(ភ្នំពេញ)៖ បើគ្មានការប្រែប្រួលជើងហោះហើរនោះទេ សពទាហានមួកខៀវកម្ពុជា៤រូប ដែលបានពលីជីវិតនៅប្រទេសអាហ្វ្រិកកណ្ដាល ក្នុងបេសកកម្មមនុស្សធម៌ ក្រោមឆ័ត្រអង្គការសហប្រជាជាតិ និងត្រូវដឹកតាមយន្ដហោះមកដល់ស្រុកកំណើតវិញ នៅវេលាម៉ោង០៧៖៤៥នាទីយប់ ថ្ងៃទី២០ ខែឧសភា ឆ្នាំ២០១៧ស្អែកនេះ។ នេះបើយោងតាមលោកឧត្តមសេនីយ៍ តុន សាលី អគ្គនាយករង នៃមជ្ឈមណ្ឌលកងកម្លាំងរក្សាសន្ដិភាព បោសសម្អាតមីន និងគ្រាប់មិនទាន់ផ្ទុះ បានប្រាប់បណ្ដាញសារព័ត៌មាន Fresh News នៅរសៀលថ្ងៃនេះ។
លោកឧត្តមសេនីយ៍ បានបញ្ជាក់ថា «សពយោធិនកម្ពុជាទាំង៤រូប តាមការគ្រោងទុកនោះ នឹងដឹកមកដល់ព្រលានយន្ដហោះអន្ដរជាតិភ្នំពេញ នៅវេលាម៉ោង០៧៖៤៥នាទីយប់ស្អែក ប៉ុន្ដែបើសិនមានការប្រែប្រួលជើងហោះហើរ នឹងពន្យាពេល ពីព្រោះគិតត្រឹមម៉ោងនេះ (ម៉ោង០៣៖៤៣នាទី) សពទាហ៊ានមួកខៀវរបស់យើងទាំង៤រូប មិនទាន់លើដាក់លើកយន្ដហោះនៅឡើយទេ»។
បើតាមអគ្គនាយករងរូបនេះ លោកឧបនាយករដ្ឋមន្ដ្រី ទៀ បាញ់ រដ្ឋមន្រ្តីក្រសួងការពារជាតិ នឹងដឹកនាំមន្ដ្រីជាន់ខ្ពស់ទៅទទួលសពទាហ៊ានមួកខៀវ រួចហើយនឹងរៀបចំដឹកទៅកាន់លំនៅឋានរបស់សពរៀងៗខ្លួន ដែលស្ថិតនៅរាជធានីភ្នំពេញ ខេត្តពោធិ៍សាត់ ខេត្តសៀមរាប និងខេត្តស្វាយរៀង អមដោយកម្លាំងអាវុធហត្ថជាច្រើននាក់ និងកម្លាំងនគរបាលឈរយាមតាមផ្លូវបណ្ដាប់គ្នា។
សូមបញ្ជាក់ថា ទាហានមួកខៀវកម្ពុជា៤រូបនោះ បានពលីជីវិតនៅប្រទេសអាហ្រិ្វកកណ្តាល បន្ទាប់ពីមានការវាយប្រហារដោយ ក្រុមឧទ្ទាមទៅលើក្បួនយុទ្ធ ដំណើររបស់កម្លាំង Minusca របស់អង្គការសហប្រជាជាតិ កាលពីយប់ថ្ងៃទី០៨ ខែឧសភា ឆ្នាំ២០១៧។ ក្នុងនោះរួមមាន៖ លោកពលបាលឯក (ឋានន្តរស័ក្តពិតប្រាកដ អនុសេនីយ៍ទោ) អ៊ឹម សំ បុគ្គលិកបើកបរ ប៊ុលដូស៊ែរ, លោកអនុសេនីយ៍ត្រី ស៊ាន នរិន្ទ (ព្រិន្ទបាលទោ) ជំនួយការត្រួតពិនិត្យគុណភាព, លោកពលបាលឯក មុំ តុលា (ព្រិន្ទបាលទោ) ជំនួយការបើកបរអ៊ិស្ការវ៉ាទ័រ និងលោកអនុសេនីយ៍ត្រី ម៉ៅ អេង (អនុសេនីយ៍ឯក) បុគ្គលិកពេទ្យផងដែរ។
នាយឧត្តសេនីយ៍ សែម សុវណ្ណនី អគ្គនាយក នៃមជ្ឈមណ្ឌលកងកម្លាំងរក្សាសន្តិភាព បោះសំអាតមីន និងគ្រាន់មិនទាន់ផ្ទុះ បានថ្លែងឲ្យដឹងថា ក្រុមគ្រួសាររបស់យោធិនកម្ពុជាទាំង៤រូប នឹងទទួលបានសំណង ប្រមាណ៧ម៉ឺនដុល្លារ សម្រាប់សពម្នាក់ ពីអង្គការសហប្រជាជាតិ។
ការប្រគល់សំណងជូនក្រុមគ្រួសារសព នឹងធ្វើឡើងនៅក្រសួងការបរទេសកម្ពុជា ក្រោមអធិបតីភាពទេសរដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស នៅពេលសមស្របណាមួយ៕
