ៉ាក់ នៅលើសសៃគុយទាវបាញ់កាញ់ ដែលទីតាំងទាំង២នេះ បានផលិតយកទៅលក់នៅលើទីផ្សារ។
លោក ប៉ោ លាងគង់ ដែលដឹកនាំកម្លាំងជំនាញចុះយុទ្ធនាការនេះ បានឲ្យដឹងថា «ក្នុងការចុះត្រួតពិនិត្យនៅផ្សារអង្គតាសោម មន្រ្តីយើងបានរកឃើញសសៃគុយទាវ ដែលមានសារធាតុគីមីប៉ូរ៉ាក់ នៅលើសសៃគុយទាវបាញ់កាញ់ ហើយយើងបានធ្វើការដកហូតមិនឲ្យចរាចរលើទីផ្សារ និងបន្តទៅបិទទីតាំងផលិតគូយទាវនេះថែមទៀតផង»។
លោកបានបញ្ជាក់ថា សរសៃគុយទាវប្រមាណ៥០គីឡូនេះ ជំនាញនឹងធ្វើការដុតកម្ទេចចោលតែម្តង ព្រមទាំងបានធ្វើកិច្ចសន្យាជាមួយ អាជីវករមិនឲ្យបន្តលក់សសៃគុយទាវ ដែលមានសាធាតុហាមឃាត់នេះបន្តទៅទៀតទេ ព្រោះវាប៉ះពាល់ខ្លាំងដល់សុខភាពរបស់អ្នកប្រើប្រាស់។
លោកប្រធានសាខាកាំកុងត្រូលខេត្តបន្តថា សរសៃគុយទាវបាញ់កាញ់ ដែលផ្ទុកសារធាតុគីមីប៉ូរ៉ាក់នេះ វាពិតជាបង្កគ្រោះថ្នាក់ដល់អ្នកបរិភោគ ហើយវាវត្តន៍ទៅរកជំងឺដូចជា ខ្សោយក្រលៀន រលាកក្រពះ ពោះវៀន និងប្រសិនជាអ្នកផលិតដាក់សារធាតុគីមីនេះច្រើនពេក វានឹង បណ្តាលឲ្យស្លាប់ថែមទៀតផង៕
