(ភ្នំពេញ)៖ ទិវាចងចាំថ្ងៃទី២០ ខែឧសភា លោក ហេង រតនា អគ្គនាយកស៊ីម៉ាក់ បានបង្ហាញសារដ៏ឈឺចាប់ នៃការកាប់សម្លាប់ប្រជាពលរដ្ឋខ្មែរ រាប់លាននាក់ ក្នុងរបបប្រល័យពូជសាសន៍ ប៉ុល ពត ដែលសម័យកាលនោះ ប្រជាពលរដ្ឋប្រៀបបានធ្លាក់ចូលក្នុងរណ្ដៅមរណៈ ដែលមិនស្គាល់ភាពហ៊ឺហារ សប្បាយរីករាយ ហើយហេដ្ឋារចនាសម្ព័ន្ធត្រូវបានបំផ្លាញខ្ទេចខ្ទី។ នេះបើតាមសាររបស់លោក ហេង រតនា ដែលបានបង្ហាញនៅបណ្ដាញសង្គម Facebook នៅថ្ងៃទី១៩ ខែឧសភា ឆ្នាំ២០១៧។
អគ្គនាយកស៊ីម៉ាក់រូបនេះ បានរៀបរាប់យ៉ាងដូច្នេះថា «ថ្ងៃចងកំហឹង២០ឧសភា៖ ចងកំហឹងនឹងរបបប្រល័យពូជសាសន៍ប៉ុល ពត អៀង សារី ខៀវ សំផន នួន ជា ដែលក្នុងចំណោមមេដឹកនាំជាន់ខ្ពស់ទាំងនោះ មានខៀវ សំផន និងនួន ជា កំពុងជាប់គុកអស់មួយជីវិត ក្រោយពីកាត់ទោសដោយ សាលាក្តីតុលាការ កូនកាត់អង្គកាសហប្រជាជាតិ និងរាជរដ្ឋាភិបាល។ ហេតុអីបានជាមានរបបប្រល័ពូជសាសន៍ដ៍សាហាវយង់ឃ្នងនៅកម្ពុជា ដោយបានកាប់សម្លាប់ ប្រជារាស្ត្រខែ្មរជាង២លានអ្នក ខែ្មរបែកបាក់រត់ភៀសខ្លួនទៅរស់នៅប្រទេសនានាលើសាកលលោកយ៉ាងច្រើន និងកម្ទេចចោលគ្មានសល់ នូវហេដ្ឋារចនាសម្ពន្ធ័រូបវន្ត និងធនធានទន់ដែលជាចំណេះដឹង នៃធនធានមនុស្សស្ទើរទាំងស្រុង។ ចំលើយជាការប្រៀបធៀបភាពជាក់ស្តែង សង្គ្រាមបានឆាប់ឆេះលើមាតុភូមិនេះ ដូចគ្នាទៅនឹងសង្គ្រាមនៅមជ្ឈឹមបូព៌ា នៃប្រទេស ស៊ីរី លីប៊ី ទុយនេស៊ី មុននឹងកើតឡើងនូវវាលពិឃាតប្រល័យពូជសាសន៍»។
លោក ហេង រតនា បានបន្ថែមថា «គេនៅតែចងចាំមូលហេតុមួយចំនួន ដែលជាឫសគល់នាំដល់ការប្រែក្លាយប្រជាជនខែ្មរ មួយចំនួនក្លាយខ្លួនជាឃាតករ ប្រឡាក់ឈាមយ៉ាងកាចសាហាវបំផុត គ្មានពីរលើលោកនេះ មានជាសង្ខេបខ្លីបំផុតដូចជា ការចិញ្ចឹមនិងបណ្តុះកំហឹងវណ្ណៈ ស្អប់ខ្ពើម និងឈឺចាប់រវាង អ្នកមានអ្នកក្រ ស្តេចមន្ត្រី និងរាស្ត្រ អំពើពុករលួយ អយុតិ្តធម៌ក្នុងសង្គម លាបពណ៌ប្រកាន់ពូជសាសន៍យួន-ចិន បរទេសឈ្លានពានទឹកដី ជាដើម។ល។ ជំរុញកំហឹងក្លាយជាការតស៊ូដើម្បីបុព្វហេតុការពារទឹកដី ជាតិ សាសនា សិទិ្ធស្មើ្មភាព យុតិ្តធម៌សង្គម បណ្តេញយួន បរទេសចេញពីទឹកដីខែ្មរ និងជាពិសេសលុបបំបាត់វណ្ណៈ។ គោលនយោបាយនិងអ្នកដឹកនាំ ជាមួយមហិ្ឆតា កសាងសង្គមខែ្មរមួយ គ្មានអយុត្តិធម៌សង្គម និងមានតែជាតិសាសន៍ខែ្មរនិយម គេបែរជាសម្លាប់រាស្ត្រខែ្មរខ្លួនឯងរាប់លាន ដើម្បីផ្លាស់ប្តូរនិងធ្វើបន្សុតភាពសង្គមខែ្មរ»។
ជាមួយគ្នានោះ លោកអគ្គនាយករូបនេះ បានអំពាវនាវប្រជាជនកម្ពុជាទាំងអស់ចងចាំថ្ងៃចងកំហឹង២០ឧសភា និងប្រើប្រាស់នូវបទពិសោធន៍ ដ៍មហាសោកដនកម្មនៃសង្គមខែ្មរនេះ រួបរួមគ្នាថែរក្សាសន្តិភាព សិ្ថរភាព និងការអភិវឌ្ឍន៍ ដែលមិនធ្លាប់មានជាច្រើនសតវត្សនៃព្រះរាជាណាចក្រនេះ ឱយបន្តគង់វង្សដើម្បីអនាគតរុងរឿងសំរាប់ ប្រទេសនិងប្រជាជនយើង។ សូមកុំព្យាយាមប្រើប្រាស់ សូម្បីតែបញ្ហាបង្គន់អនាមយ័ថា ជាទុក្ខវេទនាធំធេងណាស់ ហើយថាត្រូវតែផ្លាស់ប្តូរ! នេះជាទង្វើដ៏ឆោតល្ងង់ និងគ្មានវិញ្ញាណ បើសូម្បីបង្គន់អនាម័យក៏មិនយល់ ហើយបែរជាខិតខំបញ្ឆេះកំហឹងនិងបន្តុះបង្អប់ជាតិសាសន៍ឯងទៅវិញ (ព្រោះរឿងអនាមយ័នេះក៏វាពាក់ពន្ធ័នឹងទំនៀមទំលាប់ ប្រពៃណីផងដែរ)។ ប្រសិនជាអាចធ្វើទៅបាន សូមបងប្អូនដែលយល់ស្របតាមអ្នកលើមតិរិះគន់រឿងបង្គន់អនាមយ័នេះ សុំធ្វើដំណើរជាមួយលោកប្រធានមួយហ្នឹងទូទាំងប្រទេសកម្ពុជានៃយើង និងរង់ចាំមើលលោកប្រធាននោះទៅណា នៅពេលគាត់ត្រូវការដោះទុក្ខសត្វលោក តើគាត់ឡើងដើមឈើឬត្រូវចូលទឹកបឹង? បើទោះបីស្ថានីយ៍ប្រេងឥន្ទនះ ដែលមានហាង Amazon ក៏ចាប់ផ្តើមរីកដុះដាលហើយ ដែលមានកន្លែងខ្លះមានទំហំធំទូលាយជាងនៅជប៉ុន អាមេរិក និងបារាំងទៅទៀត!!៕
