​(ភ្នំពេញ)៖ នៅក្នុងឱកាសទិវាកុមារអន្តរជាតិ ខួបលើកទី៦៨ ថ្ងៃទី០១ ខែមិ​ថុនា ឆ្នាំ២០១៧នេះ រោងភាពយន្ត Legend បានរៀបចំកម្មវិធីសប្បុរសធម៌មួយ ដើម្បីជួលដល់កុមារកំព្រាប្រមាណ ជាង៧០០នាក់ ដែលសុទ្ធសឹងមានជីវភាពខ្វះខាត និងរស់នៅក្នុងអង្គការមូលនិធិកុមារកម្ពុជា Cambodia Children Fund (CCF) ក្នុងសង្កាត់ស្ទឹងមានជ័យ។

យ៉ាងហោចណាស់​ មានកុមារមកពីគ្រួសារក្រីក្រ និងកុមារកំព្រា ប្រមាណ៧២០នាក់កំពុង​ស្នាក់នៅ សិក្សា​និងត្រូវការ​ជំនួយ​​ពីសប្បុរសជនបន្ថែម ដើម្បីបន្តការរស់នៅ​ និងសិក្សារបស់ពួកគេ។ ដើម្បីជាកម្លាំងចិត្ត និងជាការជួយសម្រាលការ​លំបាក​របស់ពួកគេ រោងភាពយន្ត Legend បានបង្កើតឲ្យមានកម្មវិធីសប្បុរសធម៌ មួយរួមគ្នាជាមួយសប្បុរសជន។

តំណាងរោងភាពយន្ត Legend   បានលើកឡើងថា នេះមិនមែនជាព្រឹត្តិការណ៍លើកដំបូងទេ ដែលLegend បានបង្កើតឡើង ហើយនេះ គឺជាផ្នែកមួយនៃការជួយត្រឡប់ទៅសង្គមវិញ អស់រយៈពេល៦ឆ្នាំមកហើយ។ ​នេះគឺជាកម្មវិធីថ្មី ដែលធ្វើឡើងដើម្បីចូលរួម​លើកទឹកចិត្ត ដល់​កុមារដែលកំពុងប្រឈម នឹងភាពខ្វះខាត បាត់បង់កម្លាំងចិត្ត និងរស់នៅជាមួយ នឹងជំងឺប្រចាំកាយ។ អ្វីដែលយើង នឹងរួមគ្នាធ្វើនៅពេលនេះ ព្រោះយើង ស្រឡាញ់ យើងយកចិត្តទុកដាក់ យើងចែករំលែក និងយើង ផ្គត់ផ្គង់ដល់ពួកគេ។

តំណាងដដែលរូបនេះ បានបញ្ជាក​ថា កម្មវិធីនេះនឹងផ្តល់ឱកាសដល់ក្រុមហ៊ុន ដៃគូសហការ សប្បុរសជនដែលមានបំណង​ចូលរួមជួយដល់ពួកគេ ទាំងសម្ភារៈសិក្សា អាហារ និង ថវិកា ទាំងការអញ្ជើញ​ទៅចូលរួមដោយផ្ទាល់ និងផ្តល់មកកាន់រោងភាពយន្ត Legend ​។ ក្រៅពីការជួយ​ជាសម្ភារៈ អាហារ និងថវិកា រោងភាពយន្ត មួយនេះ​ក៏បានធ្វើការប្រកាស ទទួលយកអ្នកមានបំណងជួយរៀបចំ​កម្មវិធីនានា ពីក្រុមយុវជនស្ម័គ្រចិត្ត ផងដែរ។

 ប្រអប់សំបុត្រ សម្រាប់ទទួលជំនួយពីសប្បុរសជន ចាប់ពីថ្ងៃទី២៥ខែឧសភា​នេះ​តទៅ នៅគ្រប់រោង​ភាពយន្ត Legend ។ ​កម្មវិធីខាងលើ នឹងត្រូវធ្វើឡើងនៅថ្ងៃទី១មិថុនា ខាងមុខនេះ ដោយ​ចាប់ពីម៉ោង៧ដល់​ម៉ោង​១១​និង៣០ នាទី ដែលមានការថ្លែងសន្ទរកថា ស្វាមគមន៍ ពីតំណាងអង្គការមូលនិធិកុមារកម្ពុជា (CCF) ពីរោងភាពយន្ត Legend ការចែកអំណោយ​ដល់សិស្សានុសិស្ស ការលេងហ្គេមកម្សាន្តសម្រាប់កុមារ ការថតរូបជុំគ្នាជាដើម។ នៅរសៀលថ្ងៃដដែល ក៏នឹងមានកម្មវិធីពិសេសៗជាច្រើនទៀត ដូចជាការសម្តែង និងច្រៀងរបស់ក្រុមកុមារ​មកពីអង្គការមូលនិធិកុមារកម្ពុជា (CCF)  ហើយក៏នឹងមានការចាក់បញ្ជាំងភាពយន្ត គំនូរជីវចលដ៏ល្បីល្បាញគឺរឿង«Sing» ជូនពួកគេទស្សនា​ផងដែរ៕ ​