(បន្ទាយមានជ័យ)៖ នាយឧត្តមសេនីយ៍​ កែ គឹមយ៉ាន សមាជិកអចិន្ត្រៃយ៍គណៈកម្មាធិការកណ្ដាល គណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាល​ ចុះជួយខេត្តបន្ទាយមានជ័យ បានបន្តជួបសំណេះសំណាលបញ្ចូលសមាជិក​ សមាជិកា​ ថ្មីចូលទៅក្នុងមហាគ្រួសារ គណបក្សប្រជាជន​ចំនួន៣,០០០នាក់ ជាយុវជន​ យុវនារី​ នៅថ្ងៃទី០១ ខែមិថុនា ឆ្នាំ២០១៧នេះ នៅទីស្នាក់ការគណបក្សខេត្ត។

​នាយឧត្តមសេនីយ៍​ កែ​ គឹមយ៉ាន​ បានលើកឡើងថា​ យុវជន​ យុវនារី​ ជាទំពាំងស្នងឬស្សី​ និងជាអ្នកបន្តវេនដ៏មានសក្តានុពល ​សម្រាប់ប្រទេសជាតិ​ ហើយ​បានកើតក្នុងសម័យនេះ​ ពិតជាមានសំណាងណាស់ ដោយបានទទួលការយកចិត្តទុកពីរាជរដ្ឋាភិបាល ដែលមានសម្តេច​តេជោហ៊ុន​ សែន​ ​នាយករដ្ឋមន្រ្តី​ និងជាប្រធានគណបក្សប្រជាជនកម្ពុជា​ ប្រទេសសុខសាន្ត​ និងអភិវឌ្ឍន៍​​បានទៅសាលារៀន​គ្រប់ទីកន្លែង​តាមចិត្ត ដែលជ្រើសរើស​​មានរបស់របរទំនើបប្រើប្រាស់​ មានបាយហូបឆ្អែត​ មានផ្លូវថ្នល់ស្អាតខ្វាត់ខ្វែង តភ្ជាប់ពីទីជនបទស្រែចម្ការរហូតដល់ទីក្រុងសម្រាប់ធ្វើដំណើ​រ​ទៅមកបានយ៉ាងស្រួល​ឆាប់រហ័ស។

ប្រធានក្រុមការងាររូបនេះ បន្ថែមពីនេះ ​​ប្រទេសកម្ពុជាបច្ចុប្បន្នមានសន្តិសុខ សុវត្ថិភាពបរិបូរណ៌គ្មានបារម្ភអ្វីឡើយ​ ផ្ទុយស្រឡះពីអ៊ុពូមីងឪពុកម្តាយរបស់ក្មួយៗ កាលពីជាង៣៥ឆ្នាំ​មុន ពួកគាត់នៅជាយុវជន​ យុវនារីដូចក្មួយតែគ្មានសំណាងដូចក្មួយទេ​ពេលនោះ គឺប្រទេសមានសង្រ្គាមកាប់សំលាប់គ្នាអស់ជាងបីលាននាក់​ ក្នុងរបបប្រល័យពូជសាសន៍ ប៉ុល​ ពត​ អាវខ្មៅ ដែលបានដឹកនាំប្រទេសធ្លាក់ចូលទៅក្នុងពិភពខ្មៅងងឹត អស់រយៈកាល៣ឆ្នាំ ៨ខែ ២០ថ្ងៃ​ដែលបានបង្ខំមនុស្សឲ្យធ្វើការជាទំងន់ដូចសត្វធាតុ​ គ្មានសាលារៀន​ គ្មានទេការហូប​ឆ្អែតនោះ​ ប៉ុន្ដែក្រោយមកក្រោមយុទ្ធសាស្រ្តឈ្នះ​ ឈ្នះ​ របស់សម្តេចតេជោ​ ហ៊ុន​ សែន​ សង្រ្គាមវាយប្រយុទ្ធគ្នារវាងខ្មែរ និងខ្មែរបានបញ្ចប់​រាជរដ្ឋាភិបាលដឹកនាំដោយគណបក្សប្រជាជន​កម្ពុជា​ ប្រទេសមានសុខសន្តិភាព​ ស្ថេរភាពនយោបាយ​ មានសណ្តាប់ធ្នាប់​របៀបរៀបរយ​ និងមានពេលវេលាគ្រប់គ្រាន់។

ជាមួយគ្នានេះ​ នាយឧត្តម​សេនីយ៍​ កែ​ គឹមយ៉ាន​ បានផ្តាំផ្ញើ និងអំពាវនាវ ដល់ក្មួយជាយុវជន​ យុវនារី​ទាំងអស់​ នៅខេត្តបន្ទាយមានជ័យ​ ជាពិសេសយុវជន​ យុវនារី ដែលទើបបញ្ចូលថ្មី​ទាំងអស់ ត្រូវពង្រឹងសាមគ្គីភាព​ ឯកភាពផ្ទៃក្នុង​ ចេះជួយយកអាសារគ្នា​ សហការគ្នាជាក្រុមខិតខំរៀនសូត្រ​យកចំណេះដឹងមកចូលរួមអភិវឌ្ឍន៍ខេត្ត​ ជៀសឆ្ងាយពីគ្រឿងញៀន​ មិនរក្សាទុក មិនជួញ​ មិនប្រើប្រាស់នូវគ្រឿងញៀនគ្រប់ប្រភេទ​ ជាពិសេសកុំជឿលើការឃោសនាកុហកបោកប្រាស ពីពួកអគតិគណបក្សផ្សេង​ បង្កភាពចលាចលអសន្តិសុខ​ ក្នុងសង្គម​តាមរយៈការសន្យា​ផ្សេង។

ទន្ទឹមនឹងនេះយុវជន យុវតី ត្រូវត្រៀមឯកសារសម្រាប់បោះឆ្នោត ទៅបោះឆ្នោតជូនគណបក្សប្រជាជនកម្ពជា តាមលេខរៀងដែលបានកំណត់តាមសង្កាត់-ឃុំនីមួយៗ ឲ្យបានគ្រប់គ្នានៅថ្ងៃទី៤​ ខែមិថុនា​ ឆ្នាំ២០១៧​ ខាងមុខ​ដើម្បីធ្វើការអភិវឌ្ឍមូលដ្ឋាន ឃុំ-សង្កាត់ បានរីកចម្រើន និងអនាគតរុងរឿង​បន្ថែមទៀត៕