(ភ្នំពេញ)៖ នៅថ្ងៃទី១ ខែមិថុនា ឆ្នាំ ២០១៧ននេះ ក្រុមការងារបច្ចេកទេសវាយតម្លៃ គម្របធនធានព្រៃឈើនៃអគ្គនាយកដ្ឋានរដ្ឋបាលការពារ និង អភិរក្សធម្មជាតិ ក្រសួងបរិស្ថាន បានសហការជាមួយអ្នកជំនាញបច្ចេកទេស FAO-UNREDD, JICA-CAMREDD, FCPF និងសាកលវិទ្យាល័យ អន្តរជាតិមួយចំនួន ទៅលើការវាយតម្លៃគម្របធនធានព្រៃឈើ កម្ពុជាឆ្នាំ២០១៦ ជាលទ្ធផលបឋមបង្ហាញថា «ធនធានគម្របព្រៃឈើមានអត្រាបាត់បង់ ជាមធ្យមប្រចាំឆ្នាំ គិតពីឆ្នាំ២០១៤ មកដល់ ឆ្នាំ២០១៦ ស្មើនឹង០,៨៥% ធៀបនឹងផ្ទៃដីសរុបទូទាំងប្រទេស។ លទ្ធផល នេះមិនរាប់បញ្ចូលចំការកៅស៊ូ ចំការដូងប្រេង និងដំណាំហូបផ្លែដទៃទៀតទេ»។
មន្រ្តីជាន់ខ្ពស់ក្រសួងបរិស្ថាន បានបញ្ជាក់ឱ្យឃើញថា ធនធានធម្មជាតិព្រៃឈើនៅកម្ពុជា ត្រូវបានអភិរក្សបានយ៉ាងល្អ ហើយអត្រានៃការបាត់បង់ គម្របព្រៃឈើ មានការធ្លាក់ចុះ គួរឱ្យកត់សម្គាល់។ ការធ្លាក់ចុះការបាត់បង់គម្របព្រៃឈើនេះ ដោយសារតែរាជរដ្ឋាភិបាលកម្ពុជា បានបង្ក្រាបប្រកប ដោយជោគជ័យ នូវបទល្មើសព្រៃឈើធំៗនៅទូទាំងប្រទេស និងបានបិទការនាំចេញឈើ ព្រមទាំងបានដាំដុះឡើងវិញនៅតំបន់ខ្លះ។ កម្លាំងសមត្ថកិច្ច បានបន្តចុះបង្ក្រាបជាប្រចាំលើបទល្មើសព្រៃឈើតូចៗបន្ថែមទៀត ដើម្បីកាត់បន្ថយការបំផ្លិចបំផ្លាញ ធនធានធម្មជាតិដោយជនល្មើសមួយចំនួនតូច។
លោក សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងថា ផ្អែកលើការកែទម្រង់វិស័យបរិស្ថានក្នុងពេលថ្មីៗនេះ ផ្ទៃដីតំបន់ការពារធម្មជាតិបានកើនឡើងរហូតដល់ទៅ ៧,៥លានហិចតា ស្មើនឹង ៤១% នៃផ្ទៃប្រទេស ដែលចំនួននេះច្រើនជាង២ដងនៃគោលដៅជីវៈចម្រុះសកល ដែលបានកំណត់នៅក្នុងកិច្ចប្រជុំកំពូលលើកទី១០ នៅប្រទេសជប៉ុន។ ផែនការ និងយុទ្ធសាស្រ្តទាំងអស់ដែលយើងបានរៀបចំ និងកំពុងអនុវត្តនាពេលបច្ចុប្បន្ននេះ បានឆ្លុះបញ្ចាំងឱ្យឃើញច្បាស់ពីជំហររបស់រាជរដ្ឋាភិបាល ក្នុងការគ្រប់គ្រងធនធានធម្មជាតិ សម្រាប់ការអភិវឌ្ឍប្រកបដោយចីរភាព ហើយដែលគោលការណ៍នេះបានដើរទន្ទឹមគ្នាជាមួយនឹងនិន្នាការពិភពលោក។
លោកបានសង្កត់ធ្ងន់ថា ការកាត់បន្ថយបទល្មើសព្រៃឈើ និងការកាត់បន្ថយអាត្រានៃការបាត់បង់គម្របព្រៃឈើនេះបានមកពីការខិតខំប្រឹថប្រែងរួមគ្នាទាំងស្ថាប័នរដ្ឋាភិបាល អង្គការសង្គមស៊ីវិល វិស័យឯកជននិងសហគមន៍មូលដ្ឋាន ជនជាតិដើមភាគតិច ក្នុងការការពារធនធានធម្មជាតិ និងអភិរក្សជីវៈចម្រុះសម្រាប់កូនចៅជំនាន់ក្រោយ និងជាទុនដ៏វិសេសវិសាលក្នុងការអភិវឌ្ឍប្រទេស។
ថ្មីៗនេះ តាមរយៈដំណើរទស្សនកិច្ច និងការបោះជំរុំនាពេលថ្មីៗនេះរបស់លោកឯកអគ្គរដ្ឋទូតអាមេរិក William Heidt រយៈពេល ២ថ្ងៃ នៅក្នុងតំបន់ដែន ជម្រកសត្វព្រៃ ព្រៃឡង់ ដែលជាទីជម្រកដែនព្រៃដ៏ខៀវស្រងាត់ធំបំផុតនៅក្នុងប្រទសកម្ពុជា លោកឯកអគ្គរដ្ឋទូតបានមានប្រសាសន៍ថា ស្ថានភាពព្រៃឈើ នៅតំបន់ព្រៃឡង់នៅតែល្អ ខ្ញុំឃើញថាឆ្នាំកន្លងមកមានការកាប់ឈើខុសច្បាប់ ប៉ុន្តែនៅតែមានដើមឈើធំៗច្រើន និងជាទូទៅព្រៃឈើនៅមានស្ថានភាពល្អ មិនតែប៉ុណ្ណោះស្ថានទូតអាមេរិកបានផ្តល់ថវិកាដល់គម្រោងអភិវឌ្ឍមួយដើម្បីជួយឧទ្យានុរក្ស ពង្រឹងច្បាប់ព្រៃឈើ និងជួយភូមិខ្លះក្នុងការបង្កើត សហគមន៍ព្រៃឈើដែរ។
ចំពោះលទ្ធផល សម្រេចចុងក្រោយ រួមមានទាំងគម្របព្រៃឈើជាតិ និងគម្របព្រៃឈើមិនរាប់បញ្ចូល ចំការកៅស៊ូ ចំការដូងប្រេង និងដំណាំហូបផ្លែ ដទៃទៀត និងផលឹតចេញក្នុងពេលខ្លីដ៏ឆាប់ខាងមុខ ហើយនឹងត្រូវផ្សព្វផ្សាយជាសាធារណៈនៅអំឡុងឆ្នាំ២០១៧។
លោក សាយ សំអាល់ រដ្ឋមន្ត្រី ក្រសួងបរិស្ថាន បានអំពាវនាវដល់គ្រប់ភាគីពាក់ព័ន្ធទាំងអស់សហការគ្នាក្នុងការទប់ស្កាត់ និងលុបបំបាត់នូវរាល់បទល្មើស ព្រៃឈើខ្នាតតូច និងមធ្យមដែលកំពុងកើតមាននៅតាមតំបន់មួយចំនួន និងចូលរួមដាំដុះដើមឈើគ្រប់ប្រភេទឡើងវិញ ដើម្បីបង្កើនគម្របព្រៃឈើនៅកម្ពុជាយើង៕
