(អង់ការ៉ា)៖ សវនាការលើជនសង្ស័យច្រើនជាង ២០០នាក់ ពាក់ព័ន្ធនឹងការធ្វើរដ្ឋប្រហារយោធា មិនបានសម្រេចកាលពីថ្ងៃទី១៥ ខែកក្កដា ឆ្នាំ២០១៦ នៅប្រទេសតួកគី បានចាប់ផ្ដើមហើយនៅដើមសប្តាហ៍​នេះ ក្រោមការរឹតបន្តឹងសន្តិសុខ​យ៉ាងខ្លាំង។ នេះបើតាមការចេញផ្សាយ​ដោយ​សារព័ត៌មាន BBC នៅព្រឹកថ្ងៃអង្គារ ទី២៣ ខែឧសភា ឆ្នាំ២០១៧។

ក្នុងចំណោមជន​សង្ស័យទំាង ២២១នាក់មាន ៣៨នាក់ ជាអតីតឧត្ដមសេនីយ៍​យោធាតួកគី ដែលត្រូវបានគេ​ចោទប្រកាន់ថា បានចូលរួមក្នុងរដ្ឋប្រហារយោធា​មិនបានសម្រេច និងការប៉ុនប៉ងទម្លាក់​ លោកប្រធានាធីបតី អឺដូហ្កាន់ ចេញពីតំណែងដោយបង្ហូរឈាម។ ពួកគេ ត្រូវបានក្រុមយោធា​បណ្ដើរ​ដោយថ្មើរជើង រហូតដល់តុលាការ​ក្នុងទីក្រុង​អង់ការ៉ា ហើយមិនតែប៉ុណ្ណោះ​នៅសងខាងផ្លូវ គេឃើញហ្វូងមនុស្សម្នា បាននាំគ្នាស្រែកទាមទារ​ឱ្យកាត់ទោស​ប្រហារជីវិត អ្នកទំាងអស់នោះទៀតផង។

គួរបញ្ជាក់ថា តុលាការតួកគី​បានចោទប្រកាន់មនុស្សទំាង ២២១នាក់ខាងលើថា បានចូលរួមក្នុង​សកម្មភាពផ្ដួលរំលំ​រដ្ឋាភិបាល និងជាអ្នក ទទួលខុសត្រូវលើ​ការស្លាប់របស់​ប្រជាពលរដ្ឋ​តួកគី ២៥០នាក់ កាលពីយប់​ថ្ងៃទី១៥ ខែកក្កដា ឆ្នាំ២០១៦។ ដូច្នេះ​ពួកគេអាច​នឹងប្រឈមមុខ ជាប់ពន្ធនាគារ​អស់មួយជីវិត៕