(ភ្នំពេញ)៖ អ្នកនាង យ៉ុង ចាន់កណ្ណិកា ដែលទស្សនិកជនស្គាល់ថា ជាតារាចម្រៀងផ្នែកមនោសញ្ចេតនា កម្សត់ ល្បីតាំងពីនៅកុមារភាពមកនោះ បានធ្វើការសហការ ជាមួយកូនខ្មែរដែលរស់នៅសហរដ្ឋអាមេរិក ក្នុងគោលបំណង ជួយដល់អង្គការមួយ ដែលមានទិសដៅលើកកម្ពស់ វិស័យភាសាអង់គ្លេសដល់កុមារ ទីទ័លក្រ ជួបការលំបាក ខ្វះទីពឹង នៅកម្ពុជា។ ចំពោះសន្ដានចិត្តដ៏ល្អប្រពៃនេះ ទាំងកូនខ្មែរ និង តារាចម្រៀងមនោសញ្ចេតនា យ៉ុង ចាន់កណ្ណិកា ពិតជាមានសេចក្ដីសប្បាយរីករាយ រកអ្វីប្រៀបផ្ទឹមពុំបាន ដែលបានជួយចែករំលែកការងារល្អៗ ក្នុងសង្គមកម្ពុជាដែលត្រូវជំនួយ ក្នុងការអភិវឌ្ឍគ្រប់ផ្នែក ជាពិសេសនោះ គឺធនធានមនុស្ស។
កញ្ញា James Evans ដោយសារតែមានការស្រឡាញ់ រាប់អាន តារាចម្រៀង យ៉ុង ចាន់កណ្ណិកា នាងបានបញ្ចេញស្នាដៃ ក៏ដូចជាបង្ហាញនូវការបង្រៀន ផ្នែកភាសាអង់គ្លេស ជូនដល់កុមារខ្មែរនៅអង្គការខាងលើ ដោយជ្រើសរើសសុទ្ធតែជាគ្រូ មកពីទីក្រុងហុងកុង មានជំនាញល្អច្បាស់លាស់ មកចែករំលែង និងផ្ទេរចំណេះ ដឹងយ៉ាងគាប់ចិត្ត។
កញ្ញា James Evans មកពីសាកលវិទ្យាល័យ The Hong Kong Polytechnic University ដែលជាកូនខ្មែររស់នៅសហរដ្ឋអាមេរិក បានរៀបរាប់យ៉ាងច្បាស់ៗថា «នេះជាឆ្នាំទី៣ ហើយដែលកញ្ញាមកសាលាសហគមន៍ អេម៉ាញ៉ូអែល ដោយពាំនាំលោកគ្រូអ្នកគ្រូនិស្សិត មកពីហុងកុង ជួយចែករំលែកផ្នែកភាសាអង់គ្លេស ឲ្យមានគុណភាពជាបន្តទៀត ជូនដល់ប្អូនៗកុមារទីទ័លក្រ នៅសហគមន៍ខាងលើនេះ ឲ្យមានការនិយាយភាសាបានល្អ ត្រូវតុងត្រូវផ្នត់ ដើម្បីឲ្យសិស្សកម្ពុជាយើង លូតលាស់ទៅមុខទៀត។ ដោយមើលឃើញសិស្សនៅទីនេះ មានទឹកចិត្តចង់រៀននិងលោកគ្រូអ្នកគ្រូ មានទឹកចិត្តចង់បង្រៀន ទើបគិតថា នេះពិតជាអស្ចារ្យ សម្រាប់ការជួយបន្តទៀតរាល់ឆ្នាំ»។
«ម្យ៉ាងទៀត ចង់ឲ្យសិស្សដែលចេញពីសាលាអេម៉ាញ៉ូអែល ចេញទៅមានគុណភាព ជួយខ្លួនឯងជួយផ្ទះសម្បែង ស្របពេលដែលសិស្សនៅសាកលវិទ្យាល័យហុងកុង ខាងលើ គាត់មានអារម្មណ៍ចង់ជួយច្រើន។ នៅពេលនេះយើងមកបង្ហាត់ភាសាអង់គ្លេស ចំនួនមួយអាទិត្យ ដោយមានសិស្សចំនួនជាង៤០០នាក់ ក្នុងនោះផ្តោតលើសិស្សថ្នាក់ មតេយ្យដល់ថ្នាក់ទី៦»។ នេះបើយោតាម កញ្ញា James Evans បញ្ជាក់បន្ថែម។
យ៉ាងណាមិញ កុមារីជាច្រើនដែលសិក្សានៅសាលាខាងលើ បានសម្តែងនូវការសប្បាយរីករាយ ដែលបានលោកគ្រូអ្នកមកពីហុងកុង មានសន្ដានចិត្ត ជួយមកបង្រៀនភាសា ឲ្យយល់ច្បាស់ពីរបៀបសរសេរ ប្រើសំឡេង និង ក្បួនរៀនដែលបង្កប់ ដោយភាពរីករាយដូចជា មានការលេងហ្គេមកម្សាន្ត ទាក់ទិន និងមេរៀនធ្វើឲ្យមានការងាយយល់។ ប្អូនៗចង់ឲ្យពួកគាត់មកបង្រៀនជាបន្តទៀត ប្រសិនបើមានពេលទំនេរ គ្រប់គ្រាន់ហើយមានពេលយូរ ជាងនេះ។
សូមបញ្ជាក់ថា សាលាសហគមន៍អេម៉ាញ៉ូអែល ស្ថិតនៅក្នុងភូមិត្នោតជ្រុំ៤ សង្កាត់បឹងទំពុន ខណ្ឌមានជ័យរាជធានីភ្នំពេញ ខណៈកាលពីព្រឹកថ្ងៃទី៨ មិថុនា ឆ្នាំ២០១៧ នេះមានការរៀបចំទ្រង់ទ្រាយធំមួយ ដែលបង្ហាញពីការបង្រៀន ផ្នែកភាសាអង់គ្លេស និងជំនាញផ្សេងទៀតដល់កុមារា កុមារីកម្ពុជា៕
