(ភ្នំពេញ)៖ ក្រោយពីមានការទទួលគាំទ្រយ៉ាងច្រើន ពីសំណាក់ប្រជាពលរដ្ឋកម្ពុជា ក្នុងការទស្សនាខ្សែភាគយន្ដថៃនោះ ស្ថានតំណាងពាណិជ្ជកម្ម ប្រចាំស្ថានទូតថៃនៅកម្ពុជា នឹងចំរៀបមហាស្រពភាពយន្តថៃ (Thai Film Festival 2017) លើកទី​៤ ឆ្នាំ២០១៧ នៅកម្ពុជា ដែលប្រារព្ធឡើងរយៈពេល៥ថ្ងៃ ចាប់ពីថ្ងៃទី៧ដលថ្ងៃទី១១ ខែមិថុនា ឆ្នាំ២០១៧។

ក្នុងរយៈពេល៥ថ្ងៃ នៃមហាស្រពភាពយន្តនេះ ប្រជាពលរដ្ឋកម្ពុជា អាចចូលទស្សនាខ្សែភាគយន្ដដោយឥតគិតថ្លៃ។

លោក ជីរ៉ាវុធ សុវ៉ាន់ណាអាត ភារធារី​ស្ថាតទូតថៃ ទទួលបន្ទុកផ្នែកពាណិជ្ជកម្ម ការិយាល័យកិច្ចការពាណិជ្ជកម្ម ស្ថានទូតថៃ ប្រចាំកម្ពុជា បានថ្លែងក្នុងសន្និសីទសារព័ត៌នៅព្រឹកថ្ងៃទី១ ខែមិថុនា ឆ្នាំ២០១៧នេះថា ប្រជាជនកម្ពុជា និយមចូលចិត្តភាពយន្ដថៃ ដែលបានចាក់បញ្ចាំងកន្លងមក ការនិយមពេញចិត្តនេះ ​កាន់តែមានការកើនឡើងជារៀងរាល់ឆ្នាំ។

លោកបានបន្ដថា ការរៀបចំកម្មវិធីចាក់ផ្សាយខ្សែភាពយន្ដថៃនេះ នឹងរៀបចំពីថ្ងៃនៅថ្ងៃទី៧ រហូតដល់ថ្ងៃទី១១ ខែមិថុនា ឆ្នាំ២០១៧ ​ដោយមានការរៀបចំសិក្ខាសាលា និងកម្មវិធីចាប់ដៃគូរពាណិជ្ជកម្ម ចាប់ពីម៉ោង០៩៖០០នាទីព្រឹក ដល់ម៉ោង០១៖០០នាទីរសៀល នាសណ្ឋាគារសូហ្វីតែល ភូគីត្រា ភ្នំពេញ។

លោកបន្ដថា «គោលបំណងនៃការរៀបចំសិក្ខាសាលា និងចាប់ដៃគូពាណិជ្ជកម្មនេះ ធ្វើឡើងដើម្បីបើកឱកាសឲ្យបណ្ដាក្រុមហ៊ុន ដែលពាក់ព័ន្ធជាមួយឧស្សាហកម្មភាពយន្ដទាំង២ប្រទេស មានពេលជួបគ្នា ពិភាក្សាគ្នាស្ដីពីចំណុច ដែលគួរឲ្យចំណាប់អារម្មណ៍ នៃកិច្ចការងារភាពយន្ដ និងជាឱកាសបើកឲ្យដៃគូជំនួញទាំងពីរ ពិគ្រោះគ្នាអំពីលទ្ធភាពជំនួញ និងស្វែងរកកិច្ចសហការផ្សេងៗ ដើម្បីជំរុញការងារភាពយន្ដនៃប្រទេសទាំង២។

តំណាងក្រសួងវប្បធម៌ និងវិចិត្រសិល្បៈ បានថ្លែងថា ក្រសួងតែងតែគាំទ្រកម្មវិធីនេះជារៀងរាល់ឆ្នាំ ព្រឹត្តិការណ៍ភាពយន្ដមហោស្រពថៃនេះ មិនមែនគ្រាន់តែបញ្ចាំងភាពយន្ដថៃ ក្នុងប្រទេសកម្ពុជាប៉ុណ្ណោះទេ តែជាឱកាសមួយ បង្កើតឲ្យមានការជួបគ្នារវាងផលិតករ ក្រុមហ៊ុននានាដែលប្រតិបត្តិករ លើវិស័យភាពយន្ដ។

លោកបញ្ជាក់ទៀតថា «នេះគឺជាឱកាសដ៏ល្អមួយ សម្រាប់ផលិតករភាពយន្ដកម្ពុជា ដែលអាចធ្វើការសិក្សាស្វែងយល់ ស្វែងរកទំនាក់​ទំនងសហប្រតិបត្តិការ ជាមួយពាណិជ្ជករថៃ»។

សូមបញ្ជាក់ថា ការរៀបចំកម្មវិធី Thai Film Festival ២០១៧ នេះនឹងធ្វើឡើងរយៈពេល៥ថ្ងៃ  ដោយមានការចាក់បញ្ចាំងភាពយន្ដ ថៃចំនួន៥រឿងជូនប្រពលរដ្ឋទស្សនា ដោយសេរីនៅរោងភាពយន្ដ Major Cineplex AEON Mall ដោយមានភាពយន្ដចំនួន៥ ដែល​នឹងត្រូវចាក់ផ្សាយជូនទស្សនា រួមមាន៖
* នៅថ្ងៃទី៧ ខែមិថុនា ឆ្នាំ២០១៧ នឹងចាក់បញ្ចាំងរឿង «លោកយាយអាយុ២០ឆ្នាំ»
* ថ្ងៃទី៨ ខែមិថុនា ឆ្នាំ២០១៧ នឹងចាក់បញ្ចាំងរឿង «តាមប្រមាញ់ខ្មោច»
* ថ្ងៃទី៩ ខែមិថុនា ឆ្នាំ២០១៧ នឹងចាក់បញ្ចាំងរឿង «ចំនៀន វីវៀន តួម៉ន»
* ថ្ងៃទី១០ ខែមិថុនា ឆ្នាំ២០១៧ នឹងចាក់បញ្ចាំងរឿង «ស្នេហាយើង»
* ថ្ងៃទី១១ ខែមិថុនា ឆ្នាំ២០១៧ នឹងចាក់បញ្ចាំងរឿង «ព្រះតេជគុណជេស 4G»
ដោយរយៈពេល៥ថ្ងៃនេះ នឹងចាក់បញ្ចាំមួយថ្ងៃមួយរឿង៕