(ភ្នំពេញ)៖ លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា នៅថ្ងៃទី៣០ ខែឧសភា ឆ្នាំ២០១៧នេះ បានលើកឡើងថា គោលនយោបាយដែលថា នឹងផ្តល់ប្រាក់ ចំនួន៥០ម៉ឺនដុល្លារ ១ឃុំ ក្នុង១ឆ្នាំ របស់គណបក្សប្រឆាំង គឺជាគោលនយោបាយបានត្រឹមតែសន្យា មិនអាចក្លាយជាការពិតនោះទេ។
លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា បានសរសេរយ៉ាងដូច្នោះថា «សូមមេត្តាគិតគូរ ពិចារណា ប្រសិនជាការបោះឆ្នោតនោះ ដោយផ្អែកតាមគោលនយោបាយសន្យាផ្តល់លុយ កន្លះលានមួយឃុំៗនេះ វាទៅរួចទេ! វាមិនដែលអ្នកណាអាចកាត់ខោអាវ តែមួយលេខស្លៀកពាក់បានគ្រប់ឃុំនោះទេ!! ក្តីលោភលន់លុយហួសប្រមាណ គឺនាំមកនូវក្តីវិនាស!។ គោលនយោបាយសន្យាហ្នឹង មានបោះលុយចាយ និងគោលនយោបាយកំណត់ចំនួនទឹកលុយសំរាប់ចាយ! ប្រហែលជា ដៀតែខ្នូច ដូចតែគ្នា!! អត់ដដែល!!»។
ដើម្បីទាក់ទាញសំឡេងឆ្នោតពីប្រជាពលរដ្ឋ គណបក្សសង្រ្គោះជាតិ នាថ្មីៗនេះ បានដាក់ចេញនូវគោលនយោបាយអាទិភាពចំនួន៥ចំណុច ផ្តោតសំខាន់លើការផ្តល់ សិទ្ធិអំណាចក្នុងការសម្រេចទៅដល់មេឃុំ ឬចៅសង្កាត់។ ក្រៅពីគោលនយោបាយអាទិភាពទាំង៥ចំណុចទៅ គណបក្សប្រឆាំងធំជាងគេនៅកម្ពុជាមួយនេះ ក៏បានប្រកាសផ្តល់ថវិកា ៥០ម៉ឺនដុល្លារសម្រាប់មួយឃុំ/សង្កាត់ ដើម្បីអភិវឌ្ឍន៍ឃុំ/សង្កាត់ ឲ្យបានកាន់តែល្អប្រសើរ នៅពេលបក្សនេះ ឈ្នះឆ្នោតដឹកនាំរាជរដ្ឋាភិបាល។
លោកអគ្គនាយកមជ្ឈមណ្ឌលកម្ចាត់មីនកម្ពុជា បានបញ្ជាក់ថា គ្មានប្រទេសកាន់លទិ្ធប្រជាធិបតេយ្យច្រើនលើលោកនេះ អាចសន្យាចំនួនទឹកលុយសម្រាប់ចាយច្បាស់ៗ ដូចគណបក្សមួយនៅកម្ពុជា ដោយនៅទូទាំងប្រទេស ចាយលុយស្មើៗគ្នា ក្នុងរយៈពេលស្មើៗគ្នា នៅកន្លែងខុសៗគ្នាអស់លុយកន្លះៗលានដុល្លារ (៥០ម៉ឺន=៥០០,០០០ ដុល្លារ)មួយឆ្នាំៗរយៈពេល៥ឆ្នាំ ស្មើ២លាន៥សែនដុល្លារក្នុងមួយឃុំៗនោះទេ»។
លោកថា «ប្រហែលអ្នករៀបចំគោលនយោបាយគេយល់ថា ប្រជាពលរដ្ឋខែ្មរជាពិសេសប្រជាជនតាមជនបទនិងអ្នកក្រីក្រ លឺចំនួនទឹកលុយច្រើនៗ អាចរំភើបលោភលន់ ចង់បាននិងមានចំណង់គាំទ្រ។ ខែ្មរលឺចំនួនលុយច្រើនមិនបានទេ ដឹងតែចង់បានអញ្ចឹងហ្ន!!»៕
