(ភ្នំពេញ)៖ ជនសង្ស័យ៤នាក់ ដែលទើបតែមកពីទិញគ្រឿងញៀន ដើម្បីយកទៅជក់ ខណៈមិនទាន់ទាំងបានទៅដល់គោលដៅ ដែលត្រូវប្រើប្រាស់ផង ស្រាប់តែត្រូវកម្លាំងនគរបាលខណ្ឌជ្រោយចង្វារ ដេញតាមរហូតបង្ក្រាបឃាត់ខ្លួនបាន រួមជាមួយថ្នាំញៀន៣កញ្ចប់ និងម៉ូតូ២គ្រឿង។

លោក ស៊ឹម សាវ៉ាត នាយផ្នែកគ្រឿងញៀនខណ្ឌជ្រោយចង្វារ បានឲ្យដឹងថា ការឃាត់ខ្លួនជនសង្ស័យជាអ្នកប្រើប្រាស់គ្រឿងញៀនទាំង៤នាក់ខាងលើនេះ បានធ្វើឡើងនៅយប់រំលងអាធ្រាត្រ ឈានចូលថ្ងៃទី១២ ខែមិថុនា ឆ្នាំ២០១៧ ស្ថិតនៅតាមបណ្ដោយផ្លូវជាតិលេខ៦A ក្នុងភូមិព្រែកលៀប សង្កាត់ព្រែកលៀប និងនៅភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ។ ក្រោយពេលដែលកម្លាំងនគរបាលតាមបណ្ដាប៉ុស្ដិ៍ បានបន្តយាមល្បាតក្នុងមូលដ្ឋាន ដោយសហការជាមួយកម្លាំងនគរបាលខណ្ឌ ហើយក៏បានប្រទះឃើញសមាសភាព ដែលជិះម៉ូតូគួរឲ្យសង្ស័យ ទើបឈានដល់ការដេញតាមឃាត់ និងឆែកឆេរត្រួតពិនិត្យ ស្រាប់តែរកឃើញក្រាមសថ្លា ជាថ្នាំញៀនចំនួន៣កញ្ចប់ ដែលជនសង្ស័យទាំង៤នាក់ បានរក្សាលាក់ទុកនូវនិងខ្លួន និងទើបតែមកពីទិញ ដើម្បីយកទៅជក់ ក៍ត្រូវសមត្ថកិច្ចបង្ក្រាប ហើយដកហូតទាំងម៉ូតូចំនួន២គ្រឿងផងដែរ ១គ្រឿងម៉ាក ហុងដា CLICK ពណ៌ស ពាក់ស្លាកលេខកណ្ដាល 1J-7415 និង១គ្រឿងទៀតម៉ាកហុងដាសង់ឌ្រីម ពណ៌ខ្មៅ ពាក់ស្លាកលេខ ព្រៃវែង1H-4089។

នាយផ្នែកគ្រឿងញៀនខណ្ឌជ្រោយចង្វារ បានឲ្យដឹងទៀតថា ជនសង្ស័យត្រូវឃាត់ខ្លួនទី១-ឈ្មោះ សុខ ណេត ភេទប្រុស អាយុ១៩ឆ្នាំ ទី២-ឈ្មោះ ពៅ សុភណ្ឌ ភេទប្រុស អាយុ១៩ឆ្នាំ ទី៣-ឈ្មោះ រស់ ពន្លឺ ភេទប្រុស អាយុ៣១ឆ្នាំ ទី៤-ឈ្មោះ តេង មុនី ភេទប្រុស អាយុ៣០ឆ្នាំ រួមជាមួយវត្ថុតាង ដែលដកហូតបានពីសកម្មភាព ត្រូវបញ្ជូនមកសាកសួរនៅអធិការដ្ឋាននគរបាលខណ្ឌជ្រោយចង្វារ ដើម្បីបន្តនិតិវិធី៕