(កោះកុង)៖ ដើម្បីអនុវត្តតាមបទបញ្ជារបស់ អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម ស្វែងរកសារធាតុគីមីផលិតផល គ្រឿងផ្សំរស (ប្រេងខ្យង Oyster Sauce) ម៉ាក់ Yuan's ជាក់ស្ដែងនៅថ្ងៃទី១៤ ខែមិថុនា ឆ្នាំ២០១៧នេះ សាខាកាំកុងត្រូលខេត្តកោះកុង បានចុះត្រួតពិនិត្យមើលរាល់មុខទំនិញ ដែលអាជីវករដាក់តាំងលក់នៅតាមគេហដ្ឋាន និងក្នុងផ្សារដងទង់។
ប្រតិបត្តិការនេះ ដឹកនាំដោយ លោក សម ចិត្រា អនុប្រធានសាខាកាំកុងត្រូលខេត្តកោះកុង សហការជាមួយមន្រ្តីពាណិជ្ជកម្ម មន្រ្តីសាលាក្រុង និងសមត្ថកិច្ចពាក់ព័ន្ធផ្សេងទៀតផង។
លោក សម ចិត្រា អនុប្រធានប្រធានសាខាកាំកុងត្រូលខេត្ត បានឲ្យដឹងថា ការចុះប្រតិបត្តិការធ្វើឡើងដោយផ្អែក ទៅលើច្បាប់ស្តីពី ការគ្រប់គ្រងគុណភាពសុវត្ថិភាពលើផលិតផល និងសេវាកិច្ចសម្របសម្រួលពាណិជ្ជកម្ម តាមរយៈគ្រប់គ្រងហានិភ័យ ត្រួតពិនិត្យជា លក្ខណៈរូបវ័ន្តសម្ធិផលម្ហូបអាហារ ត្រួតពិនិត្យទៅលើស្លាកសញ្ញាសំបកវេចខ្ចប់ និងថ្ងៃខែឆ្នាំផលិត របស់ក្រុមហ៊ុននីមួយៗ ដែលធ្វើការ នាំចេញចែកនៅតាមទីផ្សារនានា។
លោក សម ចិត្រា បានបញ្ជាក់ថា ថ្ងៃនេះក្រុមការងារ របស់លោកបានទទួលបទបញ្ជារបស់អគ្គនាយដ្ឋានកាំកុងត្រូល ចុះធ្វើការត្រួតពិនិត្យ និងអនុវត្តដើម្បីស្វែងរកវត្តមានសារធាតុគីមី Propyl.parohydrxdenzoatc នៅក្នុងគំរូផលិតផលគ្រឿងផ្សំរស (ប្រេងខ្យង Oyster Sauce) ម៉ាក Yuan's នៃកម្មវិធីអង្កេតឃ្លាំផលិតផលម្ហូបអាហារ ព្រោះសារធាតុគីមីនេះ គឺជាសារធាតុគីមីបន្ថែម ក្នុងម្ហូបអាហារវាមានមុខងារ ថែរក្សា ផលិតផលឲ្យមានអាយុកាលវែង (Prescrvativc) និងហាមប្រើក្នុងផលិតផលម្ហូបអាហារ។
ជុំវិញបញ្ហានេះ និងដើម្បីទប់ស្កាតគ្រោះថ្នាក់ ដែលប៉ះពាល់ដល់សុខភាពប្រជាពលរដ្ឋជាយថាហេតុ អគ្គនាយកដ្ឋាន កាំកុងត្រូល សូមណែនាំដល់គ្រប់សាខាក្រោមឱវាទអនុវត្តវិធានការ ឲ្យបានម៉ឺងម៉ាត់ ដើម្បីសុវត្តិភាពសុខភាពប្រជាពលរដ្ឋ។
លោកបានបន្តថា ការចុះប្រតិបត្តិការរបស់សាខាកាំកុងត្រូល ដើម្បីស្វែងរកសារធាតុគីមី តែក្រុមការងារពុំបានរកឃើញ ប្រេងខ្យង ម៉ាក Yuan's៕
