(ភ្នំពេញ)៖ ស្នងការនគរបាលរាជធានីភ្នំពេញ នាយឧត្តមសេនីយ៍ ជួន សុវណ្ណ បានប្រាប់បណ្ដាញសារព័ត៌មាន Fresh News នៅមុននេះបន្ដិចថា ជនល្មើស ដែលបានបើកបុក និងបាញ់គំរាមមួយគ្រាប់ មកលើរថយន្ដរបស់ប្រជាពលរដ្ឋនៅតាមដងផ្លូវនោះ ត្រូវបានសមត្ថកិច្ចជំនាញរបស់លោក បញ្ចប់ការសួរនាំហើយ នៅរសៀលថ្ងៃទី១២ ខែមិថុនា ឆ្នាំ២០១៧នេះ។
នាយឧត្តមសេនីយ៍ បានបញ្ជាក់ថា ក្រោយបញ្ចប់ការសួរនាំនោះ ជនល្មើសបានសារភាព និងទទួលស្គាល់ពីកំហុសរបស់ខ្លួន ហើយដោយមានការណែនាំផ្ទាល់ពី នាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ ជនល្មើសរូបនេះ ត្រូវបានបញ្ជូនទៅអង្គភាពរបស់ខ្លួនគឺស្នងការដ្ឋាននគរបាល ខេត្តកណ្ដាល ដើម្បីចាត់វិធានការតាមផ្លូវច្បាប់ និងដាក់ទោសពិន័យរបស់កងកម្លាំងនគរបាលជាតិ។
ថ្លែងប្រាប់បណ្ដាញសារព័ត៌មាន Fresh News នាយឧត្តមសេនីយ៍ ជួន សុវណ្ណ បានបញ្ជាក់យ៉ាងដូច្នេះថា «បន្ទាប់ពីយើងបានធ្វើកំណត់ហេតុ ជនបង្កបាន សារភាព ពីហេតុផលនៃការវ៉ាជែង និងការផ្ទុះអាវុធមួយគ្រាប់នោះហើយ ហើយម្យ៉ាងទៀត គឺយើងរង់ចាំដល់ម៉ោង១២នេះ យើងមិនទាន់បានឃើញ ជនរងគ្រោះចូលរួមដោះស្រាយទេ ហើយខ្ញុំសុំគោលការណ៍ពីនាយឧត្តមសេនីយ៍សន្ដិបណ្ឌិត នេត សាវឿន អគ្គស្នងការនគរបាលជាតិ រួចនាយឧត្តមសេនីយ៍ ឲ្យបញ្ជូនជនបង្កទៅឲ្យស្នងការនគរបាលខេត្តកណ្ដាល ដោយសារស្នងការនគរបាលខេត្តកណ្ដាល បានដកអាវុធរបស់ជនបង្កទុកហើយ ហើយយើងនឹងបញ្ជូន ជនបង្កនេះដោយឲ្យឧត្តមសេនីយ៍ត្រី សុង លី ស្នងការរងនគរបាលរាជធានីភ្នំពេញ ទទួលផែនព្រហ្មទណ្ឌ ដឹកជនល្មើសទៅកាន់ស្នងការដ្ឋាននគរបាលខេត្ត កណ្ដាល ហើយរថយន្ដជនបង្កក៏ត្រូវបាននគរបាលព្រហ្មទណ្ឌ បើកយកទៅឲ្យស្នងការខេត្តកណ្ដាល ដើម្បីចាត់ការនីតិវិធីច្បាប់ និងលក្ខន្តិកៈ នៃវិន័យរបស់កងកម្លាំងនគរបាលជាតិ»។
សូមបញ្ជាក់ថា ជុំវិញករណីកូនប្រុសមន្រ្តីជាន់ខ្ពស់ ក្រសួងមហាផ្ទៃមួយរូប ដែលជាម្ចាស់រថយន្តស្លាកលេខ ភ្នំពេញ 2AM-2762 ដែលបើកប៉ះគេហើយ ដកកាំភ្លើងបាញ់គំរាមទៀតនោះ ត្រូវបានអ្នកនាំពាក្យក្រសួងយុត្តិធម៌លោក គឹម សន្តិភាព បានសង្កត់ធ្ងន់ប្រាប់បណ្តាញព័ត៌មាន Fresh News ថា បើទោះជននោះជាមន្រ្តីអនុវត្តច្បាប់ក៏ដោយ បើប្រព្រឹត្តអំពើល្មើសច្បាប់ ត្រូវទទួលខុសត្រូវចំពោះមុខច្បាប់ជាដាច់ខាត។
អ្នកនាំពាក្យក្រសួងយុត្តិធម៌ លោក គឹម សន្តិភាព បានបញ្ជាក់ប្រាប់យ៉ាងដូច្នេះថា «អំពើល្មើសច្បាប់ ត្រូវទទួលខុសត្រូវចំពោះមុខច្បាប់ ទោះជននោះជាមន្ត្រីអនុវត្តច្បាប់ក៏ដោយ»។
ម្ចាស់រថយន្តបាឡែន ស្លាកលេខ ភ្នំពេញ 2AM-2762 ដែលបើកប៉ះគេហើយ ដកកាំភ្លើងបាញ់គំរាម គឺមានតួនាទីជានាយរងការិយាល័យចរាចរណ៍ នៃស្នងការដ្ឋាននគរបាលខេត្តកណ្តាល ឈ្មោះ លឹម ចំណាន និងជាកូនប្រុសរបស់មន្ត្រីជាន់ខ្ពស់មួយរូបនៅក្រសួងមហាផ្ទៃ។
សូមជំរាបថា នៅថ្ងៃទី១០ ខែមិថុនា ឆ្នាំ២០១៧ វេលាម៉ោង១៧៖៥៨នាទី មានករណីដ៏សាហាវមួយបានកើតឡើងនៅ នៅតាមបណ្តោយផ្លូវជាតិលេខ១ ជិតបុរីប៉េងហួតបឹងស្នោរ ដោយរថយន្តបាឡែន ពណ៌ទឹកមាស ពាក់ស្លាកលេខ ភ្នំពេញ 2AM-2762 មួយគ្រឿង ក្នុងទិសដៅស្របគ្នា បានជិះវ៉ាខាងស្តាំ ហើយប៉ះជាមួយរថយន្តមួយគ្រឿងទៀតមិនព្រមឈប់ បែរជាបង្អង់ល្បឿន បើកញ្ចក់រថយន្តបាញ់មួយគ្រាប់គម្រាម និងបើករត់គេចខ្លួនបាត់៕
