(ភ្នំពេញ)៖ ក្រុមហ៊ុនធានារ៉ាប់រងអាយុជីវិតថ្មីមួយទៀតហើយ មានឈ្មោះថា អេចអាយម៉ាក្រូ អិនសូរេន (H.I Micro Insurance) បានបង្ហាញខ្លួនឡើង នៅក្នុងប្រទេសកម្ពុជា ដោយបានប្រើទុនសរុប ប្រហែល៣០លានដុល្លារ និងមានគោលដៅគិតគូ ចំពោះបញ្ហាអាយុជីវិតពីគ្រោះថ្នាក់ចរាចរណ៍ នៅតាមដងផ្លូវជារាល់ថ្ងៃ ដែលជាអាទិភាពចំបងរបស់ក្រុមហ៊ុន។
លោក សារិន រ៉ាត់ណាត់ដាណៃ នាយកនៃក្រុមហ៊ុន H.I Micro Insurance បានថ្លែងក្នុងពិធីសម្ពោធ នាពីយប់ថ្ងៃទី២៩ ខែឧសភា ឆ្នាំ២០១៧ ថា ក្រុមហ៊ុនH.I Micro Insurance ត្រូវបានបង្កើតឡើង ដោយក្រុមអ្នកវិនិយោគមកពីប្រទេសកម្ពុជា ថៃ និង អូស្រ្តាលី ដែលយកចិត្តទុកដាក់ ពីសុវត្ថិភាពលើកដងផ្លូវធ្វើដំណើរ នៅកម្ពុជា ខណៈដែលបញ្ហាសុវត្ថិភាព លើដងផ្លូវធ្វើដំណើរនេះ នៅតែជាក្តីកង្វល់របស់រាជរដ្ឋាភិបាលកម្ពុជា។ ការពិត បណ្តាប្រទេសភាគច្រើន នៅលើពិភពលោកមានសេវាធានារ៉ាប់រង គ្រោះថ្នាក់ ចរាចរណ៍ គ្របដណ្តប់ជនរងគ្រោះ យូរមកហើយ ប្រជាពលរដ្ឋទាំងនោះ ត្រូវជាប់កាតព្វកិច្ចបង់ធានារ៉ាប់រងនេះ។
នាយកនៃក្រុមហ៊ុន H.I Micro Insurance រូបនេះ បានបញ្ជាក់ថា RVI ជាសេវាធានារ៉ាប់រងគ្រោះថ្នាក់ចរាចរណ៍ គ្របដណ្តប់លើជនរងគ្រោះនៅទូទាំងកម្ពុជា។ អ្នកបើកបរយានយន្តគ្រប់ប្រភេទ និងអ្នកដំណើរទាំងអស់ នឹងទទួលបានការព្យាបាលភ្លាមៗ និងសេវាហិរញ្ញវត្ថុក្នុងករណីមានគ្រោះថ្នាក់ចរាចរណ៍។ ការសម្រេចចិត្តបង្កើត RVI គឺដោយសារអាត្រាគ្រោះថ្នាក់ចរាចរណ៍នៅកម្ពុជា នៅមានកម្រិតខ្ពស់ ដែលជាមូលហេតុសំខាន់ ធ្វើឲ្យមានអាត្រាមនុស្សស្លាប់ និងពិការភាពច្រើន ព្រមទាំងក្លាយជាបន្ទុក ផ្នែកហិរញ្ញវត្ថុដល់ក្រុមគ្រួសារ។
លោក សារិន រ៉ាត់ណាត់ដាណៃ បានប្រាប់បន្តទៀតថា ក្រុមហ៊ុនថ្មីមួយបំរើដល់ប្រជាពលរដ្ឋ ក្នុងការពារអាយុជីវិតចំពោះបញ្ហាគ្រោះថ្នាក់ ចរាចរណ៍ដែលមិនដឹងមុន ឬ នៅពេលណាមួយកើតឡើង។ សេវាកម្មក្រុមហ៊ុននេះ មានលក្ខណៈពិសេស គឺជនរងគ្រោះទាំងសងខាង រួមទាំងអ្នកថ្មើរជើង ឬភាគី ពាក់ព័ន្ធក្នុងគ្រោះថ្នាក់ចរាចរណ៍ទាំងអស់ នឹងត្រូវបានបញ្ជូនទៅមន្ទីរពេទ្យ ភ្លាមៗ។ ជនរងគ្រោះទាំងអស់ មិនបាច់ចំណាយពេលឈ្មោះប្រកែកគ្នា រកខុសត្រូវឡើយ ពោលគឺខាងក្រុមហ៊ុននេះ ធានារ៉ាប់រង នឹងចេញថ្លៃសំណង លើការព្យាបាល និងហរិញ្ញវត្ថុ ហើយការស្វែងរកខុសត្រូវ ទុកឲ្យប៉ូលិសស៊ើបអង្កេតពេលក្រោយ។
សូមបញ្ជាក់ថា តម្លៃសេវាធានារ៉ាប់រង មានដូចជា ១៧ដុល្លារអាមេរិក/ឆ្នាំ សម្រាប់ម៉ូតូ។ ២០ដុល្លារសម្រាប់ រឺម៉ក់កង់បី ឬម៉ូតូ បូកបន្ថែមផ្នែកផ្សេងទៀត។ ៧០ដុល្លារ/ឆ្នាំសម្រាប់រថយន្តកង់បួន (អ្នកដំណើរមិនលើស៥នាក់)។ ៨០ដុល្លារ/ឆ្នាំសម្រាប់រថយន្តកង់បួន (អ្នកដំណើរលើស៥នាក់)។ និង៩០ដុល្លារ/ឆ្នាំ សម្រាប់រថយន្តផ្សេងៗដែលមានកង់ច្រើនជាង៤៕
