(សៀមរាប)៖ ភរិយាអភិបាលខេត្តសៀមរាប លោកស្រី គួយ ណាលីន ប្រធានកិត្តយសសមាគមនារីកម្ពុជា ដើមី្បសន្តិភាព និងអភិវឌ្ឍន៍ខេត្តសៀមរាប បានលើកឡើងថា នៅពេលខាងមុខនេះ ស្ត្រីគ្រប់រូប គឺមានតួនាទីដ៏សំខាន់ ក្នុងការកៀងគរប្រមូលសមាជិករបស់ខ្លួន ឲ្យបានទៅចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ នាថ្ងៃទី០៤ មិថុនាឆ្នាំ២០១៧ខាងមុខនេះ ឲ្យបានគ្រប់ៗគ្នា។
ថ្លែងបែបនេះ ត្រូវបានធ្វើឡើងនៅថ្ងៃទី១៩ ខែឧសភា ឆ្នាំ២០១៧នេះ ក្នុងពិធីសំណេះសំណាលជាមួយអនុសាខា និងបណ្តាញសមាគមនារីឃុំ របស់ស្រុកស្រីស្នំ ដើម្បីលើកទឹកចិត្ដដល់នារី នៅអនុសាខា និងបណ្តាញសមាគមនារីឃុំ និងបេក្ខជនក្រុមប្រឹក្សាឃុំទាំងពេញសិទ្ធ និងបំរុង ឃោសនិក ក្រុមទ្រទ្រង់សុខភាពភូមិ មេភូមិ អនុភូមិគ្រប់ភូមិ និងយុវជន។ ក្នុងនោះក៏មានការចូលរួមពី លោកស្រីជាភរិយា ក្រុមប្រឹក្សាខេត្ត ថ្នាក់ដឹកនាំមន្ទីរជុំវិញខេត្ត និងសប្បុរសជនជាច្រើននាក់ទៀតផងដែរ។
លោកស្រី គួយ ណាលីន ឃឹមប៊ុនសុង បានលើកឡើថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បាននិងកំពុងយកចិត្តទុកដាក់ខ្ពស់ លើការលើកកម្ពស់តម្លៃស្ត្រី ដោយបានផ្តល់អនុសាសន៍ជាច្រើនពាក់ព័ន្ធការងារ និងអត្ថប្រយោជន៍របស់ស្ត្រី នៅតាមក្រសួង ស្ថាប័ន អង្គភាពសាធារណៈ ក៏ដូចជាវិស័យឯកជន សំដៅធ្វើយ៉ាងណាឲ្យមានការចូលរួមកាន់តែច្រើន និងប្រកបដោយគុណភាព ប្រសិទ្ធភាពការងារពីសំណាក់ស្ត្រី ក្នុងកិច្ចដំណើរការអភិវឌ្ឍសង្គម និងសេដ្ឋកិច្ចជាតិ ម៉្យាងទៀតស្ត្រីគឺជាឆ្អឹងខ្នង នៃកិច្ចអភិវឌ្ឍន៍សង្គមជាតិនិមួយៗ ដែលជាមាតាពិភពលោក។
បើតាមលោកស្រី «ស្ត្រីយើងត្រូវធ្វើការផ្សព្វផ្សាយពីគោលនយោបាយរបស់គណបក្សប្រជាជនកម្ពុជា និងត្រូវក្តាប់ឲ្យបាននូវសតិអារម្មណ៍ របស់នារីក្នុងមូលដ្ឋានខ្លួន ព្រមទាំងត្រូវធ្វើការណែនាំ ឲ្យពួកគេយល់ដឹងអំពីកាតព្វកិច្ចជាប្រជាពលរដ្ឋមួយរូប ក្នុងការជ្រើសរើសតំណាង ដឹកនាំរបស់ខ្លួន ដើមី្បទទួលនូវការអភិវឌ្ឍន៍មូលដ្ឋានរបស់ខ្លួនផងដែរ»។
ម៉្យាងទៀត ត្រូវធ្វើការគ្រប់គ្រងបងប្អូនប្រជាពលរដ្ឋ ដែលបានធ្វើចំណាកស្រុក ទាំងក្នុង និងក្រៅប្រទេស ព្រមទាំងធ្វើចលនាឲ្យបងប្អូនទាំងនោះ បានមកចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់ខាងមុខនេះ ដោយកន្លងមកនារី ក៏មានស្នាដៃលើការងារចលនានេះ ដោយទទួលបានជោគជ័យទៀតផង។
ប្រធានសមាគមនារីរូបនេះ បានធ្វើការផ្តាំផ្ញើ និងណែនាំដល់បងប្អូននារី ត្រូវខិតខំសិក្សាស្វែងយល់នូវចំណេះដឹង បទពិសោធន៍ ដើម្បីកសាងអនាគតរបស់ខ្លួន ហើយជាកម្លាំង និងគ្រឹះដ៏រឹងមាំរបស់គណបក្សប្រជាជនកម្ពុជា ក្នុងការឈានទៅ រកភាពជោគជ័យនាថ្ងៃខាងមុខនេះ និងសុំឲ្យបងប្អូននារីទាំងអស់ ត្រូវខិតខំធ្វើសកម្មភាពរបស់ខ្លួននៅតាមមូលដ្ឋាន និងជម្រុញដល់បងប្អូននារី សំខាន់ប្តី ញាតិមិត្តជិតខាងខ្លួនឲ្យបានទៅបោះឆ្នោតគ្រប់ៗគ្នា ជូនគណបក្សប្រជាជនកម្ពុជា ដើមី្បទទួលបាននូវកិច្ចអភិវឌ្ឍន៍ជាតិមាតុភូមិទៅថ្ងៃអនាគត។
ក្នុងនោះដែរលោកស្រី និងគណៈប្រតិភូរួមដំណើរ បាននាំយកនូវវត្ថុអនុស្សាវរីយ៍ ជូនដល់បងប្អូននារី នាឱកាសនោះម្នាក់ៗទទួលបាននូវសារុង១ ថវិកាចំនួន ២ម៉ឺនរៀលផងដែរ៕
