(ភ្នំពេញ)៖ ដោយមើលឃើញពីទុក្ខលំបាក វេទនារបស់ក្រុមគ្រួសារសពលោក អ៊ិត សេដ្ឋា ពិធីករប្រកបដោយទេពកោសល្យ ប្រចាំក្នុងស្ថានីយទូរទស្សន៍ CTN ក្រោយពីរូបលោកស្លាប់ទៅនោះ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បានបរិច្ចាគថវិកាផ្ទាល់ខ្លួនរបស់សម្ដេចទាំងពីរ ជូនដល់កូនទាំង៣របស់លោក អ៊ិត សេដ្ឋា ចំនួន១ម៉ឺនដុល្លារ ដើម្បីជួយផ្គត់ផ្គង់ និងរំលែកទុក្ខលំបាកដល់គ្រួសារមួយនេះ។ នេះបើយោងតាមលោក ហ៊ុយ វណ្ណៈ ថ្លែងប្រាប់ Khmertalking ឲ្យដឹងនៅមុននេះបន្តិច។
សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន លោកទាំងពីរបានក្លាយជាទេវតារស់ ប្រោសប្រទាន និងជួយសង្គ្រោ ដល់បងប្អូន ប្រជាពលរដ្ឋ ដែលជួបទុក្ខ និង ជួបការលំបាកគ្រប់ពេល គ្រប់ទីកន្លែង។ ជាក់ស្ដែងពេលនេះ សម្ដេចទាំងទ្វេ បានជួយដល់គ្រួសារលោក អ៊ិត សេដ្ឋា បន្ទាប់ពីរូបលោកលាចាកលោកនេះទៅ ដើម្បីឲ្យកូនៗ មានក្ដីសង្ឃឹម និងរំលែកទុក្ខលំបាក បានយ៉ាងធំធេងផងដែរ។
សូមបញ្ជាក់ថា នៅថ្ងៃទី០៦ ខែមិថុនា ឆ្នាំ២០១៧នេះ ស្ថានីយទូរទស្សន៍ CTN តាមរយៈ «មូលនិធិ CTN» ផ្តួចផ្តើមបង្កើតមូលនិធិពិសេសមួយ ដើម្បីរៃអង្គាសថវិកាយកទៅជួយកូនៗកំព្រាដ៏កំសត់៣នាក់របស់សព លោក អ៊ិត សេដ្ឋា ជាពិធីករកម្មវិធីទូរទស្សន៍ដ៏ល្បីល្បាញមួយរូបនៅកម្ពុជា។ ថវិកាប្រមូលបានតាមរយៈមូលនិធិពិសេសនេះ នឹងប្រើប្រាស់ដើម្បីទិញផ្ទះ១ល្វែង ព្រមទាំងសម្រាប់ទ្រទ្រង់ជីវភាព និងទ្រទ្រង់ការសិក្សារហូតដល់ចប់។
លោក អ៊ិត សេដ្ឋា បម្រើការងារនៅក្រុមហ៊ុន CBS ដែលមានទូរទស្សន៍ CTN CNC MyTV CTN International និង OneTV។ លោកបានធ្វើមរណៈកាល ក្នុងជន្មាយុ៤៩ឆ្នាំ ដោយរោគាពាធ នាពេលថ្មីៗនេះ បន្សល់ទុកកូនកំព្រាតូចៗប្រុសស្រី៣នាក់គ្មានទីពឹង គ្មានផ្ទះសម្បែង និងគ្មានថវិកាទ្រទ្រង់ជីវភាពនោះទេ។
ដោយឃើញស្ថានភាពបែបនេះ និងដោយមានគំនិតផ្តួចផ្តើមពី ឯកឧត្តម ហ៊ុយ វណ្ណៈ ព្រមទាំងទទួលបានការគាំទ្រពី អ្នកឧកញ៉ា គិត ម៉េង យើងខ្ញុំបានរៀបចំបង្កើតមូលនិធិពិសេសនេះឡើង ដើម្បីជួយកូនប្រុសស្រីកំព្រាទាំង៣នាក់ និងដើម្បីជាការជូនដំណើរវិញ្ញាណក្ខន្ត លោក អ៊ិត សេដ្ឋា ទៅកាន់សុគតិភពដោយស្ងប់។
សូមជម្រាបថា បំណងប្រាថ្នារបស់លោក អ៊ិត សេដ្ឋា មុនលាចាកលោកយើងនេះ គឺគាត់ចង់បានផ្ទះ១សម្រាប់កូនៗ និងម្តាយជរា ព្រមទាំងចង់ឃើញកូនៗបានរៀនសូត្ររហូតដល់ចប់។ សូមមេត្តាចូលរួមជាមួយ «មូលនិធិ CTN» យើងខ្ញុំ ដើម្បីជួយឲ្យបំណងប្រាថ្នារបស់ លោក អ៊ិត សេដ្ឋា បានសម្រេច។ ចំពោះរាល់ការចំណាយក្នុងពិធីបុណ្យសពលោក អ៊ិត សេដ្ឋា គឺទទួលរ៉ាប់រងដោយក្រុមហ៊ុនទូរទស្សន៍ CBS។
សូមសាធារណជន និងសប្បុរសជន ផ្តល់សមាណចិត្តដោយក្តីមេត្តា ចូលរួមជាមួយមូលនិធិពិសេសទ្រទ្រង់កូនៗកំព្រារបស់ លោក អ៊ិត សេដ្ឋា តាមការគួរនិងក្តីករុណាបំផុត។ ការទទួលថវិកាសប្បុសរបស់មូលនិធិពិសេសនេះ នឹងធ្វើតាមតែប្រព័ន្ធ ធនាគារ Wing (ចាប់ពីថ្ងៃទី០៧ ខែមិថុនា ឆ្នាំ២០១៧) ដែលងាយគ្រប់គ្រងបាន និងដោយតម្លាភាព គឺធ្វើតែតាមរយៈមូលនិធិ CTN តែមួយគត់។
ការទទួលថវិកាសប្បុរសចូលរួមបរិច្ចាគក្នុង «មូលនិធិ CTN ជួយកូនៗកំព្រារបស់លោក អ៊ិត សេដ្ឋា» គឺចាប់ទទួលនិងប្រព្រឹត្តិទៅ នៅថ្ងៃទី០៨ ខែមិថុនា ឆ្នាំ២០១៧ ដោយផ្សាយផ្ទាល់នៅទូរទស្សន៍ CNC ចាប់ពីវេលាម៉ោង ២៖០០នាទី ដល់ ៤៖០០នាទី រសៀល។
ព័ត៌មានបន្ថែម សូមមេត្តាទាក់ទងគណៈកម្មការមូលនិធិ តាមរយៈលេខទូរស័ព្ទ៖ ០១២ ២២១ ៧៨៩, ០១៧ ៧៩៩ ៧៧៧, ០១៧ ៥០២ ៥២៩ និង ០៩២ ១៣០ ០០៧៕
