(ភ្នំពេញ)៖ ក្រោយពីការប្រជុំនៅថ្ងៃទី០៧ ខែមិថុនា ឆ្នាំ២០១៧កន្លងទៅថ្មីនេះ ក្រោមអធិបតីភាពលោក គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា បានបញ្ជាឲ្យមន្ដ្រីគយត្រូវតែបន្ដសកម្មភាពការងាររបស់ខ្លួន ក្នុងការបង្ក្រាបរាល់រថយន្ដទាំងឡាយណាដែលអត់បង់ពន្ធ។ ជាក់ស្ដែងនៅថ្ងៃទី០៩ ខែមិថុនា ឆ្នាំ២០១៧នេះ កម្លាំងគយចល័តដឹកនាំដោយលោក ព្រាប ការ៉ាត់ បានបើកប្រតិបត្តិការចាប់រថយន្តទំនើបៗអត់ពន្ធ១០គ្រឿង នៅភូមិសាស្រ្ត តាមបណ្តាខណ្ឌនានា ក្នុងរាជធានីភ្នំពេញ នេះបើយោងតាមមន្រ្តីគយចល័តថ្លែងប្រាប់បណ្តាញព័ត៌មាន Fresh News នៅរសៀលថ្ងៃនេះ។
ការចុះចាប់រថយន្តស៊េរីទំនើបនេះ ធ្វើតាមការចង្អុលបង្ហាញពីលោក កើត សុធារ៉ា ប្រធាននាយកដ្ឋាន សហការជាមួយកម្លាំងអាវុធហត្ថលើផ្ទៃប្រទេស។ មន្រ្តីគយចល័តបានបញ្ជាក់ថា រថយន្តស៊េរីទំនើបៗ ដែលចាប់បានរួមមាន ម៉ាក BMW, Lexus, Camry, Mercedes។ ក្នុងនោះមានរថយន្ត Lexus 570 សេរីឆ្នាំ២០១៦-២០១៧ ចំនួន៤គ្រឿងផងដែរ។
លោក ព្រាប ការ៉ាត់ សូមអំពាវនាវឲ្យម្ចាស់រថយន្តទាំងអស់ ដែលមិនទាន់បង់ពន្ធ សូមមេត្តាចូលមកបង់ពន្ធជូនរដ្ឋ ដើម្បីជៀសវាងការចាប់ឃាត់រថយន្តដូច្នេះ។
ពាក់ព័ន្ធនឹងសកម្មភាពបង្រ្កាបរថយន្តអត់ពន្ធនេះ មហាជនបានសម្តែងនូវការកោតសរសើរចំពោះនាយកដ្ឋានគយ និងនាយកដ្ឋានស្រាវជ្រាវបង្ការ និងបង្រ្កាបបទល្មើសគយ។ ជាងនេះទៅទៀត ការបង្រ្កាបរថយន្តអត់ពន្ធពីសំណាក់កម្លាំងគយចល័ត នឹងត្រូវធ្វើឡើងជាប់ជានិច្ចដូចភ្លៀងរលឹម។
កម្លាំងគយចល័ត បានចុះប្រតិបត្តិ ចាប់ថយន្តស៊េរីទំនើបៗ ដែលអត់ពន្ធជាច្រើនគ្រឿងរួចមកហើយ កាលពីពេលកន្លងមក ហើយប្រត្តិបត្តិការនេះ ក៏ទទួលបានជោគជ័យជាបន្តបន្ទាប់ផងដែរ៕
