(សៀមរាប)៖ នៅព្រឹកថ្ងៃទី០៩ ខែមិថុនា ឆ្នាំ២០១៧នេះ លោក ឃឹម ប៊ុនសុង អភិបាលខេត្តសៀមរាប បានចុះសំណេះសំណាល ជាមួយមេភូមិ សមាជិកក្រុមប្រឹក្សាឃុំ និងមន្ត្រីរាជការ ស្រុកប្រាសាទបាគង ខេត្តសៀមរាប។
លោក ឃឹម ប៊ុនសុង បាននាំពាក្យសួរសុខទុក្ខ ពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក៏ដូចជា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និង ឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ និងជាប្រធានក្រុម ការងារថ្នាក់ជាតិចុះមូលដ្ឋានខេត្តសៀមរាប ។
អភិបាលខេត្តសៀមរាប ក៏បានកោតសសើរ ពីការខិតខំយកចិត្តទុកដាក់ខ្ពស់ លើការងារសន្តិសុខ សណ្តាប់ធ្នាប់ ជូនប្រជាពលរដ្ឋនៅតាមមូលដ្ឋាន ភូមិ ឃុំ ក្នុងឱកាសយុទ្ធនាការឃោសនាបោះឆ្នោត និងពេលបោះឆ្នោត ក្រោយការបោះឆ្នោត ជ្រើសរើសក្រុមប្រឹក្សា ឃុំ សង្កាត់ ធានាបានសុវត្ថិភាពល្អជូនប្រជាពលរដ្ឋ មិនឲ្យមានកើតនូវអំពើហិង្សាអ្វីឡើយនាពេលកន្លងមកនេះ។
ក្នុងនោះ លោក ឃឹម ប៊ុនសុង ក៏បានណែនាំមួយចំនួន ដល់សមាជិកក្រុមប្រឹក្សាឃុំ មន្ត្រីរាជការត្រូវយកចិត្ត ទុកដាក់ក្នុងការអនុវត្តការងារស្នូលរបស់ខ្លួន ដើមី្បបម្រើនូវផលប្រយោជន៍របស់ប្រជាពលរដ្ឋនៅក្នុងមូលដ្ឋាន។ លោកអភិបាល ក៏បានសង្កត់ធ្ងន់ថា គ្រប់សមាជិកក្រុមប្រឹក្សាឃុំ និងមន្ត្រីរាជការណាដែលបានធ្វើឲ្យមានកំហុសឆ្គង ប៉ះពាល់ បាត់បង់ផលប្រយោជន៍របស់ប្រជាពលរដ្ឋ ក្នុងមូលដ្ឋាន គឺ ត្រូវទទួលទោសទណ្ឌទៅតាមច្បាប់រដ្ឋបាល ដែលបានកំណត់។
លោកក៏បានផ្តាំផ្ញើដល់មន្ត្រីរាជការ កម្លាំងសមត្ថកិច្ច និងអាជ្ញាធរមូលដ្ឋាន គ្រប់លំដាប់ថ្នាក់ បង្កើនការ យកចិត្តទុកដាក់ លើការអនុវត្តគោលនយោបាយ ភូមិឃុំ មានសុវត្ថិភាព ដើមី្បធានាបាននូវភាពរស់នៅសុខសាន្ត របស់ប្រជាពលរដ្ឋក្នុងមូលដ្ឋានខ្លួន និងបន្តអភិវឌ្ឍភូមិ ឃុំ របស់ខ្លួនឱ្យកាន់តែរីកចំរើនថែមទៀត ដើម្បីបម្រើដល់ផលប្រយោជន៍ របស់ប្រជាពលរដ្ឋ៕
