(ភ្នំពេញ)៖ នៅថ្ងៃទី០៥ ខែមិថុនា ឆ្នាំ២០១៧នេះ ស្ថានទូតសហរដ្ឋអាមេរិកប្រចាំនៅរាជធានីភ្នំពេញ បានចេញសេចក្តីថ្លែងការណ៍អបអរសាទរចំពោះប្រជាពលរដ្ឋកម្ពុជារាប់លាននាក់ ដែលបានទៅចូលរួមបោះឆ្នោត ព្រមទាំងអំពាវនាវឲ្យគ្រប់គណបក្សទាំងអស់ គោរពតាមនិងទទួលយកលទ្ធផលនៃការបោះឆ្នោតនេះដោយសន្តិវិធី និងនៅក្នុងឆន្ទៈនៃកិច្ចសហប្រតិបត្តិការ និងបង្រួបបង្រួមជាតិ។
ស្ថានទូតសហរដ្ឋអាមេរិកប្រចាំនៅរាជធានីភ្នំពេញ បានចេញសេចក្តីថ្លែងការណ៍អបអរសាទរចំពោះប្រជាពលរដ្ឋកម្ពុជារាប់លាននាក់ ដែលបានទៅចូលរួមបោះឆ្នោត កាលពីថ្ងៃអាទិត្យម្សិលមិញនេះ ដើម្បីជ្រើសរើសថ្នាក់ដឹកនាំនៅតាមសហគមន៍របស់ពួកគេ។ ជាមួយគ្នានេះស្ថានទូតអាមេរិកសូមធ្វើការកោតសរសើរ ចំពោះរាជរដ្ឋាភិបាលនៃប្រទេសកម្ពុជា, គណៈកម្មាធិការជាតិរៀបចំការបោះឆ្នោត (គ.ជ.ប), មន្រ្តីកិច្ចការបោះឆ្នោត, និងក្រុមអ្នកស្ម័គ្រចិត្តទាំងអស់ សម្រាប់កិច្ចខិតខំប្រឹងប្រែងរបស់ពួកគេ ក្នុងការរៀបចំចាត់ចែង និងដំណើរការការបោះឆ្នោតនេះ។
សូមបញ្ជាក់ថា លទ្ធផលបឋមនិងមិនទាន់ផ្លូវការ នៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៤ នាថ្ងៃទី០៤ ខែមិថុនា ឆ្នាំ២០១៧ ម្សិលមិញនេះ គណបក្សប្រជាជនកម្ពុជាទទួល ១១៦៣ឃុំ-សង្កាត់, គណបក្សសង្គ្រោះជាតិ ទទួលបាន ៤៨២ឃុំ-សង្កាត់ និងគណបក្សខ្មែររួបរួមជាតិ១ឃុំ៕
