(ភ្នំពេញ)៖ ម្ចាស់សំនៀងបទ «យួនចូលស្រុកហើយ» ដ៏ស្រស់សោភា កញ្ញា សូ ធារ៉ា បានចេញមកប្រកាសដើរចេញពីគណបក្សសង្រ្គោះជាតិ បន្ទាប់ពីបានរងការជេរប្រមាថយ៉ាងធ្ងន់ធ្ងរ និងអសុរោះពីអ្នកគាំទ្រ ក៏ដូចជាសកម្មជនរបស់គណបក្សសង្រ្គោះជាតិ។ ក្រៅពីការប្រកាសដើរចេញពីគណបក្សសង្រ្គោះជាតិហើយ កញ្ញា ធារ៉ា ក៏បានប្រកាសចូលរួមរស់ជាមួយគណបក្សប្រជាជនកម្ពុជា ហើយនឹងចូលរួមដង្ហែបក្សជាមួយសម្តេចតេជោ ហ៊ុន សែន នៅថ្ងៃទី០២ ខែមិថុនា ស្អែកនេះផងដែរ។
ធារ៉ា គឺជាតារាចម្រៀងមួយរូប ដែលបានធ្វើសកម្មភាពយ៉ាងសកម្មក្នុងការឃោសនារកសំឡេងឆ្នោតជូនគណបក្សសង្រ្គោះជាតិកាលពីឆ្នាំ២០១៣ ក៏ដូចជានៅក្នុងក្បួនបាតុកម្មរបស់គណបក្សសង្រ្គោះជាតិ ពេលដែលពួកគេមិនទទួលស្គាល់លទ្ធផលបោះឆ្នោតផងដែរ។ ធារ៉ា ត្រូវបានគេស្គាល់យ៉ាងច្បាស់តាមរយៈការច្រៀងចម្រៀងមានចំណងជើងថា «យួនចូលស្រុកហើយ» រួមនិងបទជាច្រើនផ្សេងទៀត។
ក្នុងវីដេអូប្រកាសដើរចេញពីគណបក្សសង្រ្គោះជាតិ នៅល្ងាចថ្ងៃទី០១ ខែមិថុនា ឆ្នាំ២០១៧នេះ កញ្ញា ធារ៉ា បាននិយាយថា សកម្មភាពរបស់កញ្ញា នាពេលកន្លងទៅបានដើរខុស ព្រោះតែការយល់ខុស និងជឿស្លុងលើការឃោសនារបស់គណបក្សសង្រ្គោះជាតិ។ ធារ៉ា បានបន្តថា ការយល់ខុសរបស់កញ្ញា បានធ្វើឲ្យកញ្ញា ជួបទុក្ខលំបាកជាច្រើនពេលរួមរស់ជាមួយគណបក្សសង្រ្គោះជាតិ តាំងពីមានរថយន្តជិះ រហូតដល់ជិះម៉ូតូឌុប តែគ្មានថ្នាក់ដឹកនាំគណបក្សសង្រ្គោះជាតិណាម្នាក់ធ្វើដឹងឮ និងជួយទុក្ខធុរៈរបស់កញ្ញានោះឡើយ។
ក្រៅពីប្រកាសដើរចេញពីគណបក្សសង្រ្គោះជាតិហើយនោះ នៅក្នុងវីដេអូនេះ កញ្ញា ធារ៉ា ក៏បានប្រកាសចូលរួមរស់ជាមួយគណបក្សប្រជាជនកម្ពុជា និងគាំទ្រសម្តេចតេជោ ហ៊ុន សែន ជាប្រមុខដឹកនាំនៅកម្ពុជា។ ជាពិសេសនោះនៅថ្ងៃទី០២ ខែមិថុនា ស្អែកនេះ កញ្ញា នឹងចូលរួមដង្ហែបក្សជាមួយសម្តេចតេជោ ហ៊ុន សែន ដែលមានអ្នកចូលរួមរហូតដល់ទៅ ១៥ម៉ឺននាក់ផងដែរ។
ធារ៉ា ដែលធ្លាប់រងការជេរតិះដៀលយ៉ាងធ្ងន់ធ្ងរពីអ្នកគាំទ្រ និងសកម្មជនរបស់គណបក្សសង្រ្គោះជាតិថា «ជនក្បត់ជាតិ ជនលក់ក្បាល និងជាអាយ៉ងយួន» ជាដើមនោះ បានប្រកាសមិនខ្លាចការជេរប្រមាថបន្តទៀតពីសំណាក់អ្នកគាំទ្រ និងសកម្មជនគណបក្សសង្រ្គោះជាតិនោះឡើយ ព្រោះការពិត និងភាពឈឺចាប់គ្មាននរណាដឹងជាងរូបកញ្ញា ដែលជាអ្នកបានជួបផ្ទាល់ពេលរស់ក្រោមដំបូលរបស់គណបក្សសង្រ្គោះជាតិនោះឡើយ។
សូមបញ្ជាក់ថា កញ្ញា ធារ៉ា គឺជាសកម្មជនគណបក្សសង្រ្គោះជាតិ ដ៏មានប្រជាប្រិយភាពមួយរូប បន្ទាប់ពីកញ្ញា ធី សុវណ្ណថា ដែលបានដើរចេញពីគណបក្សសង្រ្គោះជាតិ និងចូលរួមរស់ជាមួយគណបក្សប្រជាជនកម្ពុជា ដែលពួកគេធ្លាប់បានជេរយ៉ាងចាស់ដៃ ពេលនៅក្រោមដំបូលសង្រ្គោះជាតិ។ ក្រៅពីកញ្ញាទាំងពីររូប ក៏នៅមានសកម្មជនរបស់គណបក្សសង្រ្គោះជាតិជាច្រើនរូប ដែលសុទ្ធតែធ្លាប់លេចធ្លោក្នុងការជួយរកសំឡេងឆ្នោតជូនគណបក្សសង្រ្គោះជាតិកាលពីឆ្នាំ២០១៣ ក៏បានដើរចេញពីគណបក្សប្រឆាំងមួយនេះផងដែរ៕
