(ភ្នំពេញ)៖ សាកលវិទ្យាល័យអារីហ្សូណា (University of Arizona, UA) ដ៏ល្បីមួយនៅសហរដ្ឋអាមេរិក បានបើកសាខារបស់ខ្លួន នៅសាកលវិទ្យាល័យ អាមេរិកាំងភ្នំពេញ (AUPP) ចាប់ពីឆ្នាំ២០១៧នេះតទៅ។

យោងតាមសេចក្តីប្រកាសរបស់សាកលវិទ្យាល័យអារីហ្សូណា ដែលអង្គភាព Fresh News ទើបទទួលបាននៅថ្ងៃទី២៦​ ខែឧសភា ឆ្នាំ២០១៧នេះ បានឲ្យដឹងថា ចាប់ពីខែឧសភានេះតទៅ និស្សិតខ្មែរដែលចង់ទៅរៀននៅសហរដ្ឋអាមេរិក ពុំចាំបាច់ចំណាយថវិកា ច្រើនដូចមុនទៀតទេ ព្រោះ UA បានចាប់ផ្តើមបើកសាខារបស់ខ្លួន នៅប្រទេសខ្មែរតាមរយៈកិច្ចព្រមព្រៀង ដែលទើបចុះហត្ថលេខា ជាមួយសាកលវិទ្យាល័យ AUPP។

តាមរយៈកិច្ចព្រមព្រៀងនេះ និស្សិត AUPP នឹងទទួលបានអត្ថប្រយោជន៍យ៉ាងច្រើន ដូចជា៖ ថ្លៃសិក្សាសមរម្យ សិក្សារួមគ្នានិងស្រាវជ្រាវ រួមគ្នា រវាងនិស្សិត AUPP និងនិស្សិតមកពីអាមេរិក នៅសាកលវិទ្យាល័យ AUPP ឬនៅសាកលវិទ្យា​ល័យអារីហ្សូណា សហរដ្ឋអាមេរិក។ អ្វីដែលជាលក្ខណៈពិសេសនោះគឺ ក្រោយពីបញ្ចប់ការសិក្សាថ្នាក់បរិញ្ញាបត្រនៅ AUPP និស្សិតនឹងទទួលបានសញ្ញាបត្រពីរដែលចេញ ដោយសាកលវិទ្យា​ល័យ អារីហ្សូណា និងសា​កលវិទ្យាល័យ​ AUPP ទាំងកម្រិតបរិញ្ញាបត្រ និងបរិញ្ញាបត្រជាន់ខ្ពស់លើ​​មុខជំនាញ ជាច្រើន។

យោងតាមសេចក្តីប្រកាសខាងលើ កម្ពុជាជាប្រទេសទីពីរ ដែលសាកលវិទ្យា​ល័យ អារីហ្សូណា បានសម្រេច ចិត្តបើកសាខារបស់ខ្លួន។ UA Qingdao នៅប្រទេសចិន គឺជាសាខាទីមួយ ដែលដាក់ឱ្យដំណើការនៅឆ្នាំ​២០១៥ នៅសាកលវិទ្យាល័យ​ Ocean​ University of China ដែលពេលនោះ និស្សិតចំនួន១៧៥នាក់ បានចូលសិក្សានៅឆ្នាំដំបូង និងកើន​ឡើងដល់៤០០នៅឆ្នាំបន្ទាប់។

សាកលវិទ្យាល័យ​ Ocean​​ ស្ថិតក្នុងលំដាប់កំពូល​សាកលវិទ្យាល័យ៥០ នៅប្រទេសចិន និងក្នុងចំណោម សាកលវិទ្យាល័យល្អបំផុត ២ក្នុងខេត្ត​ Shandong ដែលជាសាកលវិទ្យាល័យល្អបំផុត ក្នុងប្រទេសចិន សម្រាប់មហាវិទ្យាល័យវិទ្យាសាស្រ្តស​​មុទ្រ។

ដោយឡែក AUPP គឺជា​សាកលវិទ្យាល័យឯកជន មិនរកប្រាក់ចំណេញ មានទីតាំងស្ថិតនៅតំបន់ទួលគោក ក្រុងភ្នំពេញ។ ជាមួយនឹងការ បណ្តុះបណ្តាល ស្តង់ដាអាមេរិកាំងក្នុងរយៈពេល៤ឆ្នាំមកនេះ AUPP បានពង្រឹងកិត្តិនាមរបស់ខ្លួ ​ជាសាកលវិទ្យាល័យ ដែលផ្តល់កម្មវិធី បណ្តុះបណ្តាលល្អ​បំផុតមួយនៅកម្ពុជា។ AUPP នឹងប្តូរទៅទីតាំងថ្មីដែលមានអគារសិក្សារចនាឡើង​យ៉ាង​ល្អបំផុត នៅឆមាស​ទីមួយ​ ឆ្នាំ​២០១៧ ខាងមុខនេះ។

ចំពោះ UA នៅសាកលវិទ្យាល័យ AUPP នឹង​ធ្វើការបណ្តុះបណ្តាលថ្នាក់បរិញ្ញាបត្រលើមុខជំនាញច្បាប់ សំណង់ស៊ីវិល និងរដ្ឋបាលធុរកិច្ច ក៏ដូចជាថ្នាក់​បរិញ្ញាបត្រជាន់ខ្ពស់ផ្នែកច្បាប់ បន្ថែមលើមុខវិជ្ជាចំនួន៥ទៀត ដែលសាកលវិទ្យាល័យ AUPP បានកំពុងបើកបង្រៀន រួមមានបរិញ្ញាបត្រផ្នែក កិច្ចការអន្តរជាតិ បច្ចេកវិទ្យាព័ត៌មានវិទ្យា និងវិទ្យាសាស្រ្តកុំព្យូទ័រ រចនាផ្នែកខាងក្នុង ស្ថាបត្យកម្ម  និងទេសចរណ៍ និងបដិសណ្ឋារកិច្ច។​

សម្រាប់ព័ត៌មានលម្អិត សូមទំនាក់ទំនងមកកាន់ទូរសព្ទលេខ ០២៣ ៩៩០ ០២៣/ ០១២ ២៦៦​ ៦៣១/ ០១២ ៨៩៨ ១២៤ ឬចូលទៅកាន់គេហទំព័រ www.aupp.edu.kh​៕