(បន្ទាយមានជ័យ)៖ នៅល្ងាចថ្ងៃទី១៨ ខែឧសភា ឆ្នាំ២០១៧ ឧបនាយករដ្ឋមន្រ្តី កែ គឹមយ៉ាន សមាជិកអចិន្រ្តៃយ និងជាប្រធានក្រុមការងារថ្នាក់កណ្តាល ចុះជួយខេត្តបន្ទាយមានជ័យ បានចុះជួបសំណេះសំណាលជាមួយបងប្អូនខ្មែតឥស្លាម នៅឃុំឬស្សីក្រោម ស្រុកមង្គលបុរី។ នៅក្នុងឱកាសនោះ នាយឧត្តមសេនីយ៍ កែ គឹមយ៉ាន បានអំពាវនាវដល់បងប្អូនទាំងអស់ ឲ្យអញ្ជើញទៅបោះឆ្នោតជ្រើសរើសក្រុមប្រឹក្សាឃុំសង្កាត់នាថ្ងៃទី៤ ខែមិថុនា ឆ្នាំ២០១៧ ហើយបោះឲ្យត្រូវគណបក្សណា ដែលរួមសុខទុក្ខពេលបងប្អូនជួបការលំបាក ដើម្បីបន្តការដឹកនាំឆ្ពោះទៅរកការអភិវឌ្ឍជាបន្តទៀត។
ក្នុងឱកាសនោះនាយឧត្តមសេនីយ៍ កែ គឹមយ៉ាន បានពាំនាំការសួរសុខទុក្ខពីសំណាក់ថ្នាក់ដឹកនាំ គណបក្យប្រជាជនកម្ពុជាមានសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា សម្តេចពញាចក្រី ហេង សំរិន សម្តេចក្រឡាហោម សខេង សម្តេចវិបុលសេនាភក្តី សាយ ឈុំ និងថ្នាក់ដឹកនាំគណបក្ស ប្រជាជនទាំងអស់ ដែលតែងតែគិតគូររួមសុខរួមទុក្ខ ជាមួយសមាជិក សមាជិកាគណបក្សប្រជាជនទាំងអស់។
ក្នុងឱកាសនោះនាយឧត្តមសេនីយ៍ កែ គឹមយ៉ាន បានរំលឹកពីអនុស្សាវរីយ៍ជូរចត់ នៃរបបអាវខ្មៅ៣ឆ្នាំ ៨ខែ ២០ថ្ងៃ ដែលជនរួមខែ្មរឥស្លាមយើង ត្រូវបានបង្ខំឲ្យធ្វើការងារជាទំងន់ សាសនាត្រូវលុបបំបាត់ ព្រះវិហារត្រូវបានបំផ្លិចបំផ្លាញ ស្ទើរគ្មានសល់ គឺរស់នៅរងទុក្ខវេទនា ដូចប្រជាពលរដ្ឋខ្មែរទូទៅដែរ។ ប៉ុន្តែក្រោយថ្ងៃរំដោះ៧ ខែមករា ឆ្នាំ១៩៧៩ និងមកដល់ពេលបច្ចុប្បន្ន ប្រជាជនខ្មែរឥស្លាម បានរួចផុតពីការធ្វើទុក្ខបុកម្និញ ហើយត្រឡប់មករួមរស់យ៉ាងសុខសាន្ត ក្រោមការដឹកនាំរបស់គណបក្សប្រជាជនកម្ពុជាយើង។
លោកបន្ថែមទៀតថា ក្រោមយុទ្ធសាស្រ្តឈ្នះឈ្នះរបស់សម្តេចតេជោ ហ៊ុន សែន សង្រ្គាមបានរលត់ ហើយបាននាំ មកនូវសុខសន្តិភាពសណ្តាប់ធ្នាប់សង្គម និងការអភិវឌ្ឍរីកចម្រើនគ្រប់វិស័យ។ ជាមួយគ្នានេះ ហេដ្ឋារចនាសម្ព័ន្ធ សង្គមត្រូវបានបង្កើតឡើង យ៉ាងព្រោងព្រាតទន្ទឹមនឹងការរីកចម្រើននេះ សាលារៀន ព្រះវិហារ សាសនាឥស្លាម ក៏បានរីកដុះដាលឡើងវិញ និយាយជារួម និងនិយាយដោយឡែក ចាប់ពីឆ្នាំ២០១៥ មកទល់បច្ចុប្បន្ននេះមានលោកគ្រូ អ្នកគ្រូឥស្លាម ក្របខណ្ឌចំនួន១៥០០នាក់ ហើយជារៀងរាល់ឆ្នាំសម្តេចតេជោ ហ៊ុន សែ តែងតែចូលរួមពិធីស្រាយបួស (រ៉ាម៉ាដាន់) ជាមួយបងប្អូនខ្មែរឥស្លាមយើង ដែលបង្ហាញពីការយកចិត្តទុកដាក់ក្នុងនាមជាជនរួមជាតិមហាគ្រួសារខ្មែរ។
ចុងបញ្ចប់នាយឧត្តមសេនីយ៍ កែ គឹមយ៉ាន បានផ្តល់អំណោយជូនសមាជិកបងប្អូនខ្មែរឥស្លាម ក្នុងម្នាក់ៗទទួលបាន សារុង១ ថវិកា ១ម៉ឺនរៀល និងជួយកសាងសាលារៀនខ្មែរឥស្លាម១ខ្នង់ មាន៥បន្ទប់ ផងដែរ៕
