(ភ្នំពេញ)៖ ថ្ងៃទី១ នៃការតាំងពិព័រណ៍ពាណិជ្ជកម្មថៃ «Thailand Products Expo 2017» ភ្ញៀវជាច្រើនកុះករ បាននាំគ្នា​ចូល​សម្រុ​កចូលទិញទំនិញ ដែលពិព័រណ៍ពាណិជ្ជកម្មថៃនេះ ប្រព្រឹត្តឡើងរយៈពេល៣ថ្ងៃ ចាប់ពីថ្ងៃទី២៥-២៨ ខែឧសភា ឆ្នាំ២០១៧ ចាប់ពីម៉ោង០៩ព្រឹក ដល់ម៉ោង០៩យប់ នាមជ្ឈមណ្ឌល តាំងពិព័រណ៍កោះពេជ្រ។

លោក យិន សុផា តំណាងក្រុមហ៊ុន Cambo Advertising ចំកាត់ បានថ្លែងឲ្យដឹងថា ពិព័រណ៍នេះមានការចូលរួម​ទាំងអស់ចំនួន​​២០០ក្រុមហ៊ុន និងមានស្ដង់សរុបចំនួន២៥០ស្ដង់ ដែលមានតាំងនូវទំនិញម្ហូបអាហារ, ភេសជ្ជៈ, សំលៀកបំពាក់, គ្រឿងអគ្គិសនី, គ្រឿងសំអាងុំ វត្ថុអនុស្សាវរីយ៍, សំភារៈប្រើប្រាស់ក្នុងផ្ទះ, និងទំនិញ OTOP ថៃ ដែលសុទ្ធសឹងជាទំនិញមានគុណ​ភាពល្អ និងតម្លៃសមរម្យ។

លោកបន្ថែមថា ក្រៅពីការដាក់បង្ហាញ និងលក់ទំនិញ នៅក្នុងពិព័រណ៍នេះ មានរៀបចំកម្មវិធីចាប់ដៃគូពាណិជ្ជកម្មរវាងពាណិជ្ជករថៃ និងពាណិជ្ជករកម្ពុជា ដើម្បីរកតំណាងចែកចាយទំនិញថៃ នៅកម្ពុជា។

ជាមួយគ្នានោះ លោក ភិប៊ូន ហាត់ថះកិច្ចកុស៊ុន​ អភិបាលខេត្តផេតចាក់ប៊ូន បានថ្លែងថា «ពិព័រណ៍ពាណិជ្ជកម្មនេះ រៀបចំឡើងដើម្បី​បង្កើនសម្ព័ន្ធភាពពាណិជ្ជកម្មថៃ និងកម្ពុជា ហើយការរៀបចំពិព័រណ៍នេះ បានរៀបចំជាច្រើនដងមកហើយ ផលិតផលថៃដែលដាក់​លក់នៅប្រទេសកម្ពុជា ទទួលបានការគាំទ្រយ៉ាងខ្លាំងពីអតិថិជននៅកម្ពុជា»។

លោកបន្ដទៀតថា ការរៀបចំពិព័រណ៍នេះ គឺម្ចាស់ទំនិញបានយកទំនិញរបស់ខ្លួនដោយផ្ទាល់  មកដាក់លក់និងបង្ហាញនៅប្រទេស​កម្ពុជា ដែលធានាបានទាំងគុណភាព និងសុវត្ថិភាព​យ៉ាងពិតប្រាកដដោយមិនមានការក្លែងក្លាយ ឬក្លែងបន្ដំនោះឡើយ។ លោកថា «ខ្ញុំសង្កេតឃើញថា កម្ពុជាមានការរីកចំរើនយ៉ាងឆាប់រហ័ស ហើយខ្ញុំមានជំនឿជឿជាក់ថា ការរៀបចំពិព័រណ៍នេះនឹងជួយបង្កើន នូវកិច្ចសហប្រតិបត្តិការណ៍ និងទំនាក់ទនងរវាងប្រទេសទាំងពីរ និងជួយបង្កើនភាពចំរើនផ្នែកសេដ្ឋកិច្ចដល់ប្រទេសទាំងពីរថែមទៀតផង»​។  

សូមបញ្ជាក់ថា ពិព័រណ៍នេះ បានជ្រើសរើសយកទំនិញថៃម៉ាកល្បីៗ ដែលជាប្រភេទទំនិញថ្មីមកដាក់បង្ហាញ និងរកតំណាងចែកចាយនៅកម្ពុជា ហើយប្រជាពលរដ្ឋអាចជ្រើសរើសទំនិញថៃ ជាច្រើនប្រភេទក្នុងតម្លៃពិសេសជាងតម្លៃលក់ក្នុងទីផ្សារ។

ការតាំងពិព័រណ៍នោះក៏មាន ការរៀបចំប្រគុំតន្រ្ដីដ៏ធំដែលមានតារាចម្រៀន និងតារាកំប្លែងល្បីៗ សម្ដែងជូនទស្សនានាពេលយប់ ចាប់ពីម៉ោង៧យល់ដល់ម៉ោង៩យប់ជារៀងរាល់ថ្ងៃ៕