(ភ្នំពេញ)៖ មន្រ្តីជំនាញម្ហូបអាហារ នៃសាខាកាំកុងត្រូលផែស្ងួតចុងទីភ្នំពេញ ថ្ងៃទី១០ ខែមិថុនា ឆ្នាំ២០១៧នេះ ដោយមានការសហការ ជាមួយក្រសួងអប់រំ យុវជន និងកីឡា និងមន្ទីរពាណិជ្ជកម្មរាជធានីភ្នំពេញ បានបើកវគ្គផ្សព្វផ្សាយមួយស្តីពី «សុវត្ថិភាពចំណីអាហារ និងកិច្ចការការពារ និងប្រើប្រាស់» ដល់សិស្សវិទ្យាល័យព្រែកលៀប និងអាជីវករលក់ដូរ ចំណីអាហារ ក្នុងសាលាចំនួន១០៥នាក់។
លោក ខៀវ បញ្ញវឌ្ឍន៍ គ្រូបង្គោលមកពីអគ្គនាយកដ្ឋានកាំកុងត្រូល ដែលដឹកនាំវគ្គសិក្សានេះ បានឲ្យដឹងថា វគ្គសិក្សានេះ ធ្វើឡើងក្នុងគោលបំណងឲ្យសិក្ខាកាម មានចំណេះដឹងមូលដ្ឋាន តាមបែបវិទ្យាសាស្រ្តជុំវិញសុវត្ថិភាពម្ហូបអាហារ ដោយផ្តោតទៅលើចំណេះដឹងជ្រើសរើសម្ហូបអាហារ ឲ្យមានសុវត្ថិភាព រួមទាំងការរក្សាទុក ការចំអិន ការធ្វើអនាម័យ និងការបរិភោគប្រកបដោយសុវត្ថិភាពផងដែរ។
សិក្ខាសាលា ក៏បានលើកយកមកនិយាយផងដែរ នូវការទទួលខុសត្រូវរបស់អ្នកផលិត អ្នកនាំចូល អ្នកចែកចាយ ចំពោះមុខច្បាប់ដោយយោងលើច្បាប់ស្តីពី «ការគ្រប់គ្រងគុណភាព សុវត្ថិភាព ផលិតផល ទំនិញ និងសេវា» ដែលអនុវត្តដោយមន្រ្តីអនុវត្តច្បាប់ពាក់ព័ន្ធនិងម្ហូបអាហារ។
បើតាមលោក ខៀវ បញ្ញវឌ្ឍន៍ សារៈសំខាន់របស់អាហាររូបត្ថម្ភមួយចំនួន ពិសេសសារសំខាន់របស់សារធាតុអ៊ីយ៉ូត ដែលអាចរកបានយ៉ាងងាយ នៅក្នុងអំបិលអ៊ីយ៉ូត ក៏ត្រូវបានលើកយកមកផ្សព្វផ្សាយផងដែរ។
ជាមួយគ្នានេះផងដែរ សិក្ខាសាលាក៏បានដាក់ចេញនូវប្រធានបទសំខាន់ៗផ្សេងទៀត ដូចជា ការបង្ហាញឲ្យឃើញនូវ ផលប៉ះពាល់ នៃសារធាតុគីមីខុសច្បាប់ និងប៉ះពាល់ធ្ងន់ធ្ងរដល់ សុខភាពអ្នកប្រើប្រាស់ ដែលត្រូវបានលួចដាក់បញ្ចូលក្នុងម្ហូបអាហារដោយចេតនា ដើម្បីបង្កើនសម្រស់ទាក់ទាញឲ្យស្វិត ឲ្យស្រស់ និងកុំឲ្យឆាប់ខូច ទៅលើមុខទំនិញម្ហូបអាហារមួយចំនួន ដែលមន្រ្តីជំនាញតែងតែរកឃើញ នៅលើទីផ្សារហើយធ្វើការ រឹបអូសនិងកម្ទេចចោល។
គួរបញ្ជាក់ថា លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាលទទួលបន្ទុកជាអគ្គនាយក បានទទូចសុំឲ្យបងប្អូន អាជីវករទាំងអស់ មេត្តាប្រកបមុខរបរទទួលទាន ទំនិញហូបចុកឲ្យស្ថិតក្រោមអំណាចផ្លូវច្បាប់ មានវិជ្ជាជីវៈ និងប្រកបដោយក្រមសីលធម៌ កុំគិតគូរតែផលចំណេញផ្ទាល់ខ្លួន ហើយមិនបានគិតដល់សុវត្ថិភាពសាធារណៈ និងរួមគ្នាសហការ ជាមួយសមត្ថកិច្ចរួមចំណែកទប់ស្កាត់ និងបំបាត់ទាំងស្រុងទំនិញហូបចុក ដែលពុំមានសុវត្ថិភាពនៅលើទីផ្សារ ក៏ដូចជាទៅដល់ដៃអ្នកប្រើប្រាស់៕
