(ភ្នំពេញ)៖ អ្នកនាំពាក្យក្រសួងមហាផ្ទៃ នាយឧត្តមសេនីយ៍ ខៀវ សុភ័គ នៅព្រលប់ថ្ងៃទី២៦ ខែឧសភា ឆ្នាំ២០១៧នេះ បានប្រកាសគាំទ្រទាំងស្រុងដល់ សេចក្តីថ្លែងការណ៍របស់ អ្នកនាំពាក្យក្រសួងការពារជាតិ ជុំវិញការទាត់ចោលសេចក្តីថ្លែងការណ៍មួយរបស់ ខុមហ្វ្រែល និងអង្គការសង្គមស៊ីវិលមួយចំនួន ដែលបានរិះគន់ធ្ងន់ធ្ងរទៅលើមន្រ្តីជាន់ខ្ពស់ នៃកងយោធពលខេមរភូមិន្ទ ចំពោះការព្រមានបង្រ្កាបលើជនបង្កអសន្តិសុខ ក្នុងអំឡុងពេលបោះឆ្នោត។
ការបង្ហាញជំហររបស់អ្នកនាំពាក្យក្រសួងមហាផ្ទៃ បានធ្វើឡើងបន្ទាប់ពី អ្នកនាំពាក្យក្រសួងការពារជាតិ នាយឧត្តមសេនីយ៍ ឈុំ សុជាតិ បានចេញសេចក្តីថ្លែងការណ៍មួយ នៅថ្ងៃទី២៦ ខែឧសភា ឆ្នាំ២០១៧នេះ ដោយបានហៅសេចក្តីថ្លែងការណ៍របស់ខុមហ្វ្រែល និងក្រុមអង្គការសង្គមស៊ីវិលនៅកម្ពុជានៃបន្ទប់ស្ថានការណ៍សម្រាប់ការបោះឆ្នោតឆ្នាំ២០១៧ថាជាការបង្គាប់មកលើកងយោធពលខេមរភូមិន្ទ ការលាបពណ៌ និងប្រមាថមាក់ងាយដល់កិត្តិយស តួនាទី ព្រមទាំងភារកិច្ចរបស់កងទ័ពកម្ពុជា ដែលធ្វើឱ្យក្រសួងការពារជាតិ មិនអាចទទួលយកបានឡើយ។
លោក ឈុំ សុជាតិ បានបញ្ជាក់ថា ការលើកឡើងរបស់អង្គការសង្គមស៊ីវិល គឺជាការរំលោភបំពានធ្ងន់ធ្ងរដល់កទងទ័ព ហើយថាសេចក្តីថ្លែងការណ៍នេះ ហាក់ដូចជាមានចេតនាអ្វីមួយទៅថ្ងៃអនាគត។ លោកថ្លែងថា កងទ័ពមិនចាំបាច់ត្រូវការការណែនាំ ឬបង្គាប់បញ្ជាពីក្រុមអង្គការសង្គមស៊ីវិលឡើយ ហើយបានយល់ច្បាស់ពីច្បាប់បោះឆ្នោត និងតួនាទីភារកិច្ចរបស់ខ្លួន ក្នុងការចូលរួមក្នុងដំណើរការបោះឆ្នោតឃុំ សង្កាត់នាពេលខាងមុខ។
ក្រសួងការពារជាតិ បានបញ្ជាក់យ៉ាងច្បាស់ថា សកម្មភាព និងអនុសាសន៍របស់មន្រ្តីជាន់ខ្ពស់នៃកងយោធពលខេមរភូមិន្ទកន្លងមក មិនប៉ះពាល់ដល់ការបោះឆ្នោតទេ វាជាការជំរុញដល់ការការពារសន្តិសុខសម្រាប់ការបោះឆ្នោតនៅកម្ពុជា ដោយមិនឱ្យជនណាកេងយកឱកាសនេះ បង្កអសន្តិសុខ បំផ្លាញសេចក្តីសុខរបស់ប្រជាជនខ្មែរឡើយ។
សូមបញ្ជាក់ថា កាលពីថ្ងៃទី២៥ ខែឧសភា ឆ្នាំ២០១៧ ម្សិលមិញ អង្គការខុមហ្វ្រែល និងអង្គការសង្គមស៊ីវិលនៅកម្ពុជា នៃបន្ទប់ស្ថានការណ៍សម្រាប់ការបោះឆ្នោត បានចេញសេចក្តីថ្លែងការណ៍ អំពាវនាវឱ្យ គ.ជ.ប ព្រមានទៅលើមន្រ្តីកងយោធពលខេមរមភូមិន្ទ ដែលបានប្រកាសចាត់វិធានការលើបង្រ្កាបចំពោះ ការបង្កអសន្តិសុខសង្គម នៅអំឡុងពេលបោះឆ្នោត។ ក្រុមអង្គការសង្គមស៊ីវិលទាំងនោះ បានសម្តែងការ ព្រួយបារម្ភ អំពីផលប៉ះពាល់ដល់ ដំណើរការរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់ ចំពោះសារព្រមានរបស់ មន្រ្តីជាន់ខ្ពស់នៃកងយោធពលខេមរភូមិន្ទ នាពេលនេះ៕
បើតាមក្រសួងការពារជាតិ មន្រ្តីជាន់ខ្ពស់កងយោធពលខេមរភូមិន្ទ គឺជាការតម្រង់ឆ្ពោះទៅរកអ្នកដែលព្យាយាម បំផ្លាញសន្តិភាព និងបង្កើត បដិវត្តពណ៌នៅកម្ពុជា។ លោកថ្លែងថា កងទ័ពកម្ពុជា មិនគាំទ្រចំពោះទង្វើខុសច្បាប់ឡើយ មិនមែនត្រឹមតែចំពោះកងទ័ពនោះទេ បើក្នុងករណីមានជន ទាំងឡាយណា ដែលធ្វើខុសនឹងច្បាប់របស់ គ.ជ.ប ជនទាំងឡាយមានសិទ្ធិប្តឹងតវ៉ា ទៅគ្រប់ស្ថាប័នមានសមត្ថកិច្ច៕
