(ភ្នំពេញ)៖ ប្រទេសកម្ពុជា ត្រូវបានបោះឆ្នោតជាសមាជិកគណៈក្រុមប្រឹក្សាប្រតិបត្តិកម្មវិធីអភិវឌ្ឍន៍របស់អង្គការសហប្រជាជាតិ, មូលនិធិអង្គការសហប្រជាជាតិសម្រាប់ប្រជាជន និងការិយាល័យអង្គការសហប្រជាជាតិសម្រាប់សេវាកម្មគម្រោង សម្រាប់អាណត្តិ ៣ឆ្នាំ ដោយចាប់ផ្តើមពីថ្ងៃទី០១ ខែមករា ឆ្នាំ២០១៨ ដល់ថ្ងៃទី៣១ ខែធ្នូ ឆ្នាំ២០២០។
ក្នុងសេចក្តីជូនព័ត៌មាននៅថ្ងៃទី៣១ ខែឧសភា ឆ្នាំ២០១៧នេះ ក្រសួងការបរទេសកម្ពុជា បានចាត់ទុកការបោះឆ្នោតឲ្យបេក្ខភាពកម្ពុជា ដោយក្រុមប្រឹក្សាសេដ្ឋកិច្ច និងសង្គមរបស់អង្គការសហប្រជាជាតិ បានបញ្ជាក់ពីការទទួលស្គាល់ជាអន្តរជាតិនូវតួនាទីដ៏សំខាន់ ដែលកាន់តែកើនឡើងរបស់កម្ពុជា ក្នុងការចូលរួមចំណែកកំណត់របៀបវារៈលើមូលបទសំខាន់ស្តីពីការអភិវឌ្ឍប្រកបដោយចីរភាព។
ក្រសួងការបរទេស បានគូសបញ្ជាក់ថា ក្នុងឋានៈជាប្រទេសមានកំណើនសេដ្ឋកិច្ចលឿនជាមួយការសម្រេចបានគួរឲ្យកត់សម្គាល់ក្នុងការបន្ថយភាពក្រីក្រ ក៏ដូចជាគោលដៅអភិវឌ្ឍន៍សហវត្ស កម្ពុជាមានជំនឿថា បទពិសោធន៍របស់កម្ពុជា អាចជាគុណប្រយោជន៍ដល់កិច្ចប្រឹងប្រែងរបស់អង្គការសហប្រជាជាតិក្នុងការដោះស្រាយបញ្ហាអភិវឌ្ឍន៍សកលលោក៕
