(កំពង់ចាម)៖ ដើម្បីលើកកម្ពស់ សុវត្ថិភាពម្ហូបអាហារ មន្រ្តីសាខាកាំកុងត្រូលខេត្តកំពង់ចាម ដឹកនាំដោយលោក ជួន សុជាតិ ប្រធានសាខា នៅថ្ងៃទី១៨ ខែឧសភា ឆ្នាំ២០១៧នេះ ​សហការជាមួយ មន្រ្តីមន្ទីរពាណិជ្ជកម្ម និងគណៈកម្មការផ្សារ អាជ្ញាធរដែនដី បានចុះត្រួតពិនិត្យចំណីអាហារផលិតផល កំប៉ុង និងគ្រឿងសមុទ្រ ដែលដាក់លក់នៅក្នុងផ្សារពាមជីកង ស្ថិតក្នុងស្រុកកងមាស ខេត្តកំពង់ចាម។

លោក ជួន សុជាតិ​ បានឲ្យដឹងថា ការចុះត្រួតពិនិត្យទៅលើផលិតផលវេចខ្ចប់ ជាគ្រឿងឧបភោគ បរិភោគ ដែលបាននិងកំពុងដាក់តាំងលក់ នៅតាមផ្សារពាមជីកងដូចជា រួមទាំងផលិត ផលចំណីអាហារ រួមមាន បង្គារ មឹក គុយទាវ សណ្តែកបណ្តុះ និងផលិតផលគ្រឿងសមុទ្រជាដើម ដែលកំពុងចរាចរ ដាក់លក់នៅ លើទីផ្សារ តែរកមិនឃើញផលិតផលណាមួយ ខូចគុណភាព រឺមានសារធាតុគីមី ហាមឃាត់នោះទេ ដែលនេះសបញ្ជាក់ថា អាជីវករលក់ដូរ មានការយល់ដឹងច្រើនពីបញ្ហាសុវត្ថិភាពម្ហូបអាហារផងដែរ។

​ប្រធានសាខា ក៏បានធ្វើការណែនាំដល់អ្នកលក់ និងអ្នកទិញត្រូវដឹងពីអត្តសញ្ញាណ ប្រភពអាស័យដ្ឋានរបស់អ្នកដែល យកមកលក់ឲ្យខ្លួន ឬរក្សាទុកនូវវិក្កយបត្រទូទាត់ ឲ្យបានត្រឹមត្រូវជាព័ត៌មាន ដើម្បីបង្កលក្ខណៈងាយ ស្រួលដល់សមត្ថកិច្ចកាំកុងត្រូល ក្នុងការចុះស្រាវជ្រាវ និងតាមដានបន្ត នឹងមានវិធានការ ទៅតាមផ្លូវច្បាប់ ចំពោះអ្នកលក់ ឬអ្នកចែកចាយផលិតផលទាំងនោះ។

ឆ្លៀតឱកាសនោះដែរ ក្រុមការងារក៏ បានបិទផ្សាយនូវ រូបភាព Poster និងផ្សព្វផ្សាយដល់អាជីវករអ្នកលក់ដូរ និងអ្នកប្រើប្រាស់ ឲ្យបានយល់ ដឹងអំពីផលវិបាកដែលបណ្តាលការបរិភោគអាហារហួសកាលបរិច្ឆេទ ប្រើប្រាស់ និងការដាក់លាយបន្ថែមសារធាតុគីមីហាមឃាត់ ចូលក្នុងម្ហូបអាហារ​។

បន្ថែមពីនេះ លោកប្រធានសាខា ក៏បានអំពាវនាវ ដល់អាជីវករ អ្នកលក់ដូរទាំងអស់ ឲ្យប្រុងប្រយ័ត្ន និងយកចិត្តទុកដាក់ខ្ពស់ គឺលក់ដូរ និងចែកចាយតែ ទំនិញ ផលិតផលម្ហូបអាហារណា ដែលមានគុណភាព មិនប៉ះពាល់ដល់ សុខមាលភាពអ្នកប្រើប្រាស់៕