(ភ្នំពេញ)៖ ក្រុមហ៊ុនកំចាត់សត្វល្អិត ដែលពីមុនមានឈ្មោះថា ប៉ែស្ដប៉ាស្ត័រ ខូអិលធីឌី (Pestbusters Cambodai Co.,Ltd) បានសម្រេចប្រកាសប្ដូរឈ្មោះទៅជា «Antitermite» ជាផ្លូវការ នៅថ្ងៃទី៣០ ខែឧសភា ឆ្នាំ២០១៧នេះ នៅភោជនីយដ្ឋាន Fox Bistro បន្ទាប់ពីក្រុមហ៊ុននេះ ទទួលបានការគាំទ្រពីអតិថិជន កាន់តែច្រើន និងបញ្ចប់កិច្ចព្រមព្រៀងអាជ្ញាប័ណ្ណ ពីក្រុមហ៊ុន Pestbusters។
លោក ម៉ើ បូរ៉ា នាយកគ្រប់គ្រងទូទៅប្រចាំក្នុងក្រុមហ៊ុន «Antitermite» បានថ្លែងឲ្យដឹងថា ក្រុមហ៊ុនកំចាត់សត្វល្អិត «Antitermite» នឹងផ្ដល់សេវាកម្មខាងផ្នែកបរិស្ថាន ដំបូងគេបង្អស់នៅក្នុងប្រទេសកម្ពុជា អស់រយៈពេលជាង២០ឆ្នាំមកហើយ។ ក្រុមហ៊ុន «Antitermite» ត្រូវបានគេស្គាល់ពីមុន ក្រោមឈ្មោះថា ប៉ែស្ដប៉ាស្ត័រ ខូអិលធីឌី (Pestbusters Cambodai Co.,Ltd) ដែលទទួលអាជ្ញាប័ណ្ណ ពីក្រុមហ៊ុន Pestbusters (អាស៊ីប៉ាស៊ីហ្វិក) អិលធីឌី។
លោកបន្តថា ម្ចាស់ និងប្រធាន គ្រប់គ្រងក្រុមហ៊ុន បានសម្រេចបញ្ឈប់កិច្ចព្រមព្រៀង អាជ្ញាប័ណ្ណ ដោយសារតែមានការផ្លាស់ប្ដូរមួយចំនួន នៅក្នុងក្រុមហ៊ុន Pestbusters។ ប៉ុន្តែអ្វីៗ មិនត្រូវបានផ្លាស់ប្ដូរនោះទេ។ ការផ្លាស់ប្ដូរស្លាកសញ្ញាជាថ្មីនេះ មិនមានការប៉ះពាល់ដល់ប្រតិបត្តិការ និងការផ្ដល់សេវាកម្មរបស់ក្រុមហ៊ុននោះឡើយ។ ផ្ទុយទៅវិញឈ្មោះថ្មីមួយនេះ បានបង្ហាញប្រាប់អ្នកថា យើងមិនត្រឹមតែអាចកំចាត់សត្វល្អិត ចង្រៃនោះទេ យើងថែមទាំងមានជំនាញច្បាស់លាស់ ក្នុងការកំចាត់សត្វកណ្ដៀរទៀតផង។ ការផ្លាស់ប្ដូរឈ្មោះនេះ ឆ្លុះបញ្ចាំងពីទំនុកចិត្តរបស់យើង ក្នុងការប្រតិបត្តិការ នូវសេវាកម្មដែលយើងជឿជាក់ថា ធ្វើបានល្អបំផុត។
លោក ម៉ើ បូរ៉ា បានថ្លែងសង្កត់ធ្ងន់ថា ក្រុមហ៊ុន Antitermite (អេនធីធើម៉ាយថ៍) បានផ្តល់សេវាកម្មដល់អតិថិជនជាច្រើន ដែលមានដូចជាសណ្ឋារគារធំៗ លំដាប់ផ្កាយ៥ អាផាតមិន ខុនដូប្រណីត, ស្ថានទូតនិងបរិវេណជុំវិញស្ថានទូត, វីឡាឯកជន, អគារការិយាល័យពាណិជ្ជកម្ម,ផ្សារទំនើប, រោងចក្រ, ហាងលក់ម្ហូប និងភេសជ្ជៈ គុណភាពតាមសំណង់ផ្សេងៗ និងគ្រឹះស្ថានដទៃទៀត ប្រកបដោយគុណភាពល្អគ្មានគូប្រៀប។ យើងផ្តល់ជូនអតិថិជន នូវតម្លៃថោក សមរម្យ តែប្រកដដោយគុណភាព។ ក្រុមការងារត្រួតពិនិត្យគុណភាពរបស់យើង (QCs) មានចំណេះដឹង និងទទួលបានការបណ្តុះបណ្តាល ពីក្រៅប្រទេស រួមជាមួយនឹងបច្ចេកវិទ្យាថ្មីបំផុត ក្នុងការត្រួយពិនិត្យ ដើម្បីធានាថា ទីកន្លែងរបស់អ្នកទទួលបានសេវាកម្មដ៏ល្អឥតខ្ចោះ។
លោកបញ្ជាក់ថា យើងផ្តល់ជូនអតិថិជន នូវរបាយការណ៍ជាទៀងទាត់ ដើម្បីឲ្យអតិថិជនរបស់យើងអាចពិនិត្យវាយតម្លៃ បានរាល់ពេលនៃការធ្វើសេវាកម្ម។ លើសពីនេះទៅទៀត យើងមានកិច្ចប្រជុំជារៀងរាល់សប្តាហ៍ ដើម្បីធ្វើការត្រួតពិនិត្យគុណភាពផ្ទៃក្នុង និងដើម្បីពិភាក្សាពីបញ្ហានានា ដែលអតិថិជនរបស់យើង កំពុងប្រឈមមុខ ហើយធ្វើការសម្រេចយកនូវវិធានការណ៍ ដែលចាំបាច់ក្នុងការដោះស្រាយ៕
