(ភ្នំពេញ)៖ កន្លងទៅថ្មីៗនេះ យើងសង្កេតឃើញមានការបង្ហោះរឿង «សង្សារខ្ញុំក្រមុំកូនមួយ» នៅលើទំព័រហ្វេសប៊ុកជាច្រើន ដោយគ្មានការអនុញ្ញាតពីផលិតកម្ម «រេដ ភីចឈ័រ» និងក្រុមហ៊ុន «ពូព្រហ្ម»។ ឆ្លើយតបនឹងការបំពានកម្មសិទ្ធិ ស្នាដៃភាពយន្ត លោក ស៊ុ ស៊ីថែន អ្នកចាត់ការទូទៅ របស់ ក្រុមហ៊ុន «ពូព្រហ្ម» បានលើកឡើងថា
«ពូព្រហ្ម បានទិញសិទ្ធិចែកចាយ តាមអ៊ិនធើណេតលើរឿង «សង្សារខ្ញុំក្រមុំកូនមួយ» ជាលក្ខណៈផ្តាច់មុខជាច្រើនខែមកហើយ។ ការបង្ហោះភាពយន្តនេះទាំងមូល លើទំព័ររបស់ខ្លួន មកពី បណ្តាម្ចាស់អាជីវកម្មទាំងនោះ មិនទាន់យល់ពីច្បាប់កម្មសិទ្ធិបញ្ញា និងផលវិបាកទោសទណ្ឌ ចេញពីការបំពានបែបនេះ»។
លោក ស៊ុ ស៊ីថែន បានបន្ថែមថា «ខ្ញុំដឹងថា ម្ចាស់គណនីទាំងអស់នោះ ប្រើរឿងទាំងអស់នោះ មិនមែនដើម្បីធ្វើអាជីវកម្ម ដោយផ្ទាល់ទេ តែគឺដើម្បីទាក់ទាញការចូលចិត្ត ដល់ទំព័ររបស់ពួកគាត់។ ដោយប្រយោល ពួកគាត់រំពឹងថា មុខរបរនឹងបង្កើនប្រជាប្រិយភាព និងលក់ផលិតផល និងសេវាបានច្រើន»។
ដើម្បីពង្រឹងការគោរពកម្មសិទ្ធិបញ្ញា ឲ្យមានប្រសិទ្ធភាព មិនថាចំពោះរឿង «សង្សារខ្ញុំក្រមុំកូនមួយ» ឬរឿងខ្មែរដទៃទេ «ពូព្រហ្ម» ស្នើនូវវិធានការ ដែលទាមទារ ការសហការទាំងពីម្ចាស់អាជីវកម្ម ដែលប្រើទំព័រហ្វេសប៊ុក ដូចខាងក្រោម៖
- ម្ចាស់អាជីវកម្ម៖ ដកនូវវីដេអូរឿងទាំងនោះចេញពីទំព័រខ្លួន ឲ្យបានឆាប់តាមដែលអាចធ្វើបាន។ ការខកខានអនុលោមតាមចំណាត់ការនេះ «ពូព្រហ្ម» មានសិទ្ធិប្តឹងទៅសមត្ថកិច្ច និងក្រុមហ៊ុនហ្វេសប៊ុក ឲ្យលុបទំព័រនោះចេញ។
- ទស្សនិកជន៖ រាយការណ៍ទៅហ្វេសប៊ុក ពីបទរំលោភសិទ្ធិមួយនេះ។ សម្រាប់អ្នកមិនហ៊ាន ឬមិនចេះរាយការណ៍ អាចគ្រាន់តែផ្ញើរូប (screenshot)ពីទំព័រមួយនោះ ចូលមក Inbox របស់ទំព័រហ្វេសប៊ុករបស់«ពូព្រហ្ម» នោះក្រុមការងារ«ពូព្រហ្ម» នឹងចាត់វិធានការ ដោយខ្លួនឯង និងដៃគូពាក់ព័ន្ធ។
- សម្រាប់អ្នករាយការណ៍ដល់«ពូព្រហ្ម» ក្រុមហ៊ុននឹងរក្សាឈ្មោះទុក ដើម្បីផ្តល់រង្វាន់ផ្សេងៗ មានដូចជា សំបុត្រចូលរួមទស្សនារឿង ដែលនឹងចែកចាយ ដោយ«ពូព្រហ្ម» ដោយឥតគិតថ្លៃ ចំនួន៥រឿង។
គួររំឭកដែលថា កាលពីប៉ុន្មានខែមុន ក្រសួងវប្បធម៌ និងវិចិត្រសិល្បៈ ក៏បានចេញលិខិតព្រមានមួយ ដល់ទំព័រហេ្វសប៊ុកណា ដែលបង្ហោះស្នាដៃភាពយន្តអ្នកដទៃ ដោយគ្មានការអនុញ្ញាត ពីម្ចាស់ដើម។
គួរបញ្ជាក់ដែរថា «ពូព្រហ្ម» បានលក់សិទ្ធិចែកចាយតាមអ៊ិនធើណេតបន្ត លើរឿង «សង្សារខ្ញុំក្រមុំកូនមួយ»នេះ ទៅឲ្យក្រុមហ៊ុនក្នុង ស្រុកតែ២ប៉ុណ្ណោះ គឺ Jaikon TV និង Soyo។ ហើយក្រុមហ៊ុន ក៏សូមថ្លែងអំណរគុណដល់ម្ចាស់អាជីវកម្មមួយចំនួន ដែលយល់ព្រមដករឿងនោះចេញភ្លាមៗ តាមសំណូមពររបស់ក្រុមហ៊ុន ហើយ «ពូព្រហ្ម» នឹងបែរមកសហការ ជាមួយក្រុមហ៊ុនទាំងនោះ តាមរយៈរូបភាពយុទ្ធនាការ លើភាពយន្តថ្មីៗរបស់ខ្លួនវិញ។
ចុះប្រិយមិត្តវិញ ចង់ចូលរួមយុទ្ធនាការបង្ក្រាបការរំលោភសិទ្ធិ ដោយវិធីងាយៗនេះទេ?
