(ក្រចេះ)៖ ក្នុងតែ១ថ្ងៃប៉ុណ្ណោះ កម្លាំងអាវុធហត្ថក្រុងក្រចេះ ចុះបង្ក្រាបបានករណីជួញដូរគ្រឿងញៀន បានចំនួន៣កន្លែង ដោយឃាត់ខ្លួនបានជនសង្ស័យ ចំនួន៥នាក់ និងដកហូតបានវត្ថុតាងមួយចំនួនធំ។ ប្រតិបត្តិការនេះមានការសម្របសម្រួលដោយលោក ជា សុភក្រ័ ព្រះរាជអាជ្ញារងអមសាលាដំបូង ខេត្តក្រចេះ នៅថ្ងៃទី៣០ ខែឧសភា​ ឆ្នាំ២០១៧។

មន្ត្រីអាវុធហត្ថបានឲ្យដឹងថា ការចុះបង្រ្កាប ការជួញដូរនិងប្រើប្រាស់នូវសារធាតុញៀន ខុសច្បាប់ចំនួន៣កន្លែង ក្នុងថ្ងៃតែ១ ខាងលើនេះរួមមាន៖
កន្លែងទី១៖ នៅភូមិអូរឬស្សី សង្កាត់ក្រចេះ ឃាត់ខ្លួនជនសង្ស័យចំនួន៣នាក់ ពាក់ព័ន្ធនិងប្រើប្រាស់សារធាតុញៀន ទី១៖ ឈ្មោះ ម៉េង សុគុន្ធឆៃ ភេទប្រុស អាយុ២០ មានទីលំនៅសង្កាត់អូរឬស្សី ទី២៖ឈ្មោះ ម៉េង សុគុន្ធឆាយ ភេទប្រុស អាយុ១៧ឆ្នាំ រស់នៅសង្កាត់អូរឬស្សី ទី៣៖ ឈ្មោះ ឡុង វឌ្ឍនៈ ហៅពេជ្រ ភេទប្រុស អាយុ២១ឆ្នាំ រស់នៅភូមិដូនជ្រាំ សង្កាត់ក្រចេះ និងដកហូតវត្ថុតាងបានរួមមាន៖ ម៉ូតូម៉ាក់ Scoopy ពណ៌ស គ្មានស្លាក់លេខ១គ្រឿង ម្សៅក្រាមពណ៌ស ប្រភេទម៉ាទឹកកក ចំនួន២កញ្ចប់។

កន្លែងទី២៖ នៅខាងត្បូងមណ្ឌលទេសចរណ៍ ខេត្តភូមិក្រចេះ សង្កាត់ក្រចេះ ឃាត់ខ្លួនជនសង្ស័យ១នាក់ ពាក់ព័ន្ធករណីជួញដូរប្រើប្រាស់សារធាតុញៀន ឈ្មោះ ឆន ផានិត ភេទប្រុស អាយុ២១ឆ្នាំ រស់នៅភូមិតាលុស ឃុំបុសលាវ ស្រុកចិត្របុរី ខេត្តក្រចេះ និងដកហូតវត្ថុតាងបានរួមមាន៖ ម៉ូតូC១២៥សេរី ឆ្នាំ២០១២ ពណ៌ខ្មៅ១គ្រឿង និងទូរសព្វ័ដៃ១គ្រឿង។

កន្លែងទី៣៖ នៅចំនុចភូមិកាប៉ូ សង្កាត់អូរឬស្សី ឃាត់ខ្លួនជនសង្ស័យ១នាក់ ឈ្មោះ ស៊ូ គឹមសឿន ភេទប្រុស អាយុ៣២ឆ្នាំ រស់នៅភូមិកាប៉ូ ពាក់ព័ន្ធករណីជួញដូរ និងប្រើប្រាស់ នូវសារធាតុញៀន និងដកហូតវត្ថុតាងបានរូមមាន៖ ម្សៅក្រាមពណ៌ស ប្រភេទម៉ាទឹកកក ចំនួន១៥កញ្ចប់ ទូរស័ព្ទ១គ្រឿង ចិញ្ជៀនលោហធាតុ ពណ៌លឿង១វង់ និងសំភារៈចែកចាយគ្រឿងញៀន និងឧបករណ៍ជក់មួយចំនួន។

បច្ចុប្បន្ន ជនសង្ស័យទាំង៥នាក់ រួមនិងវត្ថុតាងខាងលើ ត្រូវកម្លាំងសមត្ថកិច្ច ឃាត់និងរក្សាទុក នៅមូលដ្ឋានកងរាជអាវុធហត្ថក្រុងក្រចេះ ដើម្បីចាត់ការបន្ដតាមនិតិវិធី៕