(សៀមរាប)៖ នៅរសៀលថ្ងៃទី២៤ ខែឧសភា ឆ្នាំ២០១៧ លោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា បានចុះទស្សនកិច្ចជាលើកដំបូងនៅភូមិធម្មជាតិរុនតាឯក។ ក្នុងទស្សនកិច្ចនេះ លោកស្រីបានជួបសំណេះសំណាលជាមួយប្រជាពលរដ្ឋ សិស្សានុសិស្ស ព្រមទាំងពិនិត្យគម្រោងអភិវឌ្ឍន៍នានាក្នុងភូមិធម្មជាតិរុនតាឯក ដែលស្ថិតក្រោមផែនការអភិវឌ្ឍន៍គម្រោងរបស់អាជ្ញាធរជាតិអប្សរា។
លោកស្រី ភឿង សកុណា បានសម្តែងអារម្មណ៍សប្បាយរីករាយ ពេលបំពេញទស្សនកិច្ចត្រួតពិនិត្យពីគម្រោងអភិវឌ្ឍន៍ភូមិធម្មជាតិរុនតាឯក ដោយលោកស្រីបានឃើញការរីកចម្រើនយ៉ាងពិតប្រាកដលើការងារអភិវឌ្ឍន៍កសិកម្ម។ ជាពិសេស លោកស្រីប្រធានអាជ្ញាធរជាតិអប្សរា ក៏បានចុះទៅពិនិត្យដល់ទីកន្លែងនៃសកម្មភាពអនុវត្តគម្រោងអភិវឌ្ឍន៍នានា ដែលកំពុងដំណើរការក្នុងភូមិធម្មជាតិរុនតាឯក ដូចជាគម្រោងអភិវឌ្ឍលើវិស័យកសិកម្ម នៃមជ្ឈមណ្ឌលលើកកម្ពស់កសិកម្មចិន-កម្ពុជា ហៅកាត់ថា CAPROC (China-Cambodia Agriculture Promotion Center) របស់ចិន និងការផលិតម្សៅម្រុំ ដែលកំពុងដំណើរការយ៉ាងល្អ ក្នុងភូមិអភិវឌ្ឍន៍មួយនេះជាដើម។ ក្នុងនោះ លោកស្រីក៏បានផ្តល់នូវអនុសាសន៍មួយចំនួន ដើម្បីជាប្រយោជន៍សម្រាប់ការអភិវឌ្ឍភូមិគំរូនេះទៅអនាគត សំដៅធ្វើយ៉ាងណាឲ្យជីវភាពប្រជាពលរដ្ឋដែលកំពុងរស់នៅក្នុងភូមិរុនតាឯកទាំងអស់ មានភាពល្អប្រសើរ។ ទន្ទឹមនោះដែរ លោកស្រីបានចែកសម្ភារសិក្សាមួយចំនួនដល់សិស្សានុសិស្ស និងសួរសុខទុក្ខដល់ប្រជាពលរដ្ឋ ដែលកំពុងរស់នៅក្នុងភូមិរុនតាឯកទាំងមូលផង។
នៅរសៀលថ្ងៃដដែលនោះ ក្រោយពីបញ្ចប់ទស្សនកិច្ចនៅភូមិរុនតាឯកហើយ លោកស្រីប្រធានអាជ្ញាធរជាតិអប្សរា ក៏បន្តចុះត្រួតពិនិត្យទីតាំងបុរាណដ្ឋានមួយចំនួន រួមមានប្រាសាទភ្នំបូក និងប្រាសាទចៅស្រីវិបុល ដើម្បីស្វែងយល់ពីស្ថានភាពអភិរក្សនៃប្រាសាទទាំងនោះ ក៏ដូចជាដំណើរការនៃការអភិរក្សរបស់អាជ្ញាធរជាតិអប្សរា៕
