(កំពត)៖ នៅព្រឹកថ្ងៃទី២ ខែមិថុនា ឆ្នាំ២០១៧នេះ លោក នៃ ប៉េណា ប្រធានគណៈត្រួតពិនិត្យ និងជាសមាជិកគណៈអចិន្ត្រៃ នៃគណៈកម្មាធិការកណ្តាល គណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាល ចុះជួយខេត្តកំពត អមដំណើរដោយ លោក ចាន់ ចេស្តា អភិបាលខេត្ត ជាប្រធានគណបក្សប្រជាជនកម្ពុជាខេត្តកំពត បានដឹកនាំសមាជិក សមាជិកា និងប្រជាពលរដ្ឋ អ្នកគាំទ្រ ប្រមាណ១៥០០០នាក់ ធ្វើយុទ្ធនាការឃោសនាបោះឆ្នោត ថ្ងៃចុងក្រោយ។
ក្នុងការហែក្បួនបិទយុទ្ធនាការឃោសនាបោះឆ្នោតឃុំសង្កាត់អាណាត្តិទី៤នេះ ចេញដំណើរពីកន្លែងប្រមូលផ្តុំ នៅរង្វង់មូលធុរ៉េន ក្នុងក្រុងកំពត ដង្ហែក្បួនឈ្ពោះទៅកាន់ ស្រុកកំពង់ត្រាច ដោយឆ្លងកាត់ខេត្តកែប ហើយចូលទៅស្រុកបន្ទាយមាស ចេញពីបន្ទាយមាសបន្តទៅស្រុកអង្គជ័យ ចេញពីស្រុកអង្គរជ័យ ចូលទៅស្រុកឈូក ទើបបត់ចូកមកក្រុងកំពត ហើយរំសាយកន្លែងដើមវិញ លើកំណាត់ផ្លូវជាតិលេខ៣៣, ៣១ និងលេខ៣។
លោក ចាន់ ចេស្តា មានសេចក្តីរីរាយជាខ្លាំង ពេលឃើញសមាជិករបស់បក្ស និងបងប្អូនប្រជាពលរដ្ឋ បានមកចូលរួមគាំទ្រដង្ហែបក្សច្រើនហួសការរំពឹងទុក។
សូមជម្រាបថា នៅតាមមូលដ្ឋានឯនោះវិញ ក៏មានសមាជិក និងអ្នកគាំទ្រ ឈរចាំអបអរតាមដូងផ្លូវ និងនៅតាមមូលដ្ឋានភូមិឃុំផងដែររង់ចាំ អបអរសាទរក្បួនដង្ហែ របស់ថ្នាក់ដឹកនាំខេត្ត។ តាមប្រជាពលរដ្ឋ ដែលមកចូលរួមដង្ហែខាងលើ បានប្រាប់ឲ្យដឹងថា ពួកគាត់សប្បាយចិត្តណាស់ ដែលឃើញអ្នកគាំទ្របក្សមានចំនួនច្រើន។ ពេលក្បួនបានចាប់ផ្តើមចេញដំណើរ គេសង្កេតឃើញរថយន្តតូច រថយន្តធំជាច្រើនគ្រឿង ត្រូវបានបើកនាំមុខដង្ហែក្បួន និងមានម៉ូតូ ម៉ូតូកង់បីអមពីក្រោយយ៉ាងច្រើនបន្តកន្ទុយគ្នារាប់សិបគីឡូម៉ែត្រ៕
