(ត្បូងឃ្មុំ)៖ រដ្ឋមន្រ្តីក្រសួងព័ត៌មានលោក ខៀវ កាញារីទ្ធ បានបញ្ជាក់នៅលើ Facebook របស់លោកនៅមុននេះថា មានសកម្មជនបក្ស​សង្គ្រោះជាតិ នៅឃុំចាន់មូល​ ស្រុក​មេមត់​ ខេត្តត្បូងឃ្មុំ​ បានជិះម៉ូតូមានស្លាកលេខវៀតណាម ចូលមកបោះឆ្នោត តែនគរបាលឃាត់ខ្លួនភ្លាមៗ ព្រមទាំងដកហូតម៉ូតូ ទុកជាបណ្តោះអាសន្នផងដែរ។

លោក ខៀវ កាញារីទ្ធ បានបញ្ជាក់យ៉ាងដូច្នេះថា «មុននេះបន្តិច សកម្មជនបក្ស​សង្គ្រោះជាតិនៅឃុំចាន់មូល​ ស្រុកមេមត់​ ខេត្តត្បូងឃ្មុំ​ បានជិះម៉ូតូមានស្លាកលេខវៀតណាម ចូលមកបោះឆ្នោត​ ហើយមានសកម្មជនគ្នាគេម្នាក់ទៀត ចាំថតរូប​ដើម្បីយកទៅបង្ហោះវាយប្រហារថា មាន​យួនចូលមកបោះឆ្នោត​។​ តែល្បិចស្មោគគ្រោក​បែបនេះ ត្រូវនគរបាលស្គាល់អ្នកជិះម៉ូតូ​ ព្រមទាំងបានដកហូតម៉ូតូយកមកទុកបណ្ដោះអាសន្ន​ដើម្បីស្រាវជ្រាវ​។ ពេលនេះសមត្ថកិច្ចកំពុងធ្វើកំណត់ហេតុ​ និង​របាយការណ៍​ ដើម្បីចែកចាយជូនបណ្ដាញផ្សព្វផ្សាយ ជ្រាបជាដំណឹងជៀសវៀង បក្សសង្គ្រោះជាតិយកមកបំភ្លៃវាយប្រហាររដ្ឋាភិបាល​ និង​គ.ជ.ប​»៕