(ភ្នំពេញ)៖ សាលារាជធានីភ្នំពេញ នៅថ្ងៃទី០១ ខែមិថុនា ឆ្នាំ២០១៧នេះ ស្នើឲ្យគណៈកម្មាធិការជាតិរៀបចំការ បោះឆ្នោត ហៅកាត់ថា គ.ជ.ប ចាត់វិធានការឲ្យទាន់ពេលដល់គណបក្សសង្គ្រោះជាតិ ដែលមានបំណង់ចង់កៀងគរអ្នកគាំទ្រមកពីតាមបណ្ដាខេត្តផ្សេង ដើម្បីមកឃោសនានៅថ្ងៃស្អែកនេះ ឲ្យបញ្ឈប់សកម្មភាពនេះបន្ទាន់ ព្រោះវាផ្ទុយពីច្បាប់របស់ គ.ជ.ប។ នេះបើតាមលិខិត របស់សាលារាជធានីភ្នំពេញ ដែលបណ្ដាញសារព័ត៌មាន Fresh News ទទួលបាននៅមុននេះបន្ដិច។

សាលារាជធានីភ្នំពេញ បានឲ្យដឹងថា ​«ថ្មីៗនេះ រដ្ឋបាលរាជធានីភ្នំពេញ បានទទួលព័ត៌មានថា នៅថ្ងៃទី០២ ខែមិថុនា ឆ្នាំ២០១៧ គណបក្សសង្គ្រោះជាតិបានកៀរគរអ្នកគាំទ្រនៅខេត្តកណ្ដាល កំពង់ស្ពឺ តាកែវ កំពង់ឆ្នាំង កំពង់ចាម និងខេត្តត្បូងឃ្មុំ មកចូលរួមដង្ហែក្បូនឃោសនានៅក្នុងរាជធានីភ្នំពេញ ប្រកាសនេះមិនស្របតាមបទបញ្ជា និងនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤ ពិសេសធ្វើឲ្យប៉ះពាល់ដល់ការរក្សាសន្ដិសុខ សណ្ដាប់ធ្នាប់ និងរបៀបរៀបរយសាធារណៈ ក្នុងរាជធានីភ្នំពេញ»។

មួយវិញទៀត បើតាមនីតិវិធីសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ តម្រូវឲ្យធ្វើការឃោសនាបោះឆ្នោត ក្នុងក្របខណ្ឌព្រំប្រទល់រដ្ឋបាលឃុំសង្កាត់រៀងៗខ្លួន ដោយមានការសម្របសម្រួលពីអាជ្ញាធរមានសមត្ថកិច្ច។

កត្តាទាំងនេះហើយ ទើបសាលារាជធានី បានចាត់ទុកថា ទង្វើរបស់គណបក្សសង្គ្រោះកំពុងតែអនុវត្តផ្ទុយពី បទបញ្ជាគណៈកម្មាធិការជាតិរៀបចំការបោះឆ្នោត ហើយម្យ៉ាងទៀតសាលាធានីខ្លាចក្រែងមានបញ្ហាអ្វីមួយកើតឡើងជាយថាហេតុ ដោយសារការមិនគោរពច្បាប់របស់បក្សប្រឆាំងមួយនេះ៕