(ភ្នំពេញ)៖ ស្ដ្រីម្នាក់បានដើរប្រមូលលុយតុងទីនជំនួសមេ បានប្រមាណជាង២២៥,០០០ដុល្លារ តែមិនប្រគល់ឲ្យមេវិញ ក៏ត្រូវបានមេតុងទីនរូបនោះដាក់ពាក្យបណ្ដឹងទៅសាលាដំបូងរាជធានីភ្នំពេញ ដើម្បីជួយផ្ដល់យុត្តិធម៌ជូនខ្លួនដែលជាម្ចាស់លុយ (មេតុងទីន)។
ជាក់ស្ដែងនៅព្រឹកថ្ងៃទី០៨ ខែមិថុនា ឆ្នាំ២០១៧នេះ ត្រូវបានតុលាការបើកសវនាការ ដើម្បីជំនុំជម្រះលើរឿងក្ដីនេះ។ តាមអង្គសវនាការ ស្ដ្រីជាជនជាប់ចោទឈ្មោះ ផាត សុផាវតី អាយុ៣៩ឆ្នាំ និងម្ចាស់លុយជាមេតុងទីនឈ្មោះ យិន រំដួល។
បន្ទាប់ពីបញ្ចប់ការសួរដេញដោល តំណាងអយ្យការ លោក វង្ស ប៊ុនវិសុទ្ធ បានសម្រេចដម្កល់ការចោទប្រកាន់លើបទរំលោភលើទំនុកចិត្ត តាមមាត្រា ៣៩១និង៣៩២ នៃក្រមព្រហ្មទណ្ឌ ហើយលោកចៅក្រមជំនុំជម្រះ អ៊ឹម វណ្ណៈ បានសម្រេចប្រកាសសាលក្រមលើរឿងក្តីនេះ នៅថ្ងៃទី២២ ខែមិថុនា ឆ្នាំ២០១៧ ខាងមុខ។ ប្រសិនបើមិនការប្តូរបទចោទប្រកាន់ទេនោះ ស្ត្រីជាប់ចោទ ឈ្មោះ ផាត សុផាវតី ប្រឈមនឹងការជាប់ពន្ធនាគារយ៉ាងហោចណាស់ក៏៣ឆ្នាំដែរ។
សូមរំលឹកថា ដើមបណ្តឹងដែលជាម្ចាស់បំណុលឈ្មោះ អ្នកស្រី យិន រំដួល បានឲ្យដឹងថា ក្រោយបែកធ្លាយរឿងបាត់លុយ២២៥,០០០ដុល្លារ ឈ្មោះ ផាត សុផាវតី បានបង់រំលោះប្រចាំខែមែន ទាំងអ្នកស្រីបញ្ជាក់ថា ជាមនោសញ្ចេតនារាប់អានក្នុងមុខរបររាប់លុយ និងចងការប្រាក់ ទើបមានការយោគយល់ ប៉ុន្តែក្រោយមកប្រាក់បង់រំលោះ ក៏គ្មានមនុស្សឈ្មោះ សុផាវតីក៏បាត់ ក្រោយការស្វែងរកទើបដឹងបន្ថែមថា កូនបំណុលរូបនេះបានរំលោភលើទំនុកចិត្ត ហេតុដូច្នេះបានជាអ្នកស្រីសំរេចចិត្ត ដាក់ពាក្យបណ្តឹងមកសាលាដំបួងរាជធានីភ្នំពេញ រកយុត្តិធម៌តាមផ្លូវច្បាប់៕
