(ព្រះសីហនុ)៖ នៅតែប៉ុន្មានថ្ងៃទៀត ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ នឹងមកដល់ពោលនៅថ្ងៃទីអាទិត្យទី៤ ខែមិថុនា ឆ្នាំ២០១៧ ដែលទន្ទឹមគ្នានេះ កងកម្លាំងប្រដាប់អាវុធហត្ថទូទាំងប្រទេស បានត្រៀមរួចរាល់ និងកំពុងការពារយ៉ាងប្រុងប្រយ័ត្ន លើបញ្ហាសន្តិសុខ និងសណ្តាប់ធ្នាប់ ទាំងយុទ្ធនាការឃោសនារកសម្លេងឆ្នោត ថ្ងៃបោះឆ្នោត និងថ្ងៃរាប់សន្លឹកឆ្នោត។
ដោយឡែក សម្រាប់កងកម្លាំងនគរបាលខេត្តព្រះសីហនុវិញ នៅព្រឹកថ្ងៃទី៣០ ខែឧសភា ឆ្នាំ២០១៧នេះ ឧត្តមសេនីយ៍ទោ ជួន ណារិន្ទ ស្នងការនគរបាលខេត្ត បានបើកកិច្ចប្រជុំពង្រឹងការងារការពារ សន្តិសុខ សណ្តាប់ធ្នាប់សាធារណៈជូនប្រជាពលរដ្ឋ ភ្ញៀវជាតិ ភ្ញៀវអន្តរជាតិ និង ការពារក្នុងយុទ្ធនាការឃោសនា បោះឆ្នោត ព្រមទាំងបំពាក់ជូនសម្ភារអន្តរាគមន៍បន្ថែម ជូនកងកម្លាំង។
លោកស្នងការបានឲ្យដឹងថា អំណោយទាំងនេះបានមកពីនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និង មួយចំនួនទៀតរបស់លោក ស សុខា អ្នកតំណាងរាស្រ្តមណ្ឌលព្រៃវែងផងដែរ។
នៅចំពោះនគរបាលទាំងអស់ លោកឧត្តមសេនីយ៍ស្នងការ បានប្រាប់ទៅកងកម្លាំង ដែលមានភារកិច្ច ការពារគ្រប់គោលដៅ ត្រូវបង្កើនការប្រុងប្រយ័ត្ន ការពារសន្តិសុខសណ្តាប់ធ្នាប់ ក្នុងដំណើរការ ឃោសនា, បោះឆ្នោត, និងរាប់សន្លឹកឆ្នោតឲ្យប្រព្រឹត្តទៅ ប្រកបដោយសុខសន្តិភាព គ្មានការគំរាមកំហែង ការបំភិតបំភ័យ និងអំពើហិង្សាណាមួយកើតឡើងជាដាច់ខាត។
លោកស្នងការ បានបញ្ជាក់ថា «កងកម្លាំងទាំងអស់ ត្រូវគោរពវិន័យលេខ០០៦របស់កងកម្លាំងនគរបាលជាតិ មិនត្រូវប្រើប្រាស់ឯកសណ្ឋានធ្វើឲ្យប៉ះពាល់ដល់ប្រជាពលរដ្ឋ នាំឲ្យពួកគាត់មានការថ្នាំងថ្នាក់ឡើយ។ ត្រូវប្រកាន់ជំហរអព្យាក្រឹត្យគោរពច្បាប់ជាគោល។ ប្តេជ្ញាការពារច្បាប់ រដ្ឋធម្មនុញ្ញ ការពាររាជរដ្ឋាភិបាលស្របច្បាប់ ដែលកើតឡើងដោយការបោះឆ្នោត តាមលទ្ធិប្រជាធិបតេយ្យ។ ជនណា ឬក្រុមណាមានចេតនាបង្កអសន្តិសុខសង្គម រារាំង ដល់ការបោះឆ្នោត តាមរយៈការញុះញង់ ធ្វើបដិវត្តន៍ព៌ណ បំផ្លាញលទ្ធិប្រជាធិបតេយ្យ និងបំផ្លាញការបោះឆ្នោត យើងជាកងកម្លាំងនគរបាលជាតិ ត្រូវតែទប់ស្កាត់ និងបង្ក្រាបឲ្យបានទាន់ពេល»។
ជាមួយគ្នានេះ លោកឧត្តមសេនីយ៍ទោ ជួន ណារិន្ទ បានប្រគល់ជូនសម្ភារប្រើប្រាស់ជាច្រើនមុខ ជូនកងកម្លាំងរៀបរយអន្តរាគមន៍ ក្នុងនោះមាន៖
ទី១-ខោអាវបេសកកម្ម ចំនួន១៤៨កំផ្លេ
ទី២-ស្បែកជើងកែង ចំនួន១៤៨
ទី៣-មួកប៉ារ៉ាស៊ីត ចំនួន១៤៧
ទី៤-មីចំនួន១៦កេស
ទី៥-ត្រីខេ២កេស
ទី៦-ទឹកសុទ្ធចំនួន៤៦០យួរ អធិការដ្ឋាន ស្រុកព្រៃនប់១៦០យូរ កំពង់សិលា១០០យួរ ក្រុងព្រះសីហនុ១០០យួរ និងស្ទឹងហាវ១០០យួរ និងទី៧- ខ្សែក្រវាត់សាន់ទារ៉ុង កាបូបស្ពាយ និងស្រោមកាំភ្លើងមួយចំនួនទៀត៕
